Galaati 6

Tí tūtuǹ tɔb

1 Nnabiyaamu, ni yaa cúú ubɔ bíi ŋáań ikpitee, nimbi bin Unimbɔti Fam kpòotēe ń ŋá soooo kí gíiǹ-u nsammɔnti poon, ní kí nīn kpèé ni-ba tiŋan ki mun ń taa lítí ni-ba. 2 Ní nīn tútúǹ tɔb ni-gìŋ́ŋi poon, mimmee, ni bíi ŋáań min Kriisitoo marau lēe dee. 3 Ubɔ yaa dākafì yii u bí tiban ní kaa bée, udaan kíiĺ u-ba ní. 4 Báà ŋma ń cɔ̄ŋkì u-ba kí kpèè u-tuuŋŋi, ní u yaa làá nín gāā u-bindaaa, ú gāā an nīn sá úǹ u-ba ŋmaniŋma tuuŋŋi pu. Ú taa dū kí ŋmàntīǹ u-jutiibi yaŋ pu. 5 Di sá yii báà ŋma máaǹ kí kpèè u-ba bɔti ní.

6 Un bi yaa dàkà Unimbɔti bɔtee, udaan máaǹ kí lēē u-gaajawanti tin kɔkɔ u cááyee poon kí tīī un dàkà-uee.

7 Taa nín̄ kíiĺmaan ni-ba: baa gbíilíǹ Unimbɔti. Di sá yii kun unil yaa búĺee, kúǹ ní u dāa cēē^a. 8 Un ŋáań min u-bimbikpitim lèe búĺ u-bimbikpitim dee, ní kí dāá cā ŋkúm. Ama un ŋáań min Circir Fam lèe búĺ Circir Fam dee, ní kí dāá cā dimaŋfal din kaa kúntée. 9 Tí taa gīī kí gbèen̄ tiŋan diŋál. Ti-wunti yaa kaa yɔ̄tì, ŋyunti yaa láa bāań, ti làá dāá fōō tipaal. 10 Míǹ puee, ŋyunti ŋun poon ti cáá mpaan nee, tí nīn ŋáań báà ŋma tiŋan, ama cilinjee tí nīn ŋáaḿmaan timbi nì bin pēē nnimbɔtisanee tiŋan.

Isaŋkijoolkaa nì ŋwimmeem

11 Kpèèmaan, m nín dū m-ŋal ki ŋmàn̄ tiŋmaŋmabiti an gbìfì puee! 12 Bin téekí-ni ní gíí dikpancandee là binib ń nīn nyí bi-pu dee. Kun pu bi ŋáań mimmee di sá baa là kí ká digìńdi Kriisitoo dɔpuntikaaŋu pu. 13 Di sá yii bin gífì dikpancandee bi-ba kaa ŋúb̀ Mooyiisi marab. Kun pu bi là ní gííyee di sá bi là kí gāā bi-biŋŋi yii, ni-wunti daaŋku nee, bíǹ di páb́-ni ní ni ŋá. 14 Maa là kí gāā m-bindi tiba pu kpataaa an yaa kaa sá ti-Dindaan Yeesu Kriisitoo dɔpuntikaaŋu baba pu. Man ceeyee duulinya kpíì ndɔpuntikaa pu, ní duulinya ceeyee ma mun kpíì ndɔpuntikaa pu. 15 A yaa gíí dikpancandaaa, a yaa kaa gííyaaa, an kaa páb́, tin páb́ee di sá á kpántí unipɔɔn. 16 Bin kɔkɔ làá nóó min m lī nee, Unimbɔti ń tīī-bi ŋgbansɔŋfi kí sɔ̄ bi-saai, ki kpáaǹ bin sá Isirayeel yab kiŋkiŋ Unimbɔti nibulee.

17 Kí pée yòon̄ díǹ kí nīn cá, ubɔ ń taa ti ŋá-mi digìńdi, kun puee m-wunti buŋwati di sá Yeesu daanti.

18 Nnabiyaamu, ti-Dindaan Yeesu Kriisitoo ŋanti ń nīn bí ni-pu! Ameeni.