Dileedakal 4

Unimbɔti beejal nì inyɔŋki in bi tìì-uee

1 U lī míǹ ki dóòyee, boonee m kpēē kutagbɔŋu puee, kipunyɔkɔ kiba cúu pīitì.

Niinee nneen ŋun m bàà péé péé ki gbìl̄ ŋu pɔ̄ɔ̄ kpaŋkpam kii dikantándee bí-mi yii: «Jɔ̄mìń doo ḿ dàkà-si tin bí ki dòoń boonee.» 2 Kpalaa niinee ní Circir Fam yōoǹ-mi ki jɔ́m̀ yilpu ní m ká dibeejal ní ubɔ kā dibeejalee pu. 3 Udaan nimbiin jìl̀ ki ŋmóò làka laka kii ataŋkpamɔnti ŋin bi yíì jaspee nì ŋin bi yíì saarduwaanee, ní dikuntinyindi māntì ki tú dibeejalee ní ki jìl̀ pàlpal kii ditaŋkpal din bi yíì eemeeroodee^a. 4 Ní abeejal mmuŋku nì anaa aba mun māntì ki tú dibeejalee, ní bikpilib bin kā an beejaliŋ gbanti puee pēē tiwampin ní ki cíkí sindaariya beefuulimmu. 5 Dibeejalee ni ní itaaŋmɔŋmɔ nì ataadun nì dibintiŋkpaandi nyēeń ní iŋminaapool iluli tūū ki yú dibeejalee nimbiin ki tùm̀ kpaŋkpam, an di sá Unimbɔti Fam milulee^b. 6 Tiŋku ubɔ dɔ̄ dibeejalee nimbiin ki wāĺ kílkil kii digitil nín wāĺ puee, kii ataŋkpee ŋin bi yíì kriistaalee nín jìl̀ puee.

Dibeejalee jannaatiliŋ puee, tiwan tinaa tin cáá kufoouee yú kansikin ki māntì ki tú, ní ti-boon nì ti-nimbiinee kɔkɔ sá animbil^c ŋma. 7 Upeepeekaayee náań nì gbikinti, ní uliliitee náań nì unaja, ní utataatee nimbiin nì unil yɔŋu náań, ní unanaatee náań nì ukaalun yaa bíi ŋàaǹ u nín bí puee^d. 8 Tiwan tinaa tin cáá kufoouee gbanti kɔkɔ cáá ifeen iluu iluu in pu animbil píńee poon nì boon. Ní bi lì ŋwiimpu nì kunyeeu kaa gbèentí yii:

«Circir, circir, ti-Dindaan Unimbɔti di sá circir,

úǹ di sá Mpɔŋkɔdaan,

un nìn bí, ki gbíntì ki bí, ki làá dāan̄ee^e.»

9 Ŋyunti ŋun ní tiwan tinaa tin cáá kufoouee yaa bí ki tìì jilma nì tinyool ki pàkà un kā dibeejal pu ki làá nīn bí kí nīn cá jaanjaanee, 10 ní bikpilib mmuŋku nì binaayee lítí un kā dibeejal pu ki làá nīn bí jaanjaanee taapu ní kí nyɔ̄ŋkì-u, ní ki cíkití bi-fuulimmu ki lúkufí u-beejal taapu ní ki gà ilan ki pàkà-u yii:

11 «Sii ti-Dindaan ti-Nimbɔtiu, a máaǹ jilma nì tinyool nì mpɔn.

Di sá yii sii di náań tikɔkɔ nì tikɔkɔ,

ní ki là ní ki tīī tikɔkɔ dimaŋfal tí nīn bí.»