Dileedakal 8

Tiwampiiŋkaal kululuútiiu

1 Dipibil bútì tiwampiiŋkaal kululuútiiuee, ní yilpu ŋmíl̀ fɔ́ŋfɔŋ díkí diki ki tin cáa sāā kukúluu dijandi pu. 2 Ní m ká ituun iluli in yú Unimbɔti nimbiinee, ní bi tīī-i akantán aluli.

3 Ní ntuun ŋubɔ mun dɔ́miń ki yúl̀ nsaraafan cee ki ŋúb́ sindaariya sambiki kin poon bi ŋáań talaalu ki tùutēe. Ní bi tīī-ŋu talaalu tikpil yii ŋú tūū kí kpáaǹ Unimbɔti nib wimmeem kí ŋá saraa kí tīī Unimbɔti, sindaariya saraafaŋŋu ŋun yú dibeejal nimbiinee pu^a. 4 Ní talaalu un ntuunee tūūyee nyiim yíkí ŋu-ŋaan ki jɔ́ḿ Unimbɔti cee ki kpáaǹ Unimbɔti nib wimmeem. 5 Ní ntuunee yōoǹ kisambiki kin poon bi ŋáań talaalu ki tùutēe ní ki pātì ŋŋmi nsaraafan pu ki gbéeǹ ki-poon, ní ki dūu lúkuń duulinyan. Niinee ní m gbìl̄ dibintiŋkpaandi nì ataadun pu, ki ká an bíi ŋmóò kii utaayee ní kitiŋ cīŋkì^b.

Akantán bɔti

6 Ní ituun iluli in ŋúb́ akantánee bɔ́ntì kí búń i-kantáŋŋi^c.

7 Ntuun mpeepeekaa búń ŋu-kantándi ní ataanyiŋkumbil nì ŋŋmi ŋmàl̄ fatiku ki nyánní yilpu ki lítí kitiŋ, ní kitiŋ nín dɔ̄ ki wīikí puee yaa yākatì mitee dijandi lēē ki wùn̄, ní isufi nì timool nín dɔ̄ ki wīikí puee yaa yākatì mitee, an lēē dijandi ki wùn̄^d.

8 Ní ntuun nliliiti búń ŋu-kantándi, ní an bí kii dijookpaandi di fōō ŋŋmee, ní bi dūu lúkuń tiŋkun, ní tiŋku nín dɔ̄ ki wīikí puee yaa yākatì mitee dijandi kpántì fatiku. 9 Ní tiwan tin cáá kufoou ki bí tiŋkunee nì ti-nyɔkɔmee yaa yākatì mitee, dijandi lēē ki kpíì poon, ní meelab nì bi-nyɔkɔm bin bí tiŋkunee yaa yākatì mitee, dijandi lēē poon ki nāaǹ.

10 Ní ntuun ntataatee búń ŋu-kantándi, ní uŋmalbija ubɔ nyánní yilpu ki wù kii ŋŋminaapoolee ki dɔ́miń ki lítì amɔɔ nì inyimbul yaa yākatì mitee dijandi diba pu. 11 (Bi yíì uŋmalbijee yii, Ntuntun.) Inyiŋfi jandi din pu uŋmalbijee lítèe túŋkì ní binib tikpil nyùn̄-mì ní ki kpíì, kun puee mì nìn tū.

12 Ní ntuun nnanaatee búń ŋu-kantándi, ní ŋwìiń yaa yākatì mitee, dijandi fōō ki bɔ̄ntì, ní uŋmal yaa yākatì mitee, dijandi fōō ki bɔ̄ntì, ní iŋmalbijaa yaa yākatì mitee, dijandi fōō ki bɔ̄ntì, ní dibɔmbɔndi jéetì kitiŋ pu ŋwiin yaa yākatì mitee dijandi pu, ní uŋmal nì iŋmalbijaa kaa ti ŋmíntí kunyeeu yaa yākatì mitee, dijandi diba pu^e.

13 M bí ki kpèéyee, ní ki gbìl̄ ukaalun ubɔ nín ŋàaǹ yilpu yilpu ki tátí mpɔn yii: «Mbusu, mbusu, mbusu gíti dɔ̄ ki cí kitiŋ pu nib ŋyunti ŋun ituun ita in kíǹee yaa láa búń i-kantáŋŋee.»