Galaati 5

Ní taa fá ni-batɔl

1 Kriisitoo nyántì-ti kuyuŋun tí nīn tɔ́ ti-ba ní. Míǹ puee, ní nīn bímaan dibatɔlee ni, kí taa gíti kɔ́ kuyuŋun.

2 Ní pīlifìmaan-mi! Man Pɔɔl bíi tùkù-ni yii, ni yaa yāntì bi gíí-ni dikpancandee, naa ti bíi páatí tiba Kriisitoo pu. 3 M làá gíti bùsì kí tùkù uninja sá kamaa yii, un yaa yāntì bi gíí-u dikpancandee, an bàlifī ú nīn ŋúb́ Mooyiisi marab kɔkɔ ní. 4 Nimbi bin kɔkɔ nyàab̀ kí nīn bí deedee Unimbɔti nimbiin nì marab ŋúbitam puee, ni nì Kriisitoo yākatì tɔbin, ni nyáń Unimbɔti bìintamin. 5 An yaa sá timbee, ti máká ní ki kā ki cí kí kpántí deedeedambi Unimbɔti nimbiin, kun puee ti fōō Kriisitoo ki kíí ní Unimbɔti Fam bí ti-ni. 6 A yaa kpántì Yeesu Kriisitoo yɔuee, a yaa gíí dikpancandaaa, a yaa kaa gííyaaa, an kaa páb́, kun di páb́ee di sá a-fookiiu ń nīn tūǹ ditundi nì dineendi.

7 Ni nìn còom̄ tiŋan. Ŋma di pīiǹ-ni nsan ní gbèen̄ kí taa ti gbìl̄ kí tīiǹ ibaamɔn ní? 8 An kaa sá un di yíì-ni ní nīn nóó-uee cee ní tíǹ nyánní. 9 Ŋkpɔnɔnyɔkɔ fiii di yàntī kpɔnɔ saabu kɔkɔ jɔ́ḿ^a. 10 Ama man máká ni-pu yii ti-Dindaan puee, naa làá kpántí ni-landɔkɔi. Un di yaa cáań fìkil fikil ni-kansikinee, báà udaan yaa yāntì ki sá un, ditafadaaldi dɔ̄ ki cí-u.

11 Nnabiyaamu, m yaan bíi tùkù binib yii an máaǹ bí gíí dikpancandee, ba pu ní bi bàà gíti páb̀-mi? M yaan lī míǹ, Kriisitoo dɔpuntikaaŋu bɔti kaa bàà sá tibɔti tin páb̀ binibee. 12 M bàà là bin páb́-ni ní gííyee ń cù bí fàatī-bi.

13 Míǹ puee, nnabiyaamu, ni ká yii Unimbɔti yíiń nimbi ní nīn bí dibatɔlin. Ní taa lákatí dibatɔlee pu kí nīn ŋáań min ni-bimbikpitim lèe, ama ní nīn néeń tɔb kí nīn tútúǹ tɔb. 14 Di sá yii marab kɔkɔ taapu di sá unee, yii: «Á nīn néeń a-juti kii sii a-bee^b.» 15 Ama ní kpèè tiŋan: ni yaa bí ki júntí tɔb ki cátikí tɔbee, ni làá kúntí tɔb dee.

Tí yàntī Unimbɔti Fam ń kpòotī-ti

16 Tin m tùkù-nee di sá yii ní yàntī Unimbɔti Fam ń kpòotī-ni, kí taa nín̄ nóó min ni-bimbikpitim bàlifēe. 17 Di sá yii, ti-bimbikpitim nín là min miŋyee, Unimbɔti Fam kaa là míǹ, ní min min Unimbɔti Fam lèe, ti-bimbikpitim mun kaa là míǹ. Tiwan tilee jáaǹ tɔb ní. An di yì-tì ní taa ŋūǹ kí ŋá min ti bàà là kí ŋée^c. 18 Ama Unimbɔti Fam yaa kpòotī-nee, naa ti bí Mooyiisi marab taapu.

19 An kaa pɔ̄ɔ̄ tí béé mbimbikpitim nín tūǹ atuun ŋin ti-wuntinee: an di sá tilaakpaal, tijɔkɔndi, bimaramɔntiibi fátam, 20 diwaatootil, dinyɔɔjil, kináŋ, kujaau, kudɔ̀ŋu, diŋuul, ikummunti, diyakatil, digàntil, 21 nnimbidiki, ndanyoon, mpoo, nì tin kɔkɔ náań nì tibɔti neeyee. Kii m nín nìn tùkū-ni puee, m tí bíi kpáafí-ni yii bin ŋáań an bɔti gbantee kaa dāa kóò Unimbɔti Beelin.

22 Ama, dibil din Circir Fam yàntī unil ń lòoǹee di sá dineendi, dipɔɔpindi, ŋgbansɔŋfi, kimɔtii, á nīn sūǹ binib saai, kí nīn ŋáań tiŋan, kí nīn bí deedee, 23 kí nīn mɔ̄, kí ŋúb́ a-ba. Mara ubɔ kaa bí ki jáà nì an bɔti gbanti. 24 Di sá yii Yeesu Kriisitoo yab dū bi-bimbikpitim nì tin mì néeń ki lèe ki kpáá ndɔpuntikaa pu. 25 Ŋfam nín tīī-ti dimaŋfalee, tí yàntī Ŋfamee ń nīn kpòotī ti-bimbim mun. 26 Tí taa nín̄ yòontí ti-ba yilpu, kí taa nín̄ tákà tɔb tibɔti, kí taa nín̄ cáá ipoompoon tɔb pu.