Ntuun nì kigbambiki bɔti
10
1 Boonee ní m ká ntuun ŋubɔ ŋun cáá mpɔnee nyánní yilpu ki kpákatiń, ní ditagbandi bīī ŋu-pu ní dikuntinyindi māntì ki tú ŋu-yil, ní ŋu-nimbiin jìliŋkī kii ŋwìińee, ní ŋu-taaŋi bí kii ŋŋmipiinee, 2 ní ŋu ŋúb́ kigbambiki kiba, kì kpátì ki kā ŋu-ŋaan. U nìn dū u-ŋaŋgiitaal ki tɔ́kɔ́ǹ tiŋku pu, ní ki dū u-ŋaŋgantaal ki tɔ́kɔ́ǹ kitiŋ pu. 3 Ní ŋu téeń mpɔn a lì kii gbikinti di súń ní. Niinee ní itaatantati iluli bíi tátí. 4 Ŋyunti ŋun m bàà là kí ŋmà itaatantatee nín sòon̄ puee ní m gbìl̄ nneen ŋubɔ sòon̄ní yilpu yii: «Á dū itaatantati ilulee bɔti kí dūú kpāafì, á taa dūú ŋmà.»5 Ní ntuun ŋun m bàà ká ŋu-taal diba tɔ́kɔ́ tiŋku pu, din kíǹee kitiŋ puee, yōoǹ ŋu-ŋaŋgiil ki túĺ kutaa, 6 ní ki pūtì un bí kí nīn cá jaanjaan ki náań yilpu nì tin kɔkɔ bí yilpuee, ki náań kitiŋ nì tin kɔkɔ bí kitiŋ puee, ki náań tiŋku nì tin kɔkɔ bí tiŋkunee yii: «Unimbɔti kaa làá ti yóoń ŋyunti ŋubɔ! 7 Ŋyunti ŋun ní ntuun nluluútee làá dāá búń dikantándee, ŋyunti gbantee ní tin nìn bí dibalin Unimbɔti yāntì u-tɔntɔnliibi bin sá u-bɔnaatiliibee sòon̄ee làá ŋáa.»
8 Ní nneen ŋun bàà nyánní yilpu ki sòon̄ nì mee gíti bí-mi yii: «Cù ntuun ŋun yú ŋu-taal diba tɔ́kɔ́ tiŋku pu, din kíǹee tɔ́kɔ́ kitiŋ puee cee kí fōō kigbambiki kin kpátì ki kā ŋu-ŋaanee.»
9 Ní m cūtì ntuunee cee ki mēē-ŋu ŋú dū kigbambikee kí tīī-mi. Ní ŋu bí-mi yii: «Fōō kí dūú ŋmɔ́, kì làá nīn mɔ̄ a-nyɔkɔn kii tisiilee ní, ama ní kí tin nín̄ tū a-poonb.»
10 Ní m fōō kigbambikee ntuun cee ki dūu ŋmɔ́. M nín bíi ŋmóòyee, an mɔ̄ m-nyɔkɔn kii tisiilee ní, ama m nín dūu náĺee ní an túŋkì m-poon.
11 Ní ŋu bí-mi yii: «An sá á gíti sòoǹ tin bí ki dòońee kí tùkù binib tikpil, nì atimbun nì isoon kɔkɔ nib nì bibɔtiibi ní.»