Dileedakal 21

Kutagbɔmpɔŋu nì kitimpɔŋ

1 Boonee ní m ká kutagbɔmpɔŋu nì kitimpɔŋ. Kutagbɔŋkpikuu nì kitiŋkpikii wáŋkì ní tiŋku kaa ti bí. 2 Ní m ká circir tiŋki Jeerusaleempɔɔn nyánní Unimbɔti cee yilpu ki kpákatìń ki ŋān̄ kii unimpucaan di fùl̄ nnyim ki cí u-calee. 3 Ní m gbìl̄ nneen ŋubɔ nyánní dibeejal cee ki téeń mpɔn yii: «Kɔŋkɔnnee Unimbɔti ŋá u-kɔŋkooŋŋu binib cee. U nì bi di làá nīn kíǹ ki kóò, ní bí nīn sá u-nibul, ní úǹ ń nīn sá bi-Nimbɔtiu un làá nīn bí bi-ceeyee. 4 Úǹ di làá dāá pítí bi-nyinnyim kɔkɔ, ŋkúm dāa gíti kpá, dinimbinaamandi nì ibiil nì iyaliŋki dāa gíti kpá, kun puee duulinyakpiki kpáaǹ tíǹ kɔkɔ ki jítì^a.»

5 Ní un kā dibeejal puee bí yii: «Kpèèmaan, m fātìi ŋá tiwan kɔkɔ mpɔm,» ní ki bí-mi yii: «Á ŋmà-tì, kun puee tibɔti gbanti sá mbaamɔn ní ki máaǹ bí fōō-tì.»

6 Ní u gíti bí-mi yii: «An kɔkɔ bɔ́ntì ki dóò! Man di sá Alfa nì Oomeega, ukílkaa nì ukúntikaa. Un ní nnyinnyoo yaa cááyee ń dāan̄ m-cee, m làá tīī-u nnyim min nyēeń dimaŋfal nyimbuliŋunee faalaa. 7 Un yaa jáń ki jíńee ní m làá tīī tiwammɔntiil gbanti, ní ki dāa sá u-Nimbɔtiu, ní úǹ dāa sá man biki^b. 8 Ama an yaa kíǹ bifaantidambee nì bin kaa yú nì Unimbɔti deedeeyee, nì bijɔkɔndambee, nì binikpɔliibee, nì bin ŋáań tilaakpaalee, nì bikpaŋkpantiibee nì biwaatootiliibee nì binyimɔndambee kɔkɔee, bíǹ laŋki di sá farwata ŋmibookun, niin di sá ŋkúnliliitiimee.»

Jeerusaleempɔɔn

9 Ní ituun iluli ijoolkaa in bàà ŋúb́ nsambiyaamu falaabi gbí poonee kansikin ŋubɔ dɔ́miń ki bí-mi yii: «Dāan̄ ḿ dàkà-si unimpucaan, Dipibil nimpuu.»

10 Ní Unimbɔti Fam dɔ́miń m-ni, ní ntuun yōoǹ-mi ki jɔ́m̀ dijoofɔkɔl^c diba pu, ní ki dàkā-mi Jeerusaleem circir tiŋki kin nyánní Unimbɔti cee ki sìntīńee. 11 Kì nìn jìlìń Unimbɔti nyaaŋku ní. Kitiŋee jìl̀ kii ataŋkpanyaanee, a lì kii ataŋkpee ŋin jɔ̀m̀ pɔ́lpɔl ki wāĺ kílkilee. 12 Ní digundi din bi máń ki māntì ki tú kitiŋee gbìfì ki fɔ̀kɔ̀ mun, ní ki cáá mpunyɔmu saalaa nì muli, ní ituun saalaa nì ili yú mpunyɔmu pu ki cí, ní bi ŋmàn̄ Isirayeel yab naakɔti saalaa nì tilee yiŋŋi ki nákáǹ mpunyɔmuee pu. 13 Ní mpunyɔmu muta túĺ ŋwìiń nyalaŋki pú, ní muta túĺ ŋwìiń jeetilaŋki pú, ní muta túĺ ŋgan pú, ní muta túĺ ŋgiil pú^d. 14 Ataŋkpee saalaa nì ali pu ní bi nìn máń kitiŋee gundi ki tɔ́kɔ́ǹ, ní ki ŋmàn̄ Dipibil kpambaliŋ saalaa nì alee yiŋŋi ataŋkpeeyee pu.

