1 Teshalonika 1

Kiŋwaati ki fwii kkɨŋ Pwɔɔ mà bieŋ bə kimbumə ki

Teshalonika

Ə mi Pwɔɔ, kkə bie bee Shila maa Timɔti. Mbīeŋ kiŋwaati kɨhŋ bə kimbumə ki bəne bə kimbemi bə kibalaki ki Teshalonika kkɨŋ ki buma yee ki dūŋ bə Tah Chu, maa bə Baba Jisho Kleto.

Yee tɔŋ li Chu linwaa bə kindunshiiŋ bwô ə bəŋ go.

Pwɔɔ baafɛ Chu yu kimbumə ki bəne bə kimbemi bə Teshalonika

2 Kkə bwo kkə nə kimbaafɛɛ bə Chu bwɔɔ mənhliŋ yu bəŋ bənhliŋ, baa ma bəŋ bwɔɔ mənhliŋ ə Chu cheenə ya mə. 3 Bwɔɔ nnu kkə duŋ ə Chu Tah ya fwi, kkə bwò kkə hlè fwɔ́ ŋieeŋ ŋŋəŋ ŋə bwò ə tɔ́ŋ ŋŋəŋ bə yiila ə Kleto mə, bə nimi ŋieeŋ ŋŋəŋ ŋə bwò ə kinleki kieeŋ mə maa tɔ́ŋ ŋŋəŋ bə kwàa ŋŋəŋ ŋə bwò ə ŋkee fwi nnu bə kə̀nə ə Baba ya Jisho Kleto mə.

4 Bəŋgwoŋ biaa bbəŋ Chu lèki, kkə kələ lə Chu shaala bəŋ lə yee bə dūŋ biih. 5 Kkə kələ nəni yulahalə hlɨŋ nwaa nni kkə mà bwo ye bə yi ə bəŋ mə, i mà kə bwoo ə duŋ ə biyɔɔnə mə kwaa kə. I mà bwo dəŋ bə muŋga mmuŋ mu fù ə Fiana Wɛɛŋ mə, kkə kəla dəŋ lə hlɨŋ ye duŋ kichɛɛŋ. Bə kə̀lə dɨŋ bəne bbəŋ kkə mà duŋ bie bwɔɔ nnu kkə mà duŋ ə bəŋ mə, fo bə lə bənə mbɨŋ ə fwɔ waa go. 6 Bə mà jəə wuh ŋəŋŋ yee bə dūŋ ye be bə ŋə Baba, yulahalə bə mà tɨŋna jə hlɨŋ ye bə kintɨŋ kkɨŋ ki fù ə Fiana Wɛɛŋ mə maa ye bə mà duŋ lə dəŋ ə ŋgə ŋkuntaŋ mə. 7 Nəni bə hlə chu bəne bbəŋ bəne bə kimbemi bənhliŋ ə bidi bi Meshedonia mə, bə bi Akeya, jə̀ kinfɛhiŋ ə bə́ go. 8 N'yɔ̄ɔ nəni yulahalə ə kə duŋ nə kwaa die Baba nni i mà chɔɔ ə bəŋ go jaa gəŋ wɛɛ wi Meshedonia bə wi Akeya mə kə. Hlɨŋ nwaa ki tɔ́ŋ ŋieeŋ ŋŋəŋ bə yiila ə Chu mə dəŋ jaala gəŋ ə bidɔhɔ mə binhliŋ. Nəni kinhle kidi hləŋ kkɨŋ duŋ ə yee kkə bāa kkə yɔ̀ɔ ki fimbini fie kə. 9 Yee bə kə̂lə lə bəne bie kibɛɛ bənhliŋ bie bə́ yɔ̄ɔ ye bə mà tɨŋ jə be ə bəŋ mə, maa ye bə mà she bəcheh bwo chu bə Chu, lə yee bə nɨ̄ŋ ə duŋ bə Chu kichɛɛŋ, nnu i kə̀nə yo kinduŋh. 10 Bie bə́ yɔ̄ɔ dəŋ ye bə bie bə kè Ŋiaani nnu i yá fu ə buh, bwo. Ŋiaani nu, ə wu nnu i mà fu ə kpe mə, ə duŋ Jisho nnu i fwòo be ə tɔŋ li Chu llɨŋ li fwèe kwaŋ, llɨŋ i yáa i nyīi bə bəne.