Eefeesi 6

Bibaatiibi nì bi-biyaamu bɔti

1 Mbiyaamu, ni nín sá ti-Dindaan yabee puee, ní nīn tɔ́ ni-baabi nì ni-nab, kun puee míǹ di ŋān̄. 2 Unimbɔti marau lī yii: «Á nīn tɔ́ a-baa nì a-na.» Úǹ di sá marapeepeekaa un pu Unimbɔti kútì dipoondee, 3 yii: «Sii un yaa tɔ́ a-baa nì a-nee, a làá ká dipɔɔsɔŋkil ki làá kàl̄ kitiŋ pu kí yúntí^a.»

4 Nimbi bibaatiibee, ní taa nín̄ kɔ̄ntí ni-biyaamu aŋuu, ama nín̄ ŋúb́maan-mu, kí nīn dàkà-mu, ki sáŋkí-mu kii ti-Dindaan nín dàkà miŋyee.

Iyumbu nì i-dindambi bɔti

5 Nimbi iyumbuee, nín̄ tɔ́maan ni-dindambi nì ni-pɔbiliŋ kɔkɔ kí nīn fàŋkí-bi. Ni yaa ŋáań mimmee, ni tɔ́ Kriisitoo dee. 6 An kaa sá bi yaa bée ŋmaniŋma ní ní nīn tūǹ atuun, bí wāl̀ kí pàkà-ni. Ama ni nín sá Kriisitoo yumbuyee puee, ní nīn ŋáań min fáatì Unimbɔtee nì dipɔbil diba. 7 Ní tɔ̄maan ditundi míǹ mbaantiim kí tīī ni-dindambi kii ti-Dindaan u-ba ní ni tūǹ ki tììyee, an taa nín̄ sá kii binib ní ni tūǹ ki tììyee. 8 Ní nīn nyí yii uyumbuɔɔɔ, un yì u-beeyaaa, ti-Dindaan làá dāá pà báà ŋma tummɔntiŋ ŋin u ŋée paati ní.

9 Nimbi iyumbu dindambee, ni mun ń nīn ŋáaḿmaan ni-yumbui tiŋan mbaantiim kí taa nín̄ yòontí i-pɔbiliŋ. Ní nīn nyí yii nimbi nì ni-yumbuuyee, ni-kɔkɔ kpiliu sá ubaanti ní ki bí yilpu, úǹ kaa gàntī binib^b.

Tijanjawan tin Unimbɔti tììyee

10 Tibɔjoolkaal tin m làá dūú kàan̄-nee sèé: ní fōōmaan ti-Dindaan pɔŋkpaaŋŋu kí pɔ̄ɔkì. 11 Ní dū tijanjawan tin kɔkɔ Unimbɔti tììyee kí pèen̄ kí ŋmā kí sīĺ deedee ŋyunti ŋun Sitaan yaa yíkìń ni-pu nì u-kīiltamee. 12 Kun puee an kaa sá ti làá jáǹ binib ní, an sá ti nì arasiniibi nì bi-bɔtiibi, nì bin kɔkɔ jīǹ abee dibɔmbɔndin, duulinyan dooyee, nì arasiniibi bin bí kutaa puee ní ti làá jáǹ. 13 An puee, fōōmaan tijanjawan tin kɔkɔ Unimbɔti tììyee, án nín làá ŋá pu ní an yaa láa píĺ ki pɔ́ɔkèe, ní ŋmā kí yūĺ kí já kí pɔ̄ɔkèe. Ni yaa jáń ki pɔ́ɔkèe, ní ní báań kí yūĺ.

14 An puee ní bɔ́ntí ni-ba kí dū ibaamɔn in sá-ni dambalee kí gbìn̄ ni-cammu, ni-deedeeu ń nīn sá-ni dijanjabɔkutil ní dūú pèen̄. 15 Difaŋgiil din ni cáá ki sòoǹ Tibɔmɔntiil tin tìì binib ŋgbansɔŋfee ń nīn sá-ni anaataka ní táká. 16 Ni-fookiiu un ni cáá Unimbɔti puee ń nīn sá-ni digbampɔɔl ní dūú gbíntí Sitaan ukpiti piiŋyi in u tòoń i sá ŋŋmee. 17 Ní fōō difiil dí nīn sá-ni kijanjafuulii ní cíkiń, kí yòom̄maan kitàataajiki kin Unimbɔti Fam tììyee mun, an dàkà yii Unimbɔti nyɔɔbundi^c. 18 Ní nīn mèémaan kí taa gbèen̄. Ní yàntī Circir Fam ń kpòotī-ni ni-wimmeem nì tin kɔkɔ ni bàlifēe poon. Ní fìntīmaan an bɔti pu, kí nīn mèémaan múlmul ki tìì Kriisitoo yab kɔkɔ. 19 Mèèmaan Unimbɔti ma mun pu, ú tīī-mi tibɔti tin máaǹ ḿ sòoǹee, ḿ ŋmā kí sòoǹ Tibɔmɔntiil tin nìn bí dibalinee nì tininjati. 20 Nì min kɔkɔ m bí sarka poonee, man di sá un Yeesu Kriisitoo túnní, ḿ nīn sòoǹ Tibɔmɔntiil gbantee. An puee ní mèè Unimbɔti, án nín làá ŋá pu ḿ sòoǹ-tì ti-pú nì tininjatee.

Tibɔjoolkaal nì ijaam

21 Ti-nabineeŋkaaki Tiisiiki^d, un tūǹ ti-Dindaan tundi nì ibaamɔnee, làá māafì-ni min ní m bí dooyee, ní ŋmā kí béé tin kɔkɔ m bí doo ki ŋáańee. 22 Kun pu m dū-u ki túnní ni-ceeyee di sá ní ŋmā kí béé tin poon ti bée, ú kpáàa tīī-ni kunyannyaau.

23 Ti-Baa Unimbɔti nì ti-Dindaan Yeesu Kriisitoo ń tīī nnabiyaamu kɔkɔ ŋgbansɔŋfi, kí yàntī bí nīn néeń tɔb, kí nīn gbíntìi cáá fookii Unimbɔti pu. 24 Unimbɔti ŋanti ń nīn bí bin kɔkɔ cáá ti-Dindaan Yeesu Kriisitoo pu dineendi kaa gbèentée pu.