15 Ní ntuun ŋun yú ki sòoǹ nì mee ŋúb́ tiwaŋŋmantikaal, sindaariya kaluuku, kí ŋmàntī kitiŋee nì ki-punyɔmmu nì ki-guŋŋi^e. 16 Kitiŋee púuŋŋu nì ki-waaŋŋu ŋmà ní. Ntuunee dū sindaariya kaluukuee ki ŋmāntì kitiŋee púuŋŋu, ní ki ká ataŋkpee kutukub bili nì kulaafaau, míǹ ní ki-waaŋŋu nì ki-fɔkɔŋŋu mun nìn sá. 17 Ní ŋu ŋmāntì digundi mun ní ki ká di-gbifiŋŋu meetab imuŋku ita nì biŋmoo, kii binib nín pée ŋmàntī puee ní ŋu ŋmāntì. 18 Ataŋkpee ŋin jɔ̀m̀ pɔ́lpɔlee ní bi dū ki máń digundi, ní kitiŋ ki-ba kɔkɔ sá sindaariyamɔnti ki wāĺ kílkil kii digitilee. 19 Ataŋkpee ŋin bi dūu kíĺ taapu ki nín máń digundee ki tɔ́kɔ́ǹee puee, bi dū ataŋkpanyaan ŋin bí tɔbinee ní ki nákáǹ. Bi nìn dū ataŋkpee saalaa nì ali ní ki kíĺ taapu. Ntantukupeekaa taŋkpeeŋi ní bi yíì yii jaaspi, ní ki yíì dililiitiil yii safiir, ní ki yíì ditataatiil yii kalseeduwana, ní ki yíì dinanaatiil yii eemeeroodi, 20 ní ki yíì diŋmooŋmootiil yii saarduwaan, ní ki yíì diluluutiil yii kɔɔrnaliini, ní ki yíì diluluútiil yii kriistooliiti, ní ki yíì dininiitiil yii beeriil, ní ki yíì diwawaatiil yii toopaasi, ní ki yíì disaalaatiil yii kriisooprasi, ní ki yíì saalaa nì dipeepeekaal yii iyasinti, ní ki yíì dijoolkaalee yii ameetiisti. 21 Mpunyɔmu saalaa nì mulee sá ataŋkpanyaan ní. Kipunyɔkɔ kamaa nì ditaŋkpapiiŋkaal dimɔndi. Ní kitiŋ ki-ba daŋŋi sá sindaariyamɔnti ki wāĺ kílkil kii digitilee^f.

22 Ama maa ká kunimbɔtidii kitiŋ gbanti poon, kun puee ti-Dindaan Unimbɔti Mpɔŋkɔdaan nì Dipibil di sá kunimbɔtidii. 23 Kitiŋ gbanti kaa nyàab̀ ŋwìiń nì uŋmal ń ŋmíntí-kì i-walfiŋu, Unimbɔti nyooti di dāa sá-kì ŋwalifi, ní Dipibil dāa sá ki-fitilau. 24 Atimbun kɔkɔ dāa còom̄ ki-walifiŋun ní, ní duulinya bɔtiibi ń dāá cáań bi-gaajati niin. 25 Mpunyɔmu dāa pée wāā ní ŋwiimpu, baa pìintí, kun puee kunyeeu dāa kpá niin. 26 Bi dāa cāabìń atimbun jilmau nì ŋi-nyooti niin. 27 Ikpiti iba kaa dāa kóò niin, nì bitiŋwiiliibi nì binyimɔndambi, see bin baba yiŋŋi bi ŋmàn̄ Dipibil gbɔŋku kun sá dimaŋfal gbɔŋkuee nee^g.