Eefeesi 5

Binib bin bí ŋwalifi poonee bimbim

1 Ni nín sá Unimbɔti biyaamu mun u néeńee puee, nín̄ bímaan kii úǹ nín bí puee^a. 2 Ní nīn ŋáaḿmaan tikɔkɔ nì dineendi poon, kii Kriisitoo nín néeń-ti pu, ki dū u-ba ki ŋá saraa ki tīī Unimbɔti ti-pu u-saraauee fáatì Unimbɔtee^b.

3 Kɔŋkɔnnee ni sá Unimbɔti yab ní, an puee, an yaa sá tilaakpaal nì tin kɔkɔ pée sá dijɔkɔntundi nì nnimbitaataamee, bí taa gbìl̄ an bɔti pu gba ni-kansikin. 4 An kaa ŋān̄ ní nīn sòoǹ anyɔɔbuŋkpil nì tibɔfan nì icoo bɔti, ama an ŋān̄ yii ní nīn pàkà Unimbɔti ní. 5 Ní nīn nyí yii bin ŋáań tilaakpaal nì tin pée sá dijɔkɔntundee, nì bin cáá nnimbitaataamee: kun puee nnimbitaataam sá kii iwaatootee ní. An nibee kɔkɔ kaa làá dāá kɔ́ Kriisitoo nì Unimbɔti Beelin.

6 Ní taa yàntī báà ubɔ ń dū tibɔfan kí ŋmàtiǹ-ni. An tuŋkpitiŋ pu ní Unimbɔti làá dāá fōō diŋuul bin kaa tɔ́-uee pu. 7 An puee, ní taa cèeǹ bi-ni. 8 Dooooyee, ni nìn dáá bí dibɔmbɔndin ní, ama kɔŋkɔnnee ni kɔ́ ŋwalifin, kun puee ni kpántì ti-Dindaan yab^c. Míǹ puee ni-bimbim ń nīn bí kii bin bí ŋwalifinee bimbim nín bí puee. 9 Kun puee ŋwalifi^d nín tìì tiŋyee di sá tiŋan kamaa nì deedee nì ibaamɔn. 10 Pɔ́ɔm̀maan ni-ba kí béé min fáatì ti-Dindaanee. 11 Ní taa dū ni-ba kí cèeǹ bin sá dibɔmbɔndi^e yab ki tūǹ atuun ŋin kaa cáá ipaatee poon, ama ní nyāntí bi-tuŋkpitiŋ mpaampiin pu. 12 An cáá icoo gba tí sòoǹ bi nín ŋáań tin dibalinee. 13 Bi yaa nyántì tin bi ŋáańee mpaampiin puee, ní ni béetí tin ní an baasii sée. 14 Kun puee tin kɔkɔ nyáń ŋwalifinee ní bi wāĺ, an pu ní an lī yii:

«Sii un gèeǹee, fìntī,

fìntī bitaŋkpiibi kansikin

Kriisitoo ń ŋmíntí-si.»

15 An puee, ní nīn nyí nì ni-ba kí taa fōō bin kaa nyí tibee bimbim, ama ní nīn sá binib bin cáá iciinee. 16 Ní taa nín̄ bíiĺ iyunti kun puee, iyunti in poon ti bí nee, ikpiti wíiǹ tikpil. 17 Ní taa nín̄ sá bigbaambi, ama béémaan ti-Dindaan nín là ní nīn ŋáań miŋyee.

18 Ní taa nín̄ nyù idafi ki gbéè, kun puee an di bíiĺ unil, ama ní nīn gbéèmaan Unimbɔti Fam. 19 Ní nīn gà ni-kansikin ilan in bí Inyɔŋki laŋyi gbɔŋkunee nì Kriisitoo nikitil laŋyi, nì ilan in Unimbɔti Fam tìì-nee, kí nīn cáámaan an laŋyi ki gà ki tìì ti-Dindaan, kí nīn nyɔ́ŋkí-u nì ni-pɔbiliŋ kɔkɔ^f. 20 Nín̄ jáaḿmaan ti-Baa Unimbɔti ti-Dindaan Yeesu Kriisitoo yindi pu ŋyunti kamaa nì tikɔkɔ pu.

Binimpoobi nì bi-calib bɔti

21 Nimbi bin tɔ́ Kriisitooyee, sìntīmaan ni-ba taapu kí tīī man tɔb.

22 Nimbi binimpoobee, sìntīmaan ni-ba taapu kí tīī ni-calib kii ni nín fàŋkí ti-Dindaan puee. 23 Kun puee uninja di sá unimpu yidaaŋwu, kii Kriisitoo nín sá uyidaan ki sá Ufiil ki tīī u-nikitil din sá u-wuntee puee. 24 Míǹ puee, binimpoobi máaǹ kí sìntīǹ bi-ba taapu tikɔkɔ poon kí tīī bi-calib, kii Kriisitoo nikitil nín sīntiǹ di-ba ki tīī-u puee.

25 Nimbi bininjabee, nín̄ néeḿmaan ni-nimpoobi, kii Kriisitoo nín néeń u-nikitil pu ki kpíì di-puee. 26 U ŋá míǹ u-nikitil ń nīn bí circir ní, di sá u fùl̄-bi nnyim^g ní ki dū u-nyɔɔbundi ki ŋáŋkì-bi. 27 Di sá yii u gāntì-bi bí dāan̄ Unimbɔti nimbiin nì kunyaaŋŋu, kí nīn jɔ̀m̀ pɔ́lpɔl kí nīn bí circir, bí taa ká bi-pu tiba. 28 Míǹ mbaantiim ní bininjab mun máaǹ kí nīn néeń bi-nimpoobi kii bi nín néeń bíǹ bi-ba wunti puee. Un yaa néeń u-nimpuuee néeń u-ba dee. 29 Kun puee ubɔ kaa bí ki ná u-ba wunti, ama u kpīintí-tì, ní ki kpèé-tì tiŋan, kii Kriisitoo nín kpèé u-nikitil puee. 30 Di sá yii ti-kɔkɔ túkú u-wunti pu ní, 31 kii an nín ŋmàn̄ Unimbɔti gbɔŋku poon puee yii: «An pu ní uninja dāa nyēē u-baa nì u-na cee, ní u nì u-nimpuu ń nīn kíǹ ki bí, ní bi-liitilee ń kpántí unibaanti^h.» 32 An sá tibɔkpaandi ní dijandi nee dàkà-ti. M làá tùkù-ni yii an sòoǹ Kriisitoo nì u-nikitil pu ní. 33 Ama tin kíǹee di sá yii nimbee, báà ŋma ń nīn néeń u-nimpuu kii úǹ u-bee, ní unimpu mun ń nīn tɔ́ u-cal.