Dileedakal 22

1 Ní ntuun dàkā-mi mbun ŋun pùub̀ nnyim min tìì dimaŋfalee. Nnyim gbanti wāĺ ní kílkil ní ki jìl̀ pàlpal, ní ki nyēeń Unimbɔti nì Dipibil beejal laŋki^a. 2 Mì pùub̀ kitiŋ kansikin didandi pu. Ní dimaŋfal subu yú abuŋgbán liitil pu ki lòoǹ dibindi poonee saalaa nì mili, an dàkà yii uŋmal kamaa poonee bu lòoǹ diba. Bu-faati di cāantí atimbun weeŋyi. 3 Mbusu dāa gíti kpá^b.

Unimbɔti nì Dipibil beejal làá dāá nīn bí kitiŋ poon ní, ní u-tɔntɔnliibi ń nīn nyɔ́ŋkí-u. 4 Bi làá dāá wāl̀ u-nimbiin, ní bi dāa ŋmà u-yindi bi-yigbeeŋi pu. 5 Kunyeeu kaa dāa gíti bí. Ubɔ kaa dāa gíti nyàab̀ fitila kí tūū án nīn wāĺ-u, kaa dāa gíti nyàab̀ ŋwìiń ń nyā bí nīn wāĺ, kun puee ti-Dindaan Unimbɔti di dāa sá-bi ŋwalifi, ní bí dāá nīn bí ki jīǹ dibeel kí nīn pée cáa cá jaanjaan^c.

Yeesu dāantam

6 Ní ntuunee bí-mi yii: «Tibɔti nee sá ibaamɔn ní, ki máaǹ bí fōō-tì. Ní ti-Dindaan Unimbɔti un tìì u-Fam u-bɔnaatiliibee túnní u-tuuŋŋu ń dāá dàkà u-tɔntɔnliibi tin làá bàń kɔŋkɔnneeyee.»

7 Ní Yeesu bí yii: «Pīlifì! M làá dāan̄ kɔŋkɔnnee. Un ŋúb́ tibɔti tin m sòon̄ bi ŋmàn̄ an kā kugbɔŋu nee poonee bí mmɔnni.»

8 Man Yoowaneesi di gbìl̄ an bɔtee kɔkɔ ki wál̀-tì mun. M nín gbìl̄ ki wál̀-tì mimmee ní m lítì dicincibil ntuun ŋun dàkā-mi tibɔti gbanti kɔkɔ taapuee nimbiin kí jāam̀-ŋu. 9 Ní ŋu bí-mi yii: «Taa ŋée, kun puee ma mun sá utɔntɔnli kii sisee ní, kii a-nabiyaamu mun nàatī Unimbɔti bɔtee, nì bin kɔkɔ tɔ́ tibɔti tin bi ŋmàn̄ kugbɔŋu nee poonee ní. Unimbɔti ní an sá á jāam̀.»

10 Ní u bí-mi yii: «Á taa báĺ tibɔti tin bi nyántì ki dàkā-si tì kā kugbɔŋu nee poonee, kun puee ŋyunti ŋun an bɔtee kɔkɔ làá bàńee tóobiń. 11 Unikpiti ń mɔ̀tīí nīn ŋáań u-kpitii, ujɔkɔndaan ń mɔ̀tīí nīn ŋáań u-jɔkɔnti, deedeedaan ń mɔ̀tīí nīn ŋáań deedee tuuŋŋi, ní circirdaan ń mɔ̀tīí nīn bí circir^d.»

12 Ní Yeesu bí-mi yii: «Pīlifì! M làá dāan̄ kɔŋkɔnnee kí nīn ŋúbiń tipaal, kí pà báà ŋma u-tundi nín sá puee. 13 Man di sá Alfa nì Oomeega, an dàkà yii upeepeekaa nì ujoolkaa, ukílkaa nì ukúntikaa^e.»

14 Bin fíntí bi-bɔkutiŋ ŋaa cáá tijɔkɔndi, ki máaǹ kí ŋmɔ́ dimaŋfal subil^f, ki làá dī mpunyɔmu kí kɔ́ kitiŋinee bí mmɔnneeee! 15 Ní bijɔkɔndambi nì bikpaŋkpantiibi nì bin ŋáań tilaakpaalee nì binikpɔliibi nì biwaatootiliibi nì binyimɔndambee dāa yú kitiŋ kpaanceetiŋu.

16 «Man Yeesu di túnní m-tuuŋŋu ŋú sòoǹ an bɔti m-nikitiŋ kansikin kí tùkù-ni. M sá Daafiidi naakookun ní, ki sá utaafaaŋmalbija un jìl̀ee^g.»

17 Unimbɔti Fam nì Unimpucaan bí yii: «Dāan̄!»

Bin mun gbìl̄ an bɔtee ń lì yii: «Dāan̄!»

Un nnyinnyoo yaa cááyee ń dāan̄ kí fōō nnyim min tìì dimaŋfalee faalaa^h.

Tibɔjoolkaal

18 Man Yoowaneesi di kpáafí bin kɔkɔ gbìl̄ tibɔti tin Unimbɔti sòon̄ an kā kugbɔŋu nee poonee yii: Un yaa gbéeǹ tibɔti nee poon tibee, Unimbɔti làá dāá gbéeǹ udaan ditafadaaldi din u ŋmàn̄ ki ŋá kugbɔŋu nee poonee. 19 Un yaa tí bātì tibɔti gbanti poon tiba ki fée, Unimbɔti làá dāá fōō u-jandi din u cáá disubil din tìì dimaŋfalee poonee, ú taa kɔ́ circir tiŋki kin bɔti bi ŋmàn̄ kugbɔŋu nee pooneeⁱ.

20 Úǹ Yeesu un bí ki sòoǹ nì ti an bɔtee di lī yii:

«Iiin! M làá dāan̄ kɔŋkɔnnee.» Án lafun ŋá míǹ! Dāan̄, ti-Dindaan Yeesu^j!

21 Ti-Dindaan Yeesu ŋanti ń nīn bí ni-pu!