Dileedakal 9

1 Ní ntuun ŋŋmooŋmootee búń ŋu-kantándi, ní m ká uŋmalbija ubɔ nyánní yilpu ki lítì kitiŋ ní bi dū mbookpaan saafiiu ki tīī-u. 2 Ní u cúú mbookpaanee ki pīitì, ní ŋŋminyiim nyēeń poon tikpil tikpil a lì kii kipaai kikpaŋkpaaŋŋinee^a, ní ki dūu bīiǹ ŋwìiń pu ki kpáaǹ kubuŋu mun pu. 3 Ní inaakitoon nyánní ŋŋminyiimee poon ki kpátìi gbí kitiŋ pu, ní Unimbɔti tīī-i mpɔn í nīn júntí binib án nīn wàlifī kii inoomee^b. 4 U nìn tùkū-i yii í taa jú kumoou, kí taa jú nsuwaamu, kí taa jú isukpaan, ama í nīn pée júntí binib bin kaa cáá Unimbɔti daaŋku bi-yigbeeŋi puee, 5 ní ki bí-i yii í taa nín̄ júntí ki kù binib, ama í nīn júntí-bi bi yáliŋkí áli iŋmal iŋmoo. I-looti weeŋyi sá kii unoom yaa jú unil an nín wù u yáliŋkí puee ní. 6 Iwiin gbantee, binib dāa nyàab̀ ŋkúm ń dāá kpɔ̀-bi, ama baa làá dāá ká-mì. Ŋkúm ní bi dāa néeń, ama ní ŋkúm ń dāá sāǹ kí wàatī-bi^c.

7 Inaakitoonee bimbim náań nì kii itaamu in bi bɔ́ntì i cá kujaauee ní, ní i cáá tiba i-yiliŋ pu an náań nì sindaariya beefuuliiki, ní i-nimbiin náań nì binib nimbiin, 8 ní i-yikpiti fɔ̀kɔ̀ kii binimpoobi yikpitee ní i-nyiŋŋi náań nì gbikinti nyiŋŋi. 9 Ní i cáá ajanjabɔkuti i-biŋŋi pu an náań nì tikúti. I yaa ŋàaǹee, i-feeŋyi bintindi bí kii itaamu kupaau nín dátí tɔrɔkub ki sáń ki jáà kujaau puee bintindi ní^d. 10 I-juuŋi nì i-looti bí kii inoomee ní i cáa júntí binib kí tin cáá sāā iŋmal iŋmoo. 11 Inaakitoon gbanti bɔtiu di sá ntuun ŋun kā kubookpaaŋŋun bi yíì-ŋu eebru sooŋyin yii «Abadɔn», ní greeki sooŋyin yii «Apooliyɔn», an taapu sá yii «Un nàantée».

12 Mbusupeepeekaa dɔ́miń ki ŋá ki jítì, an kíǹ mbusub bili mun ń dāan̄ dee.

13 Ní ntuun nluluuti búń ŋu-kantándi, ní m gbìl̄ nneen ŋubɔ nyánní iyin inaa in nìn cɔ́ sindaariya saraafaŋŋu ŋun yú Unimbɔti nimbiinee ni. 14 Ní nneenee lī ntuun nluluuti ŋun ŋúb́ dikantándee yii: «Cùú gbìntī ituun inaa in bi bóob́ i kā dimɔɔl din bi yíì Eefiraatee kí líí.» 15 Ní bi gíiǹ ituun inaa in bɔ́ntì ki cí i-kúluku nì i-wiiŋŋu nì i-ŋmaliu nì i-bindi din bi làá líí-i í lēē duulinya poon binib yaa yākatì mitee diba pu kí kpɔ̀ee ki líì ŋyunti ŋun bi yóoǹee deedee. 16 Ní m gbìl̄ bi lī yii i-soojab bin kā itaamu puee sá miiliyɔmbi kulaafaau ní. 17 M nín ká i-soojab bin kā itaamu puee nín bí puee sèé: bi-janjabɔkutiŋ máǹ kii ŋŋmee, ní iba yaŋ jìl̀ kii ataŋkpamɔnti ŋin bi yíì iyasintee, ní iba yaŋ bɔ̀ǹ kii kunaaluŋuee, ní iba yaŋ bí kii kpalkuee. Itaamu yiliŋ bí kii gbikinti yilee, ní ŋŋmi nì nnyiim nì farwata nyēē i-nyɔmmun. 18 Ŋŋmi nì nnyiim nì farwata un nyēē i-nyɔmmunee di sá ditafadaaldi din bi dūu kūū duulinya nib yaa yākatì mitee dijandi dibee. 19 Di sá itaamuee pɔŋŋu kā i-nyɔmmun nì i-juuŋin ní, ní i-juuŋi náań nì ikoobu, ní i cáá ayil. An ní i cáa ŋáań binib asaluu.

20 Binib bin kíǹ, ditafadaaldee kaa kūūyee, baa dū bíǹ bi-ba nín ŋá tiŋyee ki fá, bi gbíntì ki jáaḿ arasiniibi nì awaa ŋin bi dū sindaariya nì animbil kúti nì tasa kúti ki mɔ́ɔ́yee, awaa ŋin sá ataŋkpee nì isufee. Tiwan gbanti kaa wāĺ, kaa gbìl̄, kaa ŋūǹ kí còom̀ mun^e. 21 Baa dū bi-nikpaakooŋu, nì bi-nyɔɔjil, nì bi-laakpaati nì bi-naayufii ki fá.