Atuun 23

1 Ní Pɔɔl dū u-nimbikpeeŋu ki báaǹ bikpilibee pu, ní ki bí-bi yii: «M-nabiyaamu, m nyí yii m ŋáaǹ tin kɔkɔwoooo m máaǹ kí ŋá kí tīī Unimbɔtee nì dipɔbil diba, ki dāa sāā díǹ wiiŋŋu nee.» 2 Niinee ní usaraaŋakpil, un bi yíì Ananiyasee, bí bin yú ki pìl̄-uee yii bí cùú fáá u-nyɔkɔ. 3 Ní Pɔɔl bí yii: «Unimbɔti làá dāá fáá si mun, upɔnyɔŋfiti^a! Sii kā ki cáá marab ki sòoǹ man bɔti, ki yìntī marab gbanti a-ba ní ki cáá yii bí gbá mama!» 4 Ní bin nìn yú ki kɔ́ĺ Pɔɔlee bí-u yii: «Mimmee, a bíi sìí Unimbɔti saraaŋakpiliu deeyaa!» 5 Ní Pɔɔl fātìi kíí-bi yii: «M-nabiyaamu, maa nyí yii an sá usaraaŋakpil. An yaa sá fam, maa bàà sòoǹ míǹ, kun puee Unimbɔti gbɔŋku poon tùkù-ti yii: <A taa sòoǹ ni-bɔtiu bɔfam^b.>»

6 Pɔɔl nìn nyí yii bibɔsoonliibee jandi diba sá Sadusab ní dijandi diba mun sá Fariisab. Míǹ pu ní u nìn téeń samaayee nimbiin yii: «M-nabiyaamu, ma mun sá Fariisa ní, Ufariisaja di màl̄-mi^c. Dimákal din m cáá bitaŋkpiibi fìkititam puee di yì-tì ní bi cáań-mi doo kí sòoǹ m-bɔti!» 7 U lī míǹ ki dóòyee, ní kunikpɔŋkpɔkɔu kɔ́ Sadusab nì Fariisab kansikin, ní samaa gbanti cúu yākatì tɔbin. 8 Di sá yii Sadusab, bíǹ bí yii bitaŋkpiibi gíti kpá kí dāá fìkitī, Unimbɔti tuuŋyi kpá, kinaŋ mun kpá, ama Fariisab, bíǹ bí yii tíǹ kɔkɔ bí^d. 9 Niinee ní kujakpaaŋŋu jéetì bi-kansikin, ní bimaradakaliibi bin nìn sá Fariisab jandi púee biba yíkì, kaa kíí, ki bíi mɔ́tí yii: «Timbi kaa ká kijapaai nee ŋá tiba. An yaa yíì, Unimbɔti tuuŋŋu di làá nīn máaǹ ki sòon̄ nì u.» 10 Kunikpɔŋkpɔkɔu mɔ̄tìi pɔ́ɔkèe, ní usoojakpikpaan fāŋkì yii bí taa ŋée kí cúú Pɔɔl kí tɔ̀ntī. Ní u yāntì soojab kpákatìi cúú Pɔɔl ki nyántì bi-kansikin, ki cáa cūnnì soojab dumpu. 11 An nyeekuee, ti-Dindaan dɔ́miń Pɔɔl cee, ní ki bí-u yii: «Pɔ́ɔǹ a-ba! Kii a nín sòon̄ m-pu Jeerusaleem doo puee, án máaǹ á cù Room mun kí tin sòoǹ m-pu niin mbaantiim míǹ.»

Juuda yab bíi nyàab̀ isan kí kpɔ̀ Pɔɔl

12 Kutaa wúntèe ní Juuda yab kpáfì kinyɔkɔ ki pūtì Unimbɔti yii, bi yaa kaa kūū Pɔɔl, baa làá jāaa, kaa làá nyɔ̀ mun. 13 Bin nìn kpáfì kinyɔkɔ ki pūtì mimmee nìn jítì binib imuŋku ili pu. 14 Ní bi cūtìi ká bisaraaŋakpilib nì bikpilib, ní ki bí-bi yii: «Timbi baasii pūtì ki tíntì yii, ti yaa kaa kūū Pɔɔl, taa làá dáká tiba. 15 Míǹ puee, nimbi nì bibɔsoonliibi kitil kɔkɔ, ní mèè usoojakpikpaan ú cáań-ni Pɔɔl, yii nimbi là kí mɔ̀tīí bàlifì-u tin páaa ní u baasii ŋée. Mimmee, timbi ń bɔ́ntí, bi yaa cáá-u ki tóobińee, timbi ń kíntí kí kpɔ̀-u!»

16 Niinee, Pɔɔl niisal biki gbìl̄ bi nín kpáfì ki sòon̄ tiŋyee, ní u búntì soojab dumpu ki kɔ́ ki tùkū Pɔɔl tin jítèe. 17 Ní Pɔɔl yíiń bisoojakpilibee ubɔ ní ki bí-u yii: «Cáá kinaacimpɔmbