Dileedakal 6

Bi bútì tiwampiiŋkaalee ki kpátì kugbɔŋu

1 M yú ki kpèéyee, ní Dipibil cúú tiwampiiŋkaal tiluli tin bóob́ kugbɔŋuee kubɔ ki bútì, ní m gbìl̄ tiwan tinaa tin cáá kufoouee kansikin kubɔ téeń mpɔn mpɔn kii ntaateenteenee yii: «Dāan̄!» 2 M kpēēyee, ki ká utampiin, un kā-uee ŋúb́ butɔbu, ní bi cíkiǹ-u kibeefuulii, ní u búntì nì dijajil poon kí já kí jīń.

3 Ní Dipibilee bútì tiwampiiŋkaal kuliliitiiu, ní m gbìl̄ kuwaŋu kun cáá kufoouee kuliliitiiu téeń yii: «Dāan̄!» 4 Niinee ní utaamu ubɔ mun nyánní ki sá uman ní bi pú un kā u-puee mpɔn ú lēē ŋgbansɔŋfi kitiŋ pu binib ń nīn kù tɔb, ní bi dū kitaataajikpaaŋŋi ki tīī-u.

5 Ní Dipibilee bútì tiwampiiŋkaal kutataatiiu, ní m gbìl̄ kuwaŋu kun cáá kufoouee kutataatiiu téeń yii: «Dāan̄!» M kpēēyee, ki ká utambɔn^a, un kā-uee ŋúb́ saniya u-ŋaan. 6 Ní m gbìl̄ nneen ŋubɔ sòon̄ní tiwan tinaa tin cáá kufoouee kansikin ki lī yii: «Dū saniya kí ŋmàntī bilee kiiloo ubɔ ŋwiin ŋubɔ tundi paati, kí ŋmàntī ɔɔji kiiloo bita ŋwiin ŋubɔ tundi paati. Ama á taa gbēē ŋkpam nì ndaam pu.»

7 Ní Dipibilee tí bútì tiwampiiŋkaal kunanaatiiu ní m gbìl̄ kuwaŋu kun cáá kufoouee kunanaatiiu téeń yii: «Dāan̄!» 8 M kpēēyee, ki ká utaamu un pīiǹ fùuuyee, ní bi yíì un kā-uee yii Ŋkúm ní Ditaŋkpiil nóó-u. Bi nìn tīī-bi mpɔn yii bí dū ntàataajimu nì ŋkùm nì bìlbil kúm kí kpɔ̀ kitiŋ pu nib kɔkɔ yaa yākatì minaayee dijandi diba pu, ní tipeecuncuti tin bí kitiŋ puee ń cūtì binib^b.

9 Ní u cúú tiwampiiŋkaal kuŋmooŋmootiiu ki bútì. M kpēēyee, ki ká nsaraafan ceeyee bin bin nìn sòoǹ Unimbɔti bɔti ki lèekī seerab bi kūū-bee nammu, 10 ní bi bí ki tátí mpɔn yii: «Ti-Dindaan un sá circir ki sá mbaamɔndaanee, a làá cīití kí tin sāā ŋyunti ŋulɔŋu ní kí sòoǹ duulinya yab bin kūū-tee bɔti kí dáaĺ bi-tafal ní?» 11 Niinee ní bi cáań abɔkutipiin ki pēeǹ bi-kɔkɔ ní ki bí-bi yii bí dá láá kàl̄ kí ŋùŋfì fiii, kí nīn cí ŋyunti ŋun ní bi yaa láa kūū bi-tɔntɔnjutiibi nì bi-nabiyaamu mun kíǹ duulinyan bi mun dɔ́miń ki kútì bi-puee.

12 Ní Dipibilee tí cúú tiwampiiŋkaal kululuutiiu ki bútì, ní kitiŋ cīŋkì ŋkpitim pu, ní ŋwìiń fōō ki bɔ̄ntì kii satabɔnee, ní uŋmal mántì cínciŋ kii fatikuee, 13 ní iŋmalbijaa tìfī yilpu ki lítí a lì kii kubuŋkpaaŋŋu nín tìfī asubigaan ki lúkufí puee. 14 Ní kutagbɔŋu wáŋkì a lì kii kukampeeu ní bi kpáb́ ki yōoǹee, ní ajoon nì ntimu mun nnyim māntì ki túee kpīkitì^c. 15 Ní duulinya bɔtiibi nì biyidambi nì bisoojakpilib nì bigaajab nì ipɔndambi nì iyumbu nì bin tɔ́ bi-bee, báà ŋma sáń ki bāal̀ afaginni nì titaŋkpanaakɔtin ajoon pu, 16 ní binibee lì ajoon nì ataŋkpee yii: «Lítímaan kí bìin̄ ti-pu, un kā dibeejal puee ń taa ká-ti, Dipibil mun ŋuul ń taa bàń-ti. 17 Kun puee ŋwiin ŋun sá diŋuukpaandi wiiŋŋuee bāań. Ŋma di sá-u kí yūĺ^d?»