2 Tiimootee 3

Iyuntijoolkaa poon bɔti

1 Á nīn nyí yii iyuntijoolkaa poonee, án làá dāá nīn pɔ̄ɔ̄. 2 Di sá yii binib dāa kíǹ ki cáá ikummunti, ní ki néeń animbil, ní ki gà bi-biŋŋi, ki cáá alambil, ki sòoǹ ki bíiĺ Unimbɔti, kaa tɔ́ bi-baabi nì bi-nab, kaa dāa nyí tiŋan, kaa tɔ́ tin bí circiree. 3 Baa dāa cáá dineendi, kaa dāa sūǹ binib saai, ki dāa kúŋfí binib boon, kaa dāa ŋūǹ kí cúú bi-ba, ki dāa sá bitɔŋfitiibi, ki dāa ná tin ŋān̄ee. 4 Bi dāa sá bin nyēē binib boon ki nyáfí-bee. Bi dāa sá binib bin an yòontée, ki dāa néeń timɔn, ki dāa néeń tin fáatiǹ-bee ki jítiǹ Unimbɔti. 5 Bi dāa ŋúb̀ nnimbɔtisan bɔti ní kí yíí kaa là mbaamɔn pɔŋŋu ŋun bí tibɔti gbanti poonee. Á fá an nibee. 6 Bi-kansikin biba kóò binimpoobi bin landɔkɔi pátì bi ŋáań ikpiti ki cáá kɔdeebi kupaauee dumpui ní ki yàntī bi fòol̄ tin bi sòoǹee ki kíikí. 7 An nimpoobee pílifí tibɔti ní baabadal, ama doooo kii nee, baa ŋūǹ kí béé ibaamɔn. 8 Kii Jaaneesi nì Jambiree^a nín kaa nìn là Mooyiisi bɔti puee, míǹ mbaantiim ní an nibee kaa là ibaamɔn. An sá binib bin landɔkɔi gábitèe, baa nóó Unimbɔti. 9 Ama baa làá nīn bí kí cù ndan, kun puee báà ŋma làá dāá béé bi-pu yii bi sá bigbaambi, a lì kii Jaaneesi nì Jambiree cee nín nìn jítì puee.

Isaŋkijoolkaa

10 Ama sii ká m-dàkatam nì m-bimbim nì m-landɔkɔi nì m-fookiiu nì m-mɔtiiki nì m-neendi nì m-pɔ́ɔǹtam 11 nì bi nín páb́-mi puee, nì m-falaau. A nyí tin nìn jítì m-pu Antiyɔɔsi nì Ikooniyum nì Liistiree. Falaa ulɔu ní maa jíń niin? Ama ti-Dindaan nyántì-mi tikɔkɔ poon^b. 12 Di sá yii bin di yaa fōō Yeesu Kriisitoo ki kíí ki là kí nīn yú deedee Unimbɔti nimbiinee, see bidambi ń ká digìńdi. 13 Ama bitɔŋfitiibi nì bikiililiibee làá nīn mɔ̀tīi múl̀ ki kóò tin kaa ŋān̄ee poon ní baabadal. Bi wáŋkì, ní ki bíi kíiĺ bi-jutiibi mun ń wāŋkì. 14 Míǹ puee, sii ń ŋúb́ tibɔti tin a bífì ki fōō ki kíí tiŋanee, kun puee sii nyí bin di dàkā-si an bɔtee. 15 Doooo a-biyatin ní a pée nyí Unimbɔti gbɔŋku poon bɔti. An di ŋūǹ kí tīī-si iciin in cáǹ unil difiilinee nì fookii un a cáá Yeesu Kriisitoo puee. 16 Unimbɔti di yāntì bi ŋmàn̄ tibɔti gbanti kɔkɔ, ki sá bí dūú dàkà binib ń béé ibaamɔn, kí dàkà unil yìntitam, kí kpòotī-u, kí dàkà unil ú nīn cáá deedee bimbim, 17 án nín làá ŋá pu kí bɔ́ntí Unimbɔti niliu mmɔntiimin ú kítí kí tɔ̄ atummɔnti kɔkɔee.