2 Kɔranti 12

Aleedaka ŋin Pɔɔl kée

1 Míǹ puee ḿ nīn lámintáa! An kaa tútúǹ-ni. M làá tùkù-ni tin ti-Dindaan lēē ki dàkā-mi ki yāntì m béèyee. 2 M nyí kijapaai kiba, u nóó Kriisitoo. An nìn yōoǹ-u ki cáa jɔ́m̀ kutagbɔŋu yilpu yilpu fɔ́ŋŋŋ Unimbɔti cee dibindi diba kpá saalku sèé. (Ama maa nyí yii u nìn jɔ́m̀ nì u-wuntaaa, an kaa sá nì u-wunti, Unimbɔti baba di nyí.) 3 Tiŋman m nyí yii kijapaayee nìn jɔ́m̀ áli Unimbɔti Beelin^a. (Ama maa nín nyí yii an yaa nìn sá nì u-wuntaaa, an yaa kaa sá nì u-wunti, see Unimbɔti di nyí.) 4 Niin ní u gbìl̄ tibɔti tin unil kaa ŋūǹ kí fàtīí gíiǹ-tì kí lèe, kaa máaǹ kí dū-tì kí tùkù ubɔ muee. 5 An japaakee pu ní m máaǹ kí nīn lámintí, kaa sá man m-ba pu. M yaa làá tí lāmintàaa, see m-wɔfii pu. 6 M yaa bàà là kí pàkà m-bee, maa bàà sámaan uwaati, m bàà sòoǹ ibaamɔn ní. Ama maa là kí pàkà m-ba, kun puee maa là binib ń dàkafì m-pu ŋkpaamin bi nín wāĺ m ŋáań tiŋyee nì tin bi gbìl̄ m sòoǹee pu.

7 Kí wàatī ḿ taa dū tin Unimbɔti yāntì m béè an kaa bí dimaafilee kí ŋá dilambilee, ní u dū iween iba ní ki ŋá m-wunti pu. Iweenee sá kii Sitaan tuuŋŋuee ní ki gbáà-mi, án nín làá ŋá pu ḿ taa nín̄ cáá dilambilee^b. 8 Ŋfunyɔm mita ní m mēē ti-Dindaan iween gbanti pu, yii ú lēē-i m-pu. 9 Ní u kíí-mi yii: «M-ŋanti tin m ŋáań-see ŋmāntì-si, kun puee sii wɔfii pu ní man dì ki dàkà m-pɔŋŋu.» Míǹ puee an mɔ̄ǹ-mi ḿ nīn pàkà m-ba m-wɔfii pu, án nín làá ŋá pu Kriisitoo pɔŋŋu ń nīn tūǹ m-pu ditundee. 10 An pu ní m-wɔfii bɔti mɔ̄ǹ-mi. Bi nín sìí-mi puee, nì falaa un m jīǹee, nì bi nín páb̀-mi puee, nì dinimbinaamandi din m kāntée, Kriisitoo pu ní tíǹ kɔkɔ bàń m-pu míǹ, kun puee iwɔfi yaa kɔ́-mee, míǹ ní m kāntí mpɔn.

Pɔɔl bíi yáliŋkí Kɔranti yab pu

11 M yaa bíi sòoǹ kii uwaatee, nimbi di yāntì m sòoǹ míǹ, di sá yii nimbi di bàà máaǹ kí sòoǹ kí mɔ̄tì m-pu. Báà m yaa kaa bí tibanaaa, ni-kpambamɔntiŋee kaa jítiǹ-mi tiba nì tiba poon. 12 Maamaacib nì tidaandi tin Unimbɔti pɔŋŋu yāntì m ŋá nì kimɔtii tikɔkɔ poon ni-ceeyee dàkà yii m sá Yeesu kpambal. 13 Ba ní m ŋá ki tīī Kriisitoo nikitiŋ ŋin kíǹee ní kaa ŋá ki tīī nimbi. Tin baba maa yāntì ní ŋá kí tīī-mee di sá ni nín kaa kpíiǹ-mee, an puee ní dū m-yìntitam kí pɔ̄-mi!

14 M tí bɔ́ntì kí dāan̄ ni-cee ntataatiim. Nimbi di kaa làá nīn yì m-jītam, di sá yii nimbi ní m là, kaa sá ni-nimbiliŋ. Kun puee an kaa sá mbiyaamu di kpīintí bibaatiibi, ama bibaatiibi di kpīintí mbiyaamu. 15 Mamee, an mɔ̄ǹ-mi ḿ dū tin kɔkɔ m cááyee kí kúntí ni-pu kí kpáaǹ m-ba kí tūtuǹ-ni. Man yaa néeń nimbi míǹ tikpilee, nimbi kaa làá nīn néeń-maaa?

16 Nimbi ni-ba, ni làá ká yii maa sá digìńdi ki tīī-ni, ama biba lì yii an sá nciin ní m ŋá kí ŋmàtiǹ-ni kí jī. 17 M dī bin m túnní ni-ceeyee ubɔ pu ki jíń-ni tibaaa? 18 Man nín dū Tiiti nì kinabiki kiba ki tú bí cù ni-ceeyee, bi jíń ni-wanti tibaaa? Man nì Tiiti landɔkɔŋu sá mbaanti ní, ní ti-ŋáaǹtam mun mbaantiim.

19 An yaa yíì ni pée kíĺ ki dàkafī dooooyee yii ti là ní nīn yíì-ti binimɔntiibee pu ní m sòoǹ míǹ? Aayee, kaa sá míǹ. Ti sòoǹ min Kriisitoo lèe ní Unimbɔti nimbiin. Nnabineeŋkaamu, tin kɔkɔ ti sòoǹ nì nee, an sá kí tūtuǹ-ni ní cù nyɔkɔpu nnimbɔtisan poon ní. 20 M fàŋkí yii ḿ taa láa bàń ni-cee kí ká-ni min poon maa bàà lèe, ni mun ń ká man min poon naa bàà lèe. Maa là kí bàń kí ká-ni kujaau nì kináŋ nì diŋuul nì timɔn nì asiibil poon. Maa tí là kí bàń kí ká ni sòoǹ fám fám nì dilambil ki bí fìkil fikil poon. 21 M fàŋkí yii m-dāantam ni-ceeyee, m-Nimbɔtiu ń taa sìntīǹ-mi taapu ni-cee ḿ sɔ̄ bin nìn ŋá ikpiti ki gbíntì ki ŋúb́ bi-bimbikpitim, tijɔkɔndi nì tilaakpaalee pu.