2 Tiimootee 1

Kugbɔnliliitiiu kun Pɔɔl ŋmàn̄ ki tīī

Tiimooteeyee

Ijaam

1 Man Pɔɔl di ŋmàn̄ kugbɔŋu nee, man un Unimbɔti là ḿ nīn sá Yeesu Kriisitoo kpambal ki sòoǹ dimaŋfal din u pōoǹ Yeesu Kriisitoo tìì bin fōō-u ki kííyee bɔtee.

2 M ŋmàn̄ kugbɔŋu nee ki tīī sii Tiimootee^a m-bineeŋkaaki ní. Ti-Baa Unimbɔti nì ti-Dindaan Yeesu Kriisitoo ń ŋá-si tiŋan, kí sɔ̄ a-saai, kí tīī-si ŋgbansɔŋfi.

Unil ń pɔ́ɔǹ u-ba kí nīn yú deedee

3 M jáaḿ Unimbɔti un m nóó nì dipɔɔmɔntiil, kii m-naanjab mun nín nìn nóó-u puee^b. M jáaḿ-u tikpil ŋyunti ŋun m téetí a-pu ki mèé múlmul ŋwiimpu nì kunyeeuee. 4 Di sá yii m téetí a-nyinnyim pu, ki mɔ̀ ki nyàab̀ kí ká-si, m-pɔbil ń pīil̀. 5 M dáá gbíntìi téetí fookiibaamɔn un a cáá Yeesu puee pu, fookii un a-naan Loowiisi nì a-na Eeniisi nìn pée cááyee. M nyí nì ibaamɔn yii a mun cáá fookii gbanti. 6 An pu ní m téetí-si yii á mɔ̀tīí nyàatī mpɔn ŋun Unimbɔti tīī-si ŋyunti ŋun m nìn dū m-ŋalii ki páaǹ a-pu a fōōyee. 7 Kun puee Unimbɔti nín tīī-ti Ŋfam miŋyee kaa sá Ŋfam min tìì tifaandee, ama an sá Ŋfam min tìì mpɔn, nì dineendi kí yàntī unil ń ŋmā kí ŋúb́ u-bee ní.

8 Míǹ puee á taa nín̄ cáá icoo kí sòoǹ ti-Dindaan pu, kí taa nín̄ cáá icoo ma mun pu, nì min kɔkɔ m sá usarkadaan ti-Dindaan puee. Ama Tibɔmɔntiil puee, á jī falaa un man bíi jīǹee nì Unimbɔti pɔŋŋu. 9 Úǹ di fīī-ti ní ki dū-ti ki kpántì u-yab. An kaa sá atuun aba ní ti túń ní u fīī-ti, an sá úǹ u-ba di lēē kí ŋá-ti tiŋan gbanti doooo jaanjaan Yeesu Kriisitoo pu. 10 Kɔŋkɔnnee u nyántì u-ŋanti gbanti mpaampiin pu ŋyunti ŋun ti-Fiiliu Yeesu Kriisitoo dɔ́mińee. Úǹ di dɔ́miń ki kúntì ŋkúm pɔŋŋu, ní ki cáań dimaŋfal din kaa kúntée Tibɔmɔntiil tin u cáańee pu.

11 An Bɔmɔntiiti gbanti ní Unimbɔti dūu ŋúbiǹ-mi ḿ nīn sá u-kpambal ki báakí tibɔtee ki dàkà-tì binib^c. 12 An pu ní m bíi jīǹ falaa un m jīǹ nee. Ama an kaa cáá-mi icoo, kun puee m nyí un m fōō ki kííyee nín sá uŋyee. Míǹ ní m nyí yii u cáá mpɔn kí kpāafì tin u dūu ŋúbiǹ-mee kí dāá sāā u-gítintam dal.

13 Á nīn ŋúb́ ibaamɔn bɔti tin m sòon̄ ki tùkū-see, kí nīn sòoǹ-tì kii a nín gbìl̄-tì m-cee puee. Nín̄ cáá fookii nì dineendi ti nín ŋá ubaanti nì Yeesu Kriisitooyee pu. 14 Á kpāafì Tibɔmɔntiil tin Unimbɔti dūu ŋúbiǹ-see nì u-Fam min kóò ti-nee tūtuntam pu.

15 Kii a nín nyí puee, bin kɔkɔ sá Asiiyee dū-mi ki fá ki kpáaǹ Fiijeel nì Eemɔgeeni. 16 Ti-Dindaan ń ŋá Ɔneesiifɔɔr dicaŋku tiŋan. Di sá yii u nìn ŋmēentí-mi múlmul, kaa cáá man usarkadaan pu icoo. 17 Áli gba u nín dɔ́miń Roomee, u nyàab̄-mi nì dinimbinaamandi, ní ki dāa ká-mi. 18 Ibɔsoon dalee, ti-Dindaan ń dāá ŋá Ɔneesiifɔɔr tiŋan. Tin kɔkɔ u ŋá ki tīī-mi Eefeesi tiŋkinee, a nyí ki jítiǹ báà ŋma.