Dileedakal 20

Abin kutuku Beel

1 Boonee ní m ká ntuun ŋubɔ nyánní yilpu ki ŋúbiń mbookpaan saafiiu nì ikusaka iba i nyìm̀ na! 2 Ní ntuunee cúú kupeebiliŋŋu ukookpikee, an dàkà yii Sitaan, ki dū ikusakee ki bóob́-u ú nīn bí míǹ kí nīn cí abin kutuku. 3 Ŋu téé-u ki tɔ́ mbookpaanee ni ní ki pīiǹ ki kpàl̄ ki ŋéeb́, án nín làá ŋá pu ú taa ti kīil̀ atimbun nib kí tin cáá sāā abin kutukuee. Boonee bi làá fàtīí gíiǹ-u kí líí ŋyunti ŋubɔ poon fiii.

4 Ní m ká abeejal aba^a, ní bi tīī bin kā ŋi-puee mpɔn bí nīn sá bibɔsoonliibi, ní m gíti ká bin nìn sòoǹ Unimbɔti bɔti ki lèekī Yeesu pu seera bi kūū-bee nammu, nì bin kaa nìn gbāaǹ ki jáam̀ upeelee nì u-naŋkuee, kaa yāntì bi dáań bi-yigbeeŋi nì bi-ŋaliiyee, bi-kɔkɔ fātìi fīkitì bi nì Kriisitoo kāl̀ dibeel abin kutuku. 5 Bitaŋkpiibi bin kíǹee kaa làá fìkitī, see abin kutukuee yaa láa jítì, difìkitipeekaal bɔti dee. 6 Bin yaa láa bí difìkitipeekaal poonee bí mmɔnni nì circir poon. Ŋkúnliliitiim kaa dāa gíti cáá bíǹ pu mpɔn. Bíǹ di dāa sá Unimbɔti nì Kriisitoo saraaŋaliibi, ní bi nì Kriisitoo ń kàl̄ u-beelin abin kutuku.

Dijajikuntikaal

7 Abin kutukuee yaa láa jítèe, bi làá dāá gíiǹ Sitaan kí líí, ú nyā sarkan. 8 U yaa nyáńee, u làá dāá nīn yìiǹ ki mɔ́ntí duulinya jannaatiliŋ timbuliŋ, an dàkà yii Gɔɔgi nì Maagoogi, kí kpāfì-bi bí bɔ́ntí kujaau. Bi làá dāá nīn wīikí tikpil kii tiŋku gbandi bulee ní. 9 Bi làá dāá kpátí kí gbí kitiŋ kɔkɔ, ní kí dāá léeń Unimbɔti nibul nì kitiŋ kin u néeńee pu, ama ŋŋmi ŋubɔ làá nyānní yilpu kí dāá wà bi-kɔkɔ. 10 Ní bí dāá téé Sitaan un kíiĺ-bee kí tɔ̄ farwata^b nì ŋŋmi bookun, laakin upeelee nì u-nyimɔmbɔnaatiliu bée. Niin ní bi làá nīn bí falaa poon ki yáliŋkíǹ bi-ba ŋwiimpu nì kunyeeu kí nīn pée cáa cá jaanjaan.

Ibɔsoonjoolkaa

11 Boonee ní m ká dibeejapindi dikpaandi diba, ní kitiŋ nì kutagbɔŋu sáǹ un kā dibeejapindi gbanti puee nimbiin, baa ti ká-bi. 12 Ní m ká bitaŋkpiibi, bikpaambi nì biwaabi yú dibeejalee nimbiin, ní bi cúú tigbɔn ki kpátì, ní ki gíti cúú kugbɔŋu kubɔ mun ki kpátì, kúǹ di sá dimaŋfal gbɔŋku. Ní bi sòon̄ bitaŋkpiibi bɔti ki táá nì bi nín túń atuun ŋin bi ŋmàn̄ ki ŋá kugbɔŋu poonee^c. 13 Ní tiŋku gíiǹní binib bin u nìn yōoǹee, ní ŋkúm nì ditaŋkpiil gíiǹní bitaŋkpiibi bin kɔkɔ bi ŋúb́ee, ní bi sòon̄ báà ŋma bɔti tin u ŋée. 14 Ní bi téé ŋkúm nì ditaŋkpiil ki tɔ́ ŋŋmi bookun, ŋŋmi booku gbanti di sá ŋkúnliliitiimee. 15 Un kamaa yindi ní baa ká dimaŋfal gbɔŋku poonee, bi dù-u kí tɔ̄ ŋŋmi bookun ní.