Dileedakal 5

Dipibil nì kugbɔŋu bɔti

1 Ní m ká un kā dibeejal puee ŋúb́ kugbɔŋu kubɔ u-ŋaŋgiilin bi kpáb́-ku, ní an ŋmàn̄ poon nì boon ní bi dū tiwampiiŋkaal tiluli ki bóob́ kugbɔŋuee^a. 2 Ní ntuun ŋun cáá mpɔnee bíi báakí mpɔn yii: «Ŋma di cáá mpɔn kí bútí tiwampiiŋkaal nee kí kpátí kugbɔŋu nee dee?»

3 Báà ubɔ nìn kpá yilpuɔɔɔ, ki kpá taapuɔɔɔ^b, ki kpá ditaŋkpiilin kí ŋmā kí kpátí kugbɔŋuee kí kàaǹ poon. 4 Niinee ní m bíi sūǹ tikpil, kun puee ubɔ kaa nìn bí laaba ki ŋūǹ kí kpátí kugbɔŋuee kí kàaǹ tin bí poonee. 5 Ní bikpilib mmuŋku nì binaayee kansikin ubɔ bí-mi yii: «Taa ti sɔ̄. Kpèè! Juuda naakookun gbikintiu un sá ubɔti Daafiidi naantiiuee^c jáń ki jíń. Úǹ di làá ŋmā kí bútí tiwampiiŋkaal tiluli tin bi dū ki bóob́ kugbɔŋuee kí kpátí-ku kí kàaǹ.»

6 Ní m kpēēyee, dipibil di yú bikpilibee nimbiin, dibeejal nì tiwan tinaa tin cáá kufoouee kansikinee, ki bí kii bi nìn kūū-dèe, ní dì cáá iyin iluli, animbil aluli. Animbil alulee di sá Unimbɔti Fam miluli min u tú duulinya kɔkɔnee^d. 7 Dipibilee di dɔ́miń ki fōō un kā dibeejal puee ŋaŋgiiliŋun kugbɔŋu. 8 U fōō kugbɔŋuee ki dóòyee ní tiwan tinaa tin cáá kufoouee nì bikpilib mmuŋku nì binaayee dɔ́miń ki lítì u-nimbiin, báà ŋma ŋúb́ kubeeu nì sindaariya sambiyaamu, ní talaalu gbí poon. Talaaluee di sá Unimbɔti nibul wimmeem. 9 Ní bi bí ki gà nlampɔɔn ki nyɔ́ŋkí-u yii:

«A máaǹ kí fōō kugbɔŋuee kí bútí tiwampiiŋkaal

tin bi dūu bóob́ee.

Kun puee bi kūū-si ní a-fatikuu dá

anibul kɔkɔ nì isoon kɔkɔ nib,

nì atimbun kɔkɔ nib nì ntimu kɔkɔ nib ki tīī Unimbɔti^e,

10 ki dū-bi ki ŋá dibeel poon nib,

bí nīn sá ti-Nimbɔtiu saraaŋaliibi

kí jī dibeel duulinya poon.»

11 M bí ki kpèéyee, ní ki gbìl̄ ituun kucikukpaaŋŋu kutukub kutukub^f wooku māntì ki tú dibeejalee nì tiwan tin cáá kufoouee nì bikpilibee. 12 Ní bi gà ilan mpɔn yii:

«Dipibil din bi kūūyee máaǹ bí tīī-dì mpɔn

nì tigaajati nì iciin nì jilma nì tinyool nì ipaka.»

13 Niinee ní m gbìl̄ tiwannáaŋkaal tin kɔkɔ bí yilpuee nì tin kɔkɔ bí taapuee nì tin gíti bí kitiŋ taapu taapuee nì tin bí tiŋkunee, tiwannáaŋkaal kɔkɔ bí ki gà ilan yii:

«Un kā dibeejal puee nì dipibilee di máaǹ inyɔŋki

nì ipaka nì tinyool nì mpɔn kí nīn pée cáa cá jaanjaan.»

14 Ní tiwan tinaa tin cáá kufoouee kíí yii: «Ameeni!» Ní bikpilibee tātìi gbāaǹ ki nyɔ́ŋkì.