Dileedakal 7

Unimbɔti nibul

1 Míǹ boonee ní m ká ituun inaa yú duulinya jaŋŋi naatil kɔkɔ pu, ní ki ŋúb́ duulinya buŋku naatil^a, án nín làá ŋá pu kubuŋu ń taa ti jītí tiŋku puɔɔɔ, kí taa ti jītí kitiŋ puɔɔɔ, kí taa ti jītí busubu báà bubɔ puee. 2 M gíti kpēēyee, ki ká ntuun ŋubɔ nyánní ŋwìiń nyalaŋki pú ki ŋúb́ Unimbɔti un bí dimaŋfalinee daaŋku, ní ki téeń ki tùkū ituun inaa in fōō mpɔn kí dāá bīil̀ kitiŋ nì tiŋkuee yii: 3 «Ní taa láá ŋá kitiŋ nì tiŋku nì isufi tiba kí nīn cí ŋyunti ŋun ti yaa láa dū tidaandi ki nákáǹ ti-Nimbɔtiu tɔntɔnliibi yigbeeŋi pu ki dóòyee^b.» 4 Ní m gbìl̄ bi lī bin bi nákáǹ Unimbɔti daaŋku bi-yigbeeŋi puee wíiŋŋu nyɔkɔm, yii bi sá binib kutukub dilaataal nì imuŋku ili nì binaa, ní ki nyánní Isirayeel naakɔti kɔkɔ poon. 5 Bi dáań Juuda naakookun yab binib kutukub saalaa nì bili, ki dáań Rubeen naakookun yab binib kutukub saalaa nì bili, ki dáań Gaadi naakookun yab binib kutukub saalaa nì bili, 6 ki dáań Aseer naakookun yab binib kutukub saalaa nì bili, ki dáań Neefitalii naakookun yab binib kutukub saalaa nì bili, ki dáań Manasee naakookun yab binib kutukub saalaa nì bili, 7 ki dáań Simeeyɔn naakookun yab binib kutukub saalaa nì bili, ki dáań Leefii naakookun yab binib kutukub saalaa nì bili, ki dáań Isakaar naakookun yab binib kutukub saalaa nì bili, 8 ki dáań Sabulɔn naakookun yab binib kutukub saalaa nì bili, ki dáań Jooseefi naakookun yab binib kutukub saalaa nì bili, ki dáań Beenjameen naakookun yab binib kutukub saalaa nì bili.

Nnibiim

9 Míǹ boonee, m kpēēyee, ní ki ká nnibiim tikpil tikpil, ubɔ kaa ŋūǹ kí kàaǹ-mì. An nìn sá anibul kɔkɔ nì atimbun kɔkɔ nib nì ntimu kɔkɔ nib nì isoon kɔkɔ nib. Bi nìn yú dibeejal nì Dipibil nimbiin ki pēē abɔkutipiin káŋkaŋ ki ŋúb́ tikpakpati bi-ŋaan. 10 Bi nìn tátí mpɔn yii: «Difiil nyēeń ti-Nimbɔtiu un kā dibeejal puee nì Dipibil cee ní.» 11 Ní ituun in māntì ki tú dibeejalee, nì bikpilibee nì tiwan tinaa tin cáá kufoouee, tātìi dōoǹ dicincibil dibeejal taapu ní ki bíi nyɔ́ŋkí Unimbɔti, 12 ní ki lì yii: «Ameeni! Ti-Nimbɔtiu di yì inyɔŋki nì jilma nì iciin nì ijaam nì tinyool nì mpɔn kí nīn pée cáa cá jaanjaan! Ameeni.»

13 Ní bikpilibee kansikin ubɔ bālifì-mi yii: «Binib bin pēē abɔkutipiin nee sá bilab ní? Bi nyánní la ní?» 14 Ní m kíí-u yii: «M-Dindaan, sii di nyí-bi.» Ní u fātì ki bí-mi yii: «Bin nyánní falaakpaŋkpaan poonee dee^c. Bíǹ di fíntì bi-bɔkutiŋ ki dū-ŋi ki ŋá Dipibil fatikuun ŋi píil̀ káŋkaŋ. 15 An pu ní bi yú kunimbɔtidiin Unimbɔti beejal nimbiin ki jáaḿ-u ŋwiimpu nì kunyeeu, ní un kā dibeejal puee làá nīn bí bi-cee kí mɔ̄tì bi-pu. 16 Ŋkùm kaa dāa gíti cútí-bi, nnyinnyoo kaa dāa gíti cútí-bi, diwiŋkaŋkambil kaa dāa wù-bi, ní kutuntuŋu kubɔ kaa dāa bí niin. 17 Kun puee Dipibil din yú dibeejal kansikinee di dāa sá bi-kpàaliu, ní kí cáá-bi kí cùnnì nnyim min tìì dimaŋfalee laŋki, ní Unimbɔti ń pítí bi-nyinnyim kɔkɔ^d.»