1 Tiimootee 6

1 Iyumbu máaǹ kí nīn tɔ́ i-dindambi nì i-pɔbiliŋ kɔkɔ. Mimmee binib kaa sòoǹ kí bīil̀ Unimbɔti yindi nì tibɔti tin ti dàkèe. 2 Iyumbu in dindambi nóó Kriisitooyee, í taa kpèè-bi fám, yii bi nín sá i-nabiyaamuee pu. Míǹ gba ní i nín máaǹ kí nīn tūǹ ditundi mmɔntiimin, kun puee bin i tūǹ ditundi ki tììyee sá i-nabineeŋkaamu mun nóó Kriisitooyee ní.

Ibaamɔn gaajati nì tinyimɔmbɔti dàkatam

Min a máaǹ kí nīn dàkà binib ki kpáafí-bee sèé. 3 Ubɔ yaa bíi dàkà tinyimɔmbɔti tiba, ki yíì, kaa nóó ti-Dindaan Yeesu Kriisitoo baamɔmbɔti nì bi nín dàkā-ti unil nín máaǹ kí nīn bí min Unimbɔti nimbiinee, 4 udaan lámintí, kaa nyí tiba. Udaan būǹ tibɔti weeŋyi ní ki kpákà anyɔɔbun pu. An di cāabìń nnimbidiki, kujaau, asiibil, nì ilandɔkɔkpiti bi-jutiibi pu. 5 Baa ti dàkafī nnimɔntiyaamin, baa ti nyí ibaamɔn, ki kpākantí tɔb an kaa kúntí. Bi nyí kii nnimbɔtisan sá laakin bi làá dī kí ká tigaajatee ní.

6 Tiŋman, nnimbɔtisan lafun sá tigaajakpaandi ní, ŋyunti ŋun ní an mɔ̄ǹ-si tin a cááyee puee. 7 Ti dɔ́miń duulinya nee ni nì iŋaŋkulim ní, míǹ ní ti làá dāá fàtīí tí gítí nì iŋaŋkulim. 8 Míǹ puee, ti yaa cáá kun ti làá jēe nì kun ti làá pèen̄ee, án ŋmàntīǹ-tee. 9 Ama bin nimbiliŋ máǹ tigaajati puee làá kɔ́ icɔŋkin kí lítí, ní nnimbitaataam tiwan tikpil pu min kaa cáá taapu ki cāabìń diwaŋkilee sàtī-bi kii kutaliŋŋuee. An di téekí binib ki cáǹ asaluun ki nàantí-bi. 10 Di sá yii nnimbineel di cāabìń mbusub kɔkɔ. Biba nín néeń animbil puee, bi dū nnimbɔtisan ki fá ki dū bi-ba ki kɔ́ǹ dinimbinaamandin tikpil.

Isaŋkiluŋkikaa

11 Ama sii Unimbɔti niliu, nyā tíǹ kɔkɔn, kí nyàab̀ kí nīn bí deedee, kí ŋúb́ dinimbɔtinool, kí nīn cáá fookii, kí nīn cáá dineendi nì kimɔtii, kí nīn mɔ̄. 12 Á já kujamɔntiiu kun sá fookii jaakuee, kí cúú dimaŋfal din kaa kúntée. Di sá yii tíǹ pu ní Unimbɔti yíiń-si á béé-ŋu ŋyunti ŋun a nìn sòon̄ a nín fōō ki kíí kunipaau nimbiin miŋyee. 13 Unimbɔti un tìì tiwan kɔkɔ dimaŋfalee nimbiin, nì Yeesu Kriisitoo un nìn sòon̄ ibaamɔn Pɔnsi Piilati^a cee mmɔntiimee mun nimbiin ní m kpáafí-si. 14 Á kpèè tibɔti tin m ŋúbiǹ-si nee tiŋan kí taa yìntī. Bí taa ká a-pu tikpitil tiba kí nīn cí ŋyunti ŋun ti-Dindaan Yeesu Kriisitoo làá dāá páannée. 15 Ŋyunti ŋun Unimbɔti yóoǹee yaa láa bāańee, ní ú yàntī Yeesu ń páanní. Úǹ di sá nnaam nyeel ní ki sá tikɔkɔ Dindaan, bibɔtiibi kɔkɔ Bɔtiu nì bidindambi kɔkɔ Dindaan^b. 16 Úǹ baba di kaa kúù, ki kóò ŋwalifi ŋun ubɔ kaa ŋūǹ kí sútí kí pìl̄ee ni. Báà unil kaa láá ká-u, ní kaa tí ŋūǹ kí ká-u^c. Úǹ di máaǹ tinyool nì mpɔn kí nīn cá jaanjaan! Ameeni.

17 Á kpāafì bin cáá tigaajati duulinya nee nee yii bí taa nín̄ cáá dilambil, kí taa nín̄ máká bi-gaajati tin kaa làá nīn bí ki cá jaanjaanee pu^d. Ama bí dū bi-mákal kí ŋá Unimbɔti un di pūǹ-ti tikɔkɔ nì tikɔkɔ tikpil tikpil tí nīn bí mmɔnnee ni. 18 Bí nīn ŋáań tiŋan. Bi-gaajawanti nín wīikí puee, bi-tummɔntiiŋi mun ń nīn wīikí míǹ, bí nīn cáá tiniti ki yàkatī tin bi cááyee nì bin kíǹee. 19 Bi yaa ŋá mimmee, bi kōontí tigaajamɔntiil tin kaa bíiĺee ki sīintí án nīn dɔ̄ ki cí-bi foolboon dee^e, ní bí ŋmā kí ká ibaamɔn maŋfal.

20 Sii Tiimootee, kpāafì tin Unimbɔti tīī-see tiŋan, kí gɔ́ntí tibɔfan tin kaa nàaǹ nì nnimbɔtisanee, kí taa cèeǹ a-nyɔkɔ bin bí yii bi cáá iciin kin kaa cááyee nikpɔŋkpɔkɔku poon. 21 Di sá biba nìn bí yii bíǹ di nyí dinyil gbanti ní ki dāa dū nnimbɔtisan ki fá.

Kriisitoo ŋanti ń nīn bí ni-pu.