Murit-murit Yesus matah tangke gandum waktu ari Sabat
6
1 Waktu na ari Sabat, Yesus bajalat duan murit-murit Ia namu kabon gandum. Sambel bajalat murit-murit Ia matah tangke gandum. Umpu-ia ngusuꞌk gandum na duan langan ia lalu dimapaꞌk. 2 Urak-urak Parisia nang nele umpu-ia na bakata, “Ngape ngkanaꞌk mlanggar ape nang dah dinantu ka dalap plator Musa, kaloꞌk ari Sabat angin bulih bagawe?”3 Lalu Yesus nyaut, “Ngkanaꞌk pasti udah mbaca ape nang dimuat ulih Daut, waktu ia wan anaꞌk buah ia lapar. 4 Daut tama ka dalap rumah Allah lalu nangkap roti nang udah dinyarah ka Tuhan. Ia mapaꞌk lalu magi ka anaꞌk buah ia, maka sasuai plator agama uraꞌkitu cuma imam agama Yahudi nang bulih mapaꞌk roti na.”
5 Yesus bakata agi ka umpu-ia, “Anaꞌk Talenob na Tuhan nang bakuasa nantu ape nang bulih dimuat ari Sabat.”
Yesus nyambuh urak ari Sabat
6 Waktu ari Sabat nang lain, Yesus tama ka rumah sambayang, lalu ngajar. Ka sana ada urak nang langan kanan ia mati. 7 Guru-guru agama wan urak-urak Parisi ngantam mrati Yesus, gali Yesus nyambuh urak waktu ari Sabat. Kaloꞌk Yesus babuat bage sana jaji ada alasan umpu-ia ontoꞌk nnyalah Yesus. 8 Tape Yesus ada nao ape nang ada ka dalap ati umpu-ia. Lalu Yesus bakata ka urak nang langan ia mati ntadi, “Kitu! Lumpat badiri ka adap urak banyaꞌk!” Lalu urak na langsong lumpat. 9 Lalu Yesus batanya ka urak banyaꞌk, “Nnurut plator agama Yahudi ape nang bulih diri-manaꞌk muat waktu ari Sabat? Babuat baiꞌk atau babuat jaat? Nylamat idup urak atau munuh ia?” 10 Udah na Yesus nele umpu-ia biabis, lalu bakata ka urak nang langan ia mati ntadi, “Solor langan kau!” Urak na nyolor langan ia, udah na ia langsong baiꞌk agi.
11 Tape guru-guru agama wan urak-urak Parisi na mbada manas, lalu umpu-ia bapakat ape nang umpu-ia daꞌk muat ka Yesus.
Yesus milih dua balas rasol
12 Udah na Yesus naeꞌk ka atas bukit ontoꞌk badoa. Samalam sontok Ia badoa ka Allah. 13 Waktu ari dah siak, Ia nyaru urak-urak nang malar nuna Ia, lalu Ia milih taꞌk ntara umpu-ia, dua balas urak nang dingutus ontoꞌk njaji rasol, 14 umpu-ia na: Simon nang dindama Petrus, wan adi ia Andreas, Yakobus wan Yohanes, Pilipus wan Bartolomius, 15 Matius wan Tomas, Yakobus anaꞌk Alpius, Simon nang dimadah urak kelompok selot,c 16 Yudas anaꞌk Yakobus, wan Yudas Iskariot nang nyual Yesus ka munsuh Ia.
Yesus ngajar wan nyambuh urak banyaꞌk
17 Yesus turut duan rasol-rasol na tadi, lalu branti ka utat nang rate koroh bukit. Ka sana bakumpur kobo urak nang suka nuna Ia wan urak-urak lain nang datak taꞌk sloroh Yudea, Yerusalem, uga daerah pantai Tirus wan Sidon. 18 Umpu-ia datak ontoꞌk nangar Yesus wan ontoꞌk disambuh taꞌk panyakit umpu-ia. Ada uga urak nang balis nama njaji sadar banar-banar. 19 Urak-urak nang brusaha migak Yesus njaji baiꞌk biabis, krana ada kuasa nang kluar taꞌk Yesus.
Tantang brontong wan claka
20 Udah na Yesus nele urak-urak nang nuna Ia lalu bakata:
“Brontong ngkanaꞌk nang kodo,
krana ngkanaꞌk nang ngumpu krajaan Allah.
21 Brontong ngkanaꞌk nang lapar waktu ntu,
krana Allah daꞌk muat ngkanaꞌk kanyang.
Brontong ngkanaꞌk nang nangis waktu ntu,
krana ngkanaꞌk daꞌk katawa.
22 Brontong ngkanaꞌk kaloꞌk ngkanaꞌk kana banci, kana tulaꞌk, kana hina wan kana njaat,
krana ngkanaꞌk nnurut ka Anaꞌk Taleno.
23 Kaloꞌk tajadi bage sana, ngkanaꞌk tatap bajoget rami-rami.
Krana ada upah nang aya dah dinyiap ka sruga. Krana nabi-nabi jaman ndulu dimuat bage sana uga.
24 Tape claka ngkanaꞌk nang kaya ka dunia waktu ntu,
krana kakaya ngkanaꞌk cuma muas ngkanaꞌk waktu ka dunia ntu nyan.
25 Claka ngkanaꞌk nang kanyang waktu ntu,
krana ngkanaꞌk daꞌk lapar!
Claka ngkanaꞌk nang katawa waktu ntu,
krana ngkanaꞌk daꞌk barai wan nangis.
26 Claka ngkanaꞌk kaloꞌk smua urak muji ngkanaꞌk,
krana bage sana uga ape puyak ngkanaꞌk muji nabi-nabi plasu jaman ndulu.”
