1 Tiimootee 5

Ditundi din bi máaǹ kí tɔ̄ kí tīī Kriisitoo yabee

1 Á taa wòoǹ utikpil mpɔn. Á sòoǹ nì u soooo kii a-baayee^a, kí nīn sòoǹ nì binaacimpɔmbi kii a-naalibee. 2 Á nīn sòoǹ nì binimpukpaambi kii a-nabee, nì binimpusapɔmbi kii a-niisalibee nì tibulcin poon.

3 Á nīn ŋúb́ bikpiipoobi bin kaa cáá báà ubɔ nì ubɔee kí nīn tɔ́-bi. 4 Ama ukpiipu ubɔ yaa cáá mbiyaamu, an yaa tí sá u-naantiibaaa, bíǹ di máaǹ kí béé nnimbɔtisan tundi bi-ba dicaŋku poon kí wàatī ní kí ŋúb́ bi-nab nì bi-naambi kí téeǹ, min fáatì Unimbɔtee dee. 5 Unimpu un yaa lafun sá ukpiipu, kaa cáá ubɔ ń kpèè-uee dù u-mákal kí ŋá Unimbɔtin ní, ki mèé ki gbàam̄ Unimbɔti ŋwiimpu nì kunyeeu. 6 An yaa sá ukpiipu un ŋáań min kaa kítèe, u bí dimaŋfalin ama ní ki kpíì. 7 Tin tin a máaǹ kí dūú dàkà-bee dee, án nín làá ŋá pu ubɔ ń taa ká ikpiti iba bi-puee. 8 Un kaa ŋúb́ u-dicaŋku tiŋanee, m lì ki bántí u-diiku poon nib kíŋŋŋ ní, mimmee udaan fá fookii, ní bin kaa fōō Yeesu ki kííyee sɔ́ǹ-u.

9 Bí taa ŋmà ukpiipu ubɔ yindi kí kūtì bikpiipoobi gbɔŋku poon, asee ukpiipu un yaa cáá abin jítì abin imuŋku ita puee baba. Kí wàatēe, ú nīn sá un nìn mɔ́ǹ uninjabaantee. 10 Ú nīn sá unimpu un bi pàkà yii u tūǹ atummɔnti ki ŋúń ki ŋúb́ u-biyaamu tiŋan, ki fòol̄ binicambi mmɔntiimin, ki fíntí Unimbɔti nib taaŋi^b, ki tútúǹ bifalaadambi, ki pée tūǹ atummɔnti ŋmaniŋmee.

11 An yaa sá bikpiipusapɔmbee, bí taa ŋmà bi-yiŋŋi kugbɔŋu poon, kun puee nninjaneel ŋūǹ kí cúú-bi bí dū Kriisitoo kí fá, kí cùú mɔ̄ǹ. 12 Bi nín ŋá mimmee ní kí kɔ́ Unimbɔti bɔtin, kun puee bi nín nìn pōoǹ yii bi làá ŋá miŋyee, baa ti ŋúń ki ŋá. 13 Kí kūtèe, bi nín kaa cáá tiba kí ŋée puee ní bi yìiǹ ki póotí acin. Tin gíti púntèe di sá bi kíǹ ki cáá kubɔcaau ní ki sòoǹ icoo bɔti, nì tin tin kaa bàà máaǹ bí sòoǹee. 14 An pu ní m là yii bikpiipoobi bin dáá pɔ̀ɔǹee ń mɔ̄ǹ kí màal̀ mbiyaamu kí nīn kpèé bi-ciŋŋi, án nín làá ŋá pu bí taa pɔ̄ unannanli nsan bí sòoǹ kí bīil̀-tee. 15 Kun puee bikpiipoobi biba pūtì kpáàa dū nsammɔnti ki fá, ki kíǹ ki nóó Sitaan. 16 Unimpu un fōō ki kííyee yaa cáá bikpiipoobi u-dumpuee, u máaǹ kí tūtuǹ-bi, kí taa dū ditúndi gbanti kí túń Kriisitoo nikitil pu. Míǹ di làá yàntī Kriisitoo nikitil ń ŋmā kí nīn tútúǹ bikpiipoobi bin kaa pée cáá báà ubɔ nì ubɔee.

17 Bin kpòotī Kriisitoo nikitil mmɔntiiminee máaǹ tipaal mili pu. Cilinjee bin pu m sòoǹee di sá bin pɔ̄ɔntí ki sòoǹ Unimbɔti bɔti ki dàkà muee. 18 Di sá Unimbɔti gbɔŋku poon lī yii: «Á taa bóob́ unaa un tà ki gbátí adibilee nyɔkɔ», ní ki gíti lī yii: «Utɔntɔnli máaǹ u-paati^c.» 19 Ubɔ yaa dɔ́miń ki tùkū-si yii bin kpòotī Kriisitoo nikitilee ubɔ ŋá tibee, á taa fōō kí kíí, see binib bili kii bita di yaa ká ní ki tùkū-si^d. 20 Á nīn wòoǹ bin ŋáań ikpitee binib kɔkɔ nimbiin, án nín làá ŋá pu bin kíǹee ń fàŋkèe.

21 M kpáafí-si Unimbɔti nì Yeesu Kriisitoo nì Unimbɔti tuuŋyi in u lútèe nimbiin, yii á ŋúb́ tibɔti tin m sòoǹ nì si nee kí taa nín̄ cáá dinigàntil, kí taa lēē biba ki ŋáań bíǹ tiŋan ki yàntī bin kíǹee. 22 Á taa ŋá kujinjikilaapaau kí dū a-ŋalii kí páań ubɔ pu kí mèè u-pu kí tīī-u ditundi diba Kriisitoo nikitil kansikin, kí taa kɔ́ biba kpitiin. Nín̄ nyí nì a-ba kí nīn bí circir.

23 Á taa ti nín̄ nyù nnyim ŋmaniŋma. Nín̄ nyù ndamam fiii ipɔŋween nì a-wunti nín nyàŋfī múlmulee pu.

24 Bi wālifí biba kpitii kí wàatī gba ní kí nín sòoǹ bidambi bɔti, ama bibee, ibɔsoon poon ní bi dāa nín bìitī bíǹ kpitii pu. 25 Míǹ ní bi tí kāntí atummɔnti mun. Ŋin ní baa kāntí malaayee gba mun kpá kí gbíntí dibalin.