Dileedakal 19

1 Boonee ní m gbìl̄ yilpu an bí kii kunipaau neenee, ki lī mpɔn yii: «Aleeluya! Ti-Nimbɔtiu di yì difiil nì tinyool nì mpɔn. 2 U-bɔsòontam sá mbaamɔn ní ki bí deedee. Di sá yii u sòon̄ ki kūū kinimpulaakpaai bɔti kì nín dū ki-laakpaati ki tīntì kitiŋ pu kɔkɔ nib ki yāntì bi kpántì bikpitibee, ní ki dáaĺ ki-tafal ki tɔ̀n̄-kì ipɔntoon kì nín kūū u-tɔntɔnliibi puee.» 3 Ní ki gíti bí yii: «Aleeluya! Kun puee kitiŋ gbanti làá nīn pée wù ŋŋmi ní ki-ŋminyiim ń nīn yíkí míǹ kí nīn cá jaanjaan.» 4 Ní bikpilib mmuŋku nì binaayee, nì tiwan tinaa tin cáá kufoouee, lítì Unimbɔti un kā dibeejal puee nimbiin ní ki bí yii: «Ameeni! Aleeluya!»

Dipibil nimpucaŋgbiiliŋ

5 Ní nneen ŋubɔ nyánní dibeejal cee ki lī yii: «Nimbi bin kɔkɔ sá Unimbɔti tɔntɔnliibee, nyɔ̄ŋkìmaan-u! Bikpaambi nì mbiyaamu, bin kɔkɔ fàŋkí-uee, nyɔ̄ŋkìmaan-u!» 6 Ní m gbìl̄ an bí kii binib kupaau di sòon̄ee, ní ki bí kii dimɔɔl nyim nín sìtī nsitimin puee, ní ki gíti bí kii utaa nín tátí mpɔn puee ki lì yii: «Aleeluya! Ti-Dindaan Unimbɔti Mpɔŋkɔdaan di sá ubɔti ki kā dibeel pu^a. 7 Tí nīn fàal̀maan án nīn mɔ̄ǹ-ti tí nīn nyɔ́ŋkí Unimbɔti, kun puee Dipibil nimpucáatam bāań, u-bɔɔn bɔ́ntì ki dóò. 8 Unimbɔti tīī-u dibɔkutipindi káŋkaŋ din jìl̀ee ú pèen̄.» (Dibɔkutipindee di sá deedee tuuŋŋi ŋin bi nóó Unimbɔti deedeeyee túnnée.)

9 Ní Unimbɔti tuuŋŋu bí yii ḿ ŋmà yii: «Bin bi yíiń bí dāá jī Dipibil nimpucáatam jintee bí mmɔnneeee^b!» Ní ki gíti kútì yii: «Unimbɔti u-ba di lī míǹ.» 10 U lī mimmee ní m gbāaǹ kí jāam̀-u, ní u bí-mi yii: «Taa ŋée! Man mun pée sá utɔntɔnli kii si nì a-nabiyaamu mun bí ki sòoǹ Yeesu bɔti tin u nyántì ki dàkā-nee ní. Unimbɔti ní a máaǹ kí jāam̀.»

Kun puee Unimbɔti Fam nín yāntì Unimbɔti bɔnaatiliibi sòon̄ tiŋyee sòoǹ Yeesu pu ní.

Utanjakal un kā utampiin puee

11 Niinee ní m ká yilpu pīitì, ní utampiin ubɔ nyánní, ní unil ubɔ kā u-pu, bi yíì udaan yii Deedee nì Mbaamɔn, u sòoǹ tibɔti deedee ki jáà kujaau nì deedee^c. 12 U-nimbiliŋ ŋmóò làka laka kii ŋŋmee, ní u cíkí mbeefuulimu tikpil u-yil pu. Diyindi diba náká u-pu, báà ubɔ kaa nyí-dì, see úǹ baba. 13 Ní u-bɔkutil din u pēēyee táká fatiku, ní bi yíì-u yii: «Unimbɔti nyɔɔbundi.» 14 Ní yilpu janjaliibi nóó-u ki kā itampiin pu ki pēē abɔkutimɔnti apiin káŋkaŋ. 15 U-nyɔkɔnee kitàataajiki kā ki jītí. An ní u làá dūú jáǹ atimbun. Mpɔn ŋun u làá dāá nīn cáa kpòotī-bee dāa pɔ̄ɔ̄ kii tikútee ní, ní Unimbɔti Mpɔŋkɔdaan nín díkí bi-pu diŋuul diŋyee puee, u làá dāá nà-bi dúsi dusi kii bi nín nà asubil pu ki ŋáań ndaamee ní^d. 16 Bi ŋmàn̄ diyindi diba u-bɔkutil nì u-tapandi pu yii: «Bibɔtiibi kɔkɔ Bɔtiu, bidindambi kɔkɔ Dindaan.»

17 Ní m ká Unimbɔti tuuŋŋu ŋubɔ yú ŋwìiń poon, ní ŋu téeń mpɔn ki tùkū inoon in kɔkɔ ŋàaǹ kutaa puee yii: «Dāá kpāfìmaan kí jī Unimbɔti jiŋaakpaaŋwu! 18 Ní dāan̄ kí jī bibɔtiibi nì bisoojakpilib nì bipɔndambi wunnanti nì itaamu nì bin kā-iee wunnanti, nì binib kɔkɔ wunnanti, bin yì bi-bee nì iyumbu, binikpaambi nì biwaabi^e.»

19 Niinee ní m ká upeelee nì duulinya bɔtiibi nì bi-soojab kpáfì kí jáǹ un kā utaamu puee nì u-janjaliibi. 20 Ní un kā utaamu puee nì u-janjaliibi cúú upeelee nì u-nyimɔmbɔnaatiliu un nìn ŋáań maamaacib upeelee nimbiin ki kíiĺ binib bin kɔkɔ bi nìn dáań upeelee daaŋku bi gbàantí ki jáaḿ upeelee naŋkuee. Ní bi dū bi-liitil nì bi-nimbiliŋ ki tɔ́ farwata^f ŋmibookun. 21 Ní kitàataajiki kin nyēē un kā utampiinee nyɔkɔnee kūū bin kíǹee kɔkɔ, ní inoon dɔ́miń ki jíń bi-nanti ki bál̀.