Dileedakal 11

Biseeraleeliibi bili

1 Ní bi dū ŋkpaŋkpaan ŋubɔ ki tīī-mi, ŋu náań nì ndɔ ŋun bidimaliibi cáa ŋmàntī ki māā adiin an tèen̄ee, ní ki bí-mi yii: «Yīkìí ŋmàntī kunimbɔtidii nì nsaraafan, kí kàaǹ bin kɔkɔ bí ku-poon ki jáaḿ Unimbɔtee^a.» 2 Ní bi gíti bí-mi yii: «Yàntī, taa ŋmàntī kunimbɔtidii cindi din bí mmɔŋki púee, kun puee bi dū niin ki tīī atimbun ŋin kaa nyí Unimbɔtee ní. Bíǹ di làá tāā circir tiŋki pùb kí tin sāā abin ata nì dijandi^b. 3 M-seeradambi bin m làá dāá tɔ̄ńee dāa pēē kutukub ní ki sòoǹ m-bɔti kí tin sāā abin ata nì dijandi.»

4 M-seeraleeliibi gbantee di sá ɔliifi sufii ili nì fitilab bili bin yú ti-Dindaan un yì kitiŋee nimbiinee^c. 5 Ubɔ yaa là kí bīil̀-bee, ŋŋmi ŋubɔ làá nyānní bi-nyɔmmun ní kí wà bi-nannanliibi. Un nyàab̀ kí bīil̀-bee nín làá dāá kpú miŋyee dee. 6 Bi cáá mpɔn kí pìin̄ kutagbɔŋu iwiin in bi làá dūú sòoǹ Unimbɔti bɔtee utaa ń taa jōō kitiŋ pu, ki cáá mpɔn kí yàntī nnyim ń kpántí fatiku, ki tí cáá mpɔn kí yàntī animbinaaman nín bí tɔbin puee ń jēetí kitiŋ pu ŋyunti ŋun kamaa bi yaa lèe^d.

7 Bi yaa láa sòon̄ Unimbɔti bɔti ki dóòyee, upeel un bí mbookpaannee làá dāá nyānní kí jáǹ-bi ní kí pɔ̄ɔkiǹ-bi ní kí kpɔ̀-bi^e. 8 U yaa kūū-bee, anikpilee làá gbíntí ki dɔ̄ kitiŋkpaaŋŋi gbanti daŋŋi pu. Kitiŋkpaaŋŋee ní bi dū ki nántiǹ Soodoom nì Eejipiti. Kitiŋ gbanti kibaantii poon ní bi kpáá bi-Dindaan ndɔpuntikaa pu^f. 9 Anibul kɔkɔ nì atimbun kɔkɔ nì isoon kɔkɔ nib làá dāá dāan̄ kí kpèè anikpil gbanti kí tin sāā iwiin ita nì dijandi. Baa làá dāá pɔ̄ nsan bí síb́-bi. 10 Bi-kúm gbanti puee, an dāa sá duulinya yab kɔkɔ jiŋaal ní, ní bi fàal̀ ki pūǹ tɔb tiwan. Kun pu an dāa mɔ̄ǹ-bi mimmee di sá Unimbɔti bɔnaatiliibi bili gbantee nìn kɔ́ǹ-bi dinimbinaamandin.

11 Ama iwiin ita nì dijandee boonee, Unimbɔti yāntì kufoou kubɔ dɔ́miń ki kɔ́ bi-ni, ní bi fīkitì^g, ní tifaandi cúú bin yú ki kpèé-bee. 12 Bi yáatìi yúl̀ee ní ki gbìl̄ nneen ŋubɔ sòon̄ní yilpu mpɔn yii: «Jɔ̄mìḿmaan doo!» Bi-nannanliibi yú ki kpèé-bi míǹ ní bi yíkìi nín jɔ́ḿ yilpu ki tin kɔ́ atagbanni^h. 13 Dicilpu niinee, kitiŋ cīŋkì ŋkpitim pu. Bi yaa yākatì kitiŋ gbanti diiŋŋi saalaa puee, diba pu lēē ki lítì ní binib kutukub biluli kpíì. Ní tifaandi kɔ́ bin kíǹ kaa kpíìyee, ní bi bí ki nyɔ́ŋkí Unimbɔti un yì yilpuee.

14 Mbusuliliiti jítì, utataati di làá bàń kɔŋkɔnnee.

Dikantánluluútiil

15 Ntuun nluluútee búń ŋu-kantándee, ní ineen kupaau sòon̄ní yilpu mpɔn yii: «Duulinya beel kpántì ti-Dindaan nì u-Meesiyau Beel ní kɔŋkɔnnee. Úǹ di làá nīn pée kā di-pu kí nīn cá jaanjaanⁱ.» 16 Ní bikpilib mmuŋku nì binaa bin kā bi-beejaliŋ pu Unimbɔti ceeyee tātìi dōoǹ dicincibil u-nimbiin ki bí ki nyɔ́ŋkí-u 17 ki lì yii:

«Ti-Dindaan Unimbɔti Mpɔŋkɔdaan,

sii un nìn bí ki gbíntì ki bée,

ti jáam̀-si a nín dàkā a-pɔŋkpaaŋŋu

ki jíń dibeelee pu.

18 Atimbun nìn gíí a-pu diŋuul,

ama ŋyunti bāań á dàkà-ŋi a-ŋuul nín sá puee,

kí sòoǹ bitaŋkpiibi bɔti.

Ŋyunti bāań dee á pà a-tɔntɔnliibi bin sá a-bɔnaatiliibee paati,

nì bin kɔkɔ sá a-yab ki fàŋkí-see, bikpaambi nì ŋwaamu.

Ŋyunti bāań dee á kúntí bin bí ki nàantí duulinyee^j.»

19 Ní bi cúú yilpu Nimbɔtidiiku ki pīitì ní dipoondi dakaau nyáń ki yú kunimbɔtidiin. Niinee ní an bíi ŋmóò ki tátí kii utaayee, ní m gbìl̄ dibintiŋkpaandi pu, ní kitiŋ cīŋkì ŋkpitim pu, ní ataanyiŋkumbil bíi lítí.