1 Teshalonika 2

Pwɔɔ yɔɔ ki nimi liih ə Teshalonika

Bəŋgwoŋ biaa, bəŋ kibɛɛ kəla lə gbɛŋ wwuŋ kkə mà la we bəŋ mà kə duŋ nə wunya kə. 2 Maa ye bə kələ lə lə, bəne mà nəə be ŋgə, baa nə be gbo wibeenə ə kibalaki ki Filipi mə, kkə baa kkə kwàa tɔ́ŋ bə muŋga mu Chu ya, bənlaanə bəŋ hlɨŋ nwaa Chu, maa ye bəne màa bə́ bāŋ lə be gbaaŋ nəni. 3 Hlɨŋ ni kkə mà bwo ye bə yi yee kkə dōntə kkə kɔ̀nɔ bəŋ mà kə duŋ nə bə gbenə kə, kkə mà kə dontə yi bə kinhle kiwaha ləkə lə yee kkə fīhi bəŋ bu fihinə kə. 4 Kwaalə, ye Chu ŋəŋ lə lə kkə wuna bəne, bbəŋ i nəə hlɨŋ nwaa ni ə be kwáŋ, yee kkə dontə ye dɨŋ bəne bie. Kkə kə yee kkə dōntə lə yee gbo nūaa ə duŋ bəne kə. Kkə dòntə fo finwaa ə duŋ Chu nnu i chìini yo tɔ́ŋ ŋiaa. 5 Bə yii kə̀lə lə, kkə kə hlaa lə bwo fihi bəŋ bə náami li njənjə ləkə lə yee kkə fuu bəŋ kigbaŋ bəmbənə fieŋ fidi ə bəŋ kwáŋ kə. Fɨhŋ lə fieŋ ffɨŋ Chu bemi kah bə be. 6 Kkə mà kə kiɛɛ lə bəŋkənə kiŋkuntaŋ ə bəne go ləkə kkɨŋ ki bwò ə bəŋ mə, ləkə ə bəne bədi kwáŋ kə. Maa ye ə mà duŋ lə dɔhɔ kiaa ye bəne bə faŋnə bə Kleto bəmbii bieŋ lə yee bə fə̄ bə be. 7 Kkə màa kkə dūŋ ŋkwo ya shiiiŋ ə bəŋ mə ye mah ŋiaŋ bwo lə yee i dɛ̄hiŋ bwɔni biih. 8 Nəni kkə mà jəə bəŋ ə be go bə kinleki, bwo nə bəŋ ə kə duŋ nə kwaa hlɨŋ Chu nwaa kə, kkə nə dəŋ go ŋiaa bə bəŋ yulahalə bə mà chu duŋ ə tɔ́ŋ ŋiaa go gbaaŋ.

9 Bəŋgwoŋ biaa, bə kələ dəŋ nimi liaa bə yohinə kiaa. Kkə màa kkə nɨ̄ŋ ə butuu bə bushi, fo kkə lə nakə toolə mbɛɛ ju ntiɛ ndili ye kkə màa kkə dōntə lə hlɨŋ nwaa Chu bə bəŋ. 10 Bəŋ kibɛɛ maa Chu duŋ ə yee bə bēmi kah bə nhlaa ya, lə fwɔ waa bə bəne bə kimbemi mə duŋ wi nchaa, wi dùŋ ntiiŋ kə kənə yili lidi kə. 11 Bə kələ dəŋ ye kkə màa kkə fə̄ bə bəŋ ye che bwɔni bwò lə i fə̀ bə bwɔni biih. 12 Kkə màa kkə yɔ̄ɔ kkə tàhi go ŋieeŋ, kkə dɛ̀hiŋ bəŋ, kkə chwàŋ bəŋ lə yee bə fə̄ fwɔ ə duŋ wwuŋ Chu kìɛɛ. Ə Chu nnu i chee bəŋ lə bə lɛɛ ə muŋkɨŋ mwii mə bə ə kiŋkuntaŋ kiih mə.

13 Kkə baafɛ dəŋ Chu bwɔɔ mənhliŋ yu bwɔɔ nnu kkə mà bwo bə die Chu ə bəŋ mə, bə mà woo tɨŋ jə die ye, ə kə duŋ nə ye die mbɛɛ, kwaalə jə yi kibɛɛ ye die Chu, ə duŋ yi nni i nɨ̀ŋ ə bəŋ mə, bəŋ bbəŋ bə́ dùŋ bie bəne bə kimbemi. 14 Bəŋgwoŋ biaa, bə yìi kələ fieŋ ffɨŋ fi mà chili bimbumə bi bəne bə kimbemi bə Chu bbəŋ bə́ bema bə Jisho Kleto ə bidi bi Judia mə, fi mà duŋna dəŋ bə bəŋ. Bə mà woo dəŋ ŋgə ə bəne bieeŋ bə kitɨŋ kwáŋ yəəŋ ye bə́ mà wolə ə Bəjuu kwáŋ ə duŋ bəne bəbə. 15 Ə Bəjuu bəhŋ bbəŋ bə́ mà jii Baba Jisho. Ə duŋ bə́ bbəŋ bə́ màa bə́ jīi bəne bə hlɨŋ Chu. Ə duŋ bə́ bbəŋ bə́ mà kɔhiŋ be ə bə́ mə. Bə́ fə̀ nəni Chu kə woo njənjə bə bə́ kə. Bə́ kə diee njənə bə bəne bənhliŋ, 16 yee bə́ bāŋ be je, lə kkə kə yɔɔ lə bə bəne bbəŋ bə́ dùŋ kə duŋ nə Bəjuu lə bə́ fukwoo. Bə́ fə̀ nəni bwɔɔ mənhliŋ yíwaha yibə yìi yí bìŋ. Kiŋkpee ki mu duŋ lə tɔŋ li Chu fwèe bə bə́.

Pwɔɔ yee i kìɛɛ lə i baa ŋəŋ ə bəne bə kimbemi bə Teshalonika go

17 Bəŋgwoŋ biaa, ye kkə gahi lə gbo ə bwɔɔ ju bəŋ chɛɛ. Kkə mà ga kwaa ə duŋ gbo, kkə mà kə gaa ə tɔ́ŋ ŋiaa mə kə, kkə joo gbaaŋ, kkə kə̀nə hlɔɔ gbaaŋ lə kkə baa ŋəŋ ə bəŋ go, dii bə dii. 18 Kkə bie kkə kīɛɛ bəfiimə bwo chu bə bəŋ. Mi Pwɔɔ kibɛɛ mmɔŋna chá kiŋaaŋkə lə mbwo, kwaalə hlaata bàŋ kwaa be je. 19 Kkə kə̀nə ŋgɨŋ nəni yulahalə fieŋ ffɨŋ duŋ ə yee kkə kèe fwi ə fi go, ləkə kinjənjə kiaa, ləkə liwunə lifo li hləənə bə li ə Baba ya Jisho fwi bwɔɔ nnu i yá fiimə bwo yá duŋ laha lə? Ə kə duŋ nə bəŋ lə? 20 Bə kichɛɛŋ, ə bəŋ kiŋkuntaŋ kiaa bə kinjənjə kiaa.