Ngasih munsuh
27 Lalu Yesus bakata agi, “Ngkanaꞌk arus ngasih munsuh ngkanaꞌk, uga babuat baiꞌk ka urak nang banci ka ngkanaꞌk. 28 Ngkanaꞌk minta tuah ontoꞌk urak nang nyumpah ngkanaꞌk, badoa uga ontoꞌk urak nang jaat ka ngkanaꞌk. 29 Kaloꞌk urak nampar pimpi ngkanaꞌk nang sbala, bere uga nang sbala agi. Kaloꞌk baju ngkanaꞌk nang cega dirampas, bere uga baju nang biase. 30 Kaloꞌk ada urak nang minta barang ngkanaꞌk, bere ja ka ia. Kaloꞌk barang ngkanaꞌk dirampas, biar ja! 31 Ape nang ngkanaꞌk mao urak muat ka ngkanaꞌk, bage sana uga ngkanaꞌk muat ka urak.
32 Kaloꞌk ngkanaꞌk cuma ngasih urak nang ngasih ngkanaꞌk, ngkanaꞌk angin bisa dipadah baiꞌk. Krana urak-urak badosa uga ngasih urak-urak nang ngasih umpu-ia. 33 Uga kaloꞌk ngkanaꞌk cuma babuat baiꞌk ka urak nang baiꞌk ka ngkanaꞌk, ngkanaꞌk angin bisa dipadah baiꞌk. Krana urak-urak badosa uga babuat bage sana. 34 Kaloꞌk ngkanaꞌk mere pinjam duit ka urak, krana ngkanaꞌk ngarap daꞌk nrima duit na agi, ngkanaꞌk angin bisa dipadah baiꞌk. Urak-urak badosa uga mere pinjam ka urak-urak badosa nang lain, supaya masih ukat nang umpu-ia nrima. 35 Tape ngkanaꞌk arus ngasih munsuh ngkanaꞌk wan arus babuat baiꞌk ka ia, uga kaloꞌk ngkanaꞌk mere pinjam, usah ngarap ape-ape. Kaloꞌk babuat bage sana ada upah nang aya, uga ngkanaꞌk daꞌk njaji anaꞌk-anaꞌk Allah nang Mbada tingi, krana Ia baiꞌk ka urak-urak nang angin tau batrimakaseh uga ka urak-urak nang jaat. 36 Ngkanaꞌk arus baiꞌk ati, bage Ama ngkanaꞌk ka sruga nang baiꞌk ati.”
Usah gampang mutus kasalah urak
37 “Usah ngkanaꞌk jaji urak nang gampang mutus kasalah urak, supaya ngkanaꞌk angin kana panyalah ulih Tuhan. Usah ngkanaꞌk ngukum supaya ngkanaꞌk angin kana ukum; ngkanaꞌk arus ngampon urak supaya ngkanaꞌk dingampon. 38 Kaloꞌk ngkanaꞌk mere, ngkanaꞌk uga pasti kana bere. Krana Allah daꞌk mere ka ngkanaꞌk labih taꞌk sana. Bage baras ka dalap gantang nang dimantok sampai mlumpir, dingisi ka dalap payat. Bage nang ngkanaꞌk mere ka urak, bage sana uga Allah mulak ia ka ngkanaꞌk, malah labih taꞌk sana.”
39 Udah na Yesus madah umpama ka umpu-ia bage pitu, “Kaloꞌk urak buta ngirit urak buta, pasti umpu-ia badua labuh ka dalap lubak. 40 Angin murit nang labih pande taꞌk guru ia. Tape murit nang udah tamat balajar, ia sama bage guru ia.
41 Ngape ngkanaꞌk nele prupuh ka mata urak, maka balok ka mata ngkanaꞌk angin ngkanaꞌk nele? 42 Bage mane ngkanaꞌk bisa madah ka page ngkanaꞌk, ‘Kitu aku ngluar prupuh taꞌk mata kau,’ maka ngkanaꞌk angin nele ada balok ka dalap mata ngkanaꞌk surak! He, urak nang pura-pura alem, disiah dulu balok nang ada ka dalap mata kau, supaya kau banar-banar bisa nele, baro kau bisa nyiah prupuh ka mata urak.”
Batak kayu wan buah ia
43 “Batak kayu nang baiꞌk ngasel buah nang baiꞌk, bage sana uga batak kayu nang jaeꞌk ngasel buah nang jaeꞌk. 44 Krana taꞌk buah ia urak nao batak buah na. Bage sana uga urak angin ngetes buah ara taꞌk rompo unaꞌk, lalu urak angin ngetes buah anggor taꞌk taya unaꞌk.
45 Urak nang baiꞌk pasti bakata wan babuat nang baiꞌk, krana ka dalap ati ia banar-banar baiꞌk. Urak nang jaat pasti bakata wan babuat nang jaat, krana ati ia memang jaat. Krana ape nang dingucap taꞌk molot, na uga nang kluar taꞌk ati.”
Dua macam dasar
46 “Angin si rati ngkanaꞌk malar nyaru Aku ‘Tuhan, Tuhan,’ maka ngkanaꞌk angin muat ape nang Aku madah. 47 Tiap urak nang datak ka Aku, lalu ia nangar, uga muat ape nang Aku madah, urak nang bage sana bisa uga dinyama duan urak nang muat rumah.
48 Waktu ia muat rumah, ia ngali dalap-dalap lalu ia ngantaꞌk tiak ia sampai nyacah ampar. Pas waktu datak ae lato ngrajang rumah na, rumah na angin roboh krana dasar ia koat.
49 Urak nang nangar tape angin muat ape nang Aku madah, ia sama bage urak nang muat rumah langsong nglataꞌk ka atas tanah. Waktu ae lato ngrajang rumah na, rumah na abis ancur.”