Yesus nyambuh pambantu pawira Roma
7
1 Udah Yesus ngajar urak banyaꞌk ka tampat nang rate, Ia ampus ka kota Kapernaum. 2 Ka sana ada pawira Roma nang pambantu ia tangah sakit koat ampir mati. Pawira na mbada sayang ka pambantu ia. 3 Waktu pawira na nangar Yesus datak ka Kapernaum, ia nyuruh dua-tege taꞌk pamempen urak Yahudi ontoꞌk ngaga Yesus wan minta Yesus datak ontoꞌk nyambuh pambantu nang sakit koat ntadi. 4 Waktu umpu-ia batamu duan Yesus, umpu-ia minta tolong banar-banar ka Ia, “Tolonglah pawira Roma ngan! Ia patut Maꞌksana tolong. 5 Krana ia ngasih diri, urak Yahudi, ia uga nang nanggong mbangun rumah sambayang diri-manaꞌk.”6 Lalu Yesus ampus barayuk duan pamempen urak Yahudi na. Waktu umpu-ia dah samaꞌk rumah pawira na, pawira na ngutus page-page ia ontoꞌk nyampai pasat ia ka Yesus bage pitu, “Sano, usah Sano basusah-susah tama ka rumah aku, krana aku angin patut nrima Sano, 7 uga aku nganggap aku angin patut ngaga Sano. Tape Sano padah ja sapatah kata, supaya pambantu aku na bisa baiꞌk. 8 Krana aku uga anaꞌk buah taꞌk pawira nang labih tingi pangkat ia, lalu koroh aku ada agi prajurit nang jaji anaꞌk buah aku. Kaloꞌk aku mrintah ka anaꞌk buah, ‘Ampus!’ Pasti anaꞌk buah aku ampus. Uga kaloꞌk aku mrintah ka anaꞌk buah nang lain ‘Kitu!’ Pasti anaꞌk buah aku datak. Atau kaloꞌk aku nyuruh ka pambantu, ‘Gawe banda ntu!’ Pasti pambantu na nggawe.”
9 Udah Yesus nangar pasat pawira Roma na, Ia njaji eran. Lalu Yesus nele ka urak nang nuna Ia, sambel bakata, “Ngkala Aku namu urak nang banar-banar pacaya bage pawira ngia, urak Israel ja angin nang pacaya bage pitu!”
10 Lalu page-page nang dinyuruh ntadi baleꞌk ka rumah pawira na, umpu-ia nele pambantu ia na udah baiꞌk.
Anaꞌk janda ka Nain idup agi ulih Yesus
11 Udah na Yesus ampus ka kota Nain duan murit-murit Ia. Urak barami-rami kajah nuna Ia. 12 Waktu Ia dah samaꞌk pintu nang aya tampat kluar-tama ka kota na, ada rombong urak nang nangkon urak mati, maba ia kluar. Urak nang mati na masih bujak, anaꞌk tungal, indo ia na dah janda. Banyaꞌk urak nang ampus namah indo ia. 13 Waktu Tuhan Yesus nele mbini nang dah janda na, Ia ngrasa mbada kasih, lalu Ia madah, “Usah nangis!” 14 Lalu Yesus nyamaꞌk tandu na, udah na Ia migak, langsong rombong urak nang nangkon urak mati na tadi branti. Yesus bakata, “O, mmuda, lumpat kau!” 15 Langsong mbujak nang dah mati na tadi lumpat, ia duduꞌk lalu ngomong. Udah na Yesus nyarah mbujak na ka indo ia.
16 Urak-urak nang ada ka sana mbada eran, lalu umpu-ia muji Allah. Ada nang bakata, “Nabi nang hebat dah dingutus ulih Allah ka tangah-tangah diri!” Nang lain agi bakata, “Allah dah datak nylamat umat Ia.”
17 Kabar tantang Yesus cacah ka sloroh Yudea wan daerah nang ada ka skitar na.
Yesus wan Yohanes Tukang mbaptis
18 Waktu Yohanes nangar kabar taꞌk murit-murit ia tantang ape nang dah dimuat ulih Yesus, 19 Yohanes nyaru dua urak murit ia. Lalu nyuruh umpu-ia ngaga Tuhan Yesus wan batanya, “Maꞌksanakah Raja nang nylamat bage nang dinjanyi ulih Allah, atau uraꞌkitu arus nunggu urak nang lain agi?”
20 Waktu urak nang badua ntadi dah batamu duan Yesus, umpu-ia bakata, “Yohanes tukang mbaptis nyuruh uraꞌkitu batanya ka Maꞌksana, Maꞌksanakah Raja nang nylamat bage nang dinjanyi ulih Allah, atau uraꞌkitu arus nunggu urak nang lain agi?”
21 Waktu nsana Yesus nyambuh banyaꞌk urak taꞌk sgala panyakit, Ia uga ngoser roh-roh balis taꞌk urak-urak nang balis nama, uga banyaꞌk urak nang buta bisa nele krana Yesus nyambuh umpu-ia. 22 Lalu Yesus nyaut, “Pulaklah ngkanaꞌk, padah ka Yohanes ape nang udah ngkanaꞌk nangar wan ngkanaꞌk nele surak: Urak buta bisa nele, urak nang angin bisa bajalat bisa bajalat, urak nang kana sakit kusta jaji baiꞌk, urak bangal bisa nangar, urak mati idup agi, bage sana uga kabar baiꞌk nang taꞌk Allah dinyampai ka urak nang kodo.a 23 Brontong urak nang angin ragu-ragu wan angin nulaꞌk Aku.”
24 Udah na murit nang dingutus Yohanes na pulak. Lalu Yesus bakata ka urak banyaꞌk, “Ngape ngkanaꞌk ampus ngaga Yohanes ka utat taya krasiꞌk? Tantu bukat daꞌk nele padak nang baguyu kana tampoh ulih nyaru. 25 Uga ngkanaꞌk bukat daꞌk nele urak bisi pakai nang cega wan idup mewah, krana urak nang bage sana cuma ada ka istana raja. 26 Jaji ontoꞌk ape ngkanaꞌk ampus ka sana? Tantu daꞌk nele nabi. Malah Aku madah ka ngkanaꞌk Yohanes ngan bukat skadar nabi biase. 27 Krana Yohanes nalah nang dimaksut ulih Kitab Suci jaman ndulu, waktu ada ayat nang dinulis bage pitu: Allah bakata ka Anaꞌk Ia,
‘Tele, Aku daꞌk ngutus urak ontoꞌk ndulu Kau,
ia daꞌk nyiap jalat ontoꞌk Kau.’ ”
28 “Aku bakata ka ngkanaꞌk, ‘Yohaneslah nang paling aya ka ntara taleno nang dinganaꞌk ka dunia ngintu, tape urak nang paling amuꞌk ka dalap krajaan Allah, labih aya taꞌk Yohanes.’ ”
29 Waktu urak-urak nangar kata-kata Yesus, smua urak tamasok tukang nagih pajak ngako kabanar taꞌk Allah, krana umpu-ia dah nyarah diri ontoꞌk dimbaptis ulih Yohanes. 30 Tape urak-urak Parisi wan guru-guru agama Yahudi nulaꞌk kamao Allah ka umpu-ia, waktu umpu-ia nulaꞌk dimbaptis ulih Yohanes.
31 Tantang urak nang nulaꞌk kamao Allah ntadi, Yesus bakata, “Duan ape urak-urak jaman kinintu bisa Aku nyama? Bage ape umpu-ia ngia? 32 Umpu-ia ngan bage mmuda nang duduꞌk ka pasar. Mmuda nang sarombong nnyanyi basaut-saut duan rombong mmuda nang lain bage pitu:
‘Uraꞌkitu niup soleng ontoꞌk ngkanaꞌk
tape ngkanaꞌk inga bajoget,
uraꞌkitu nnyanyi lagu urak mati ontoꞌk ngkanaꞌk,
tape ngkanaꞌk inga barai!’
33 Rati ia: Waktu Yohanes Tukang mbaptis datak, ia angin mapaꞌk roti wan angin nyocoꞌk ae anggor, tape ngkanaꞌk inga nrima ia lalu ngkanaꞌk bakata, ‘Ia balis nama.’ 34 Waktu Anaꞌk Taleno datak, Ia makat wan cocoꞌk, sama bage taleno nang lain, tape ngkanaꞌk inga nrima Ia uga, lalu ngkanaꞌk bakata, ‘Tele Ia ngan, rangka wan pamabuꞌk, bakawan duan tukang nagih pajak wan urak badosa.’ 35 Tape Kapande nang taꞌk Allahb banar-banar tabukti dalap idup urak nang nnurut Ia.”
Mbini nang badosa ngleleh Yesus duan minyaꞌk
36 Waktu na ada urak Parisi nang badama Simon ngundang Yesus makat ka rumah ia. Yesus datak lalu makat srakat duan ia. 37 Ka kota na ada mbini nang pagawe ia njaji placor. Waktu mbini na nangar kaloꞌk Yesus makat ka rumah urak Parisi na, ia datak maba botol batuc nang brisi minyaꞌk wangi. 38 Sambel nangis ia badiri ngadeꞌk tombok samaꞌk batis Yesus, lalu ia nangis sampai ae mata ia masah batis Yesus. Mbini na ngasat batis Yesus duan buu ia, udah na nyium batis Yesus, lalu ngleleh ia duan minyaꞌk wangi na. 39 Waktu urak Parisi nang ngundang Yesus nele kajadi na, ia bakata dalap ati ia, “Kaloꞌk Ia ntu nabi, pasti ia nao mbini nang ngleleh Ia duan minyaꞌk ntadi, ia na placor.”
40 Lalu Yesus bakata ka ia, “Simon ada nang daꞌk Ku padah ka kau.” Simon nyaut, “Padah nang!”
41 Lalu Yesus madah umpama bage pitu, “Ada dua urak nang brutak ka toke. Nang siko brutak lima ratus dinar,d nang lain lima puluh dinar. 42 Krana umpu-ia angin mampu mayar, jaji toke na ngapus utak umpu-ia badua.” Lalu Yesus batanya, “Kira-kira sape ka ntara umpu-ia badua na nang labih ngasih toke ia?”
43 Simon nyaut, “Kaloꞌk nnurut aku urak nang paling banyaꞌk dingapus utak ia.”
Kata Yesus ka Simon, “Banar ape kata kau na.” 44 Lalu sambel ngiloꞌk ka mbini na, Yesus bakata agi ka Simon, “Kau pasti udah nele ape nang mbini ngia muat. Aku tama ka rumah kau, angin kau mere ae ontoꞌk Aku masoꞌk batis, tape ia masah batis Aku duan ae mata ia, lalu ngasat duan buu ia. 45 Kau angin nyium Aku bage nang biase urak muat waktu nrima tmue, tape mbini ngia angin branti nyium batis Aku, mmole Aku datak tadi. 46 Kau angin ngleleh ulu Aku duan minyaꞌk, tape ia ngleleh batis Aku duan minyaꞌk wangi. 47 Krana na Aku bakata ka kau: Mbini ngia banyaꞌk babuat kasih krana dosa ia nang banyaꞌk dah dingampon. Tape urak nang iniꞌk dingampon, iniꞌk uga ia babuat kasih.”
48 Lalu Yesus bakata ka mbini na, “Dosa kau dah dingampon!”
49 Lalu urak-urak nang makat srakat duan Ia bapikir dalap ati, “Sape Ia ngia, takaꞌk brani-brani ngampon dosa urak?”
50 Tape Yesus bakata ka mbini na, “Krana kau pacaya ka Aku, kau dah dinylamat! Pulaklah kau duan ati nang tanang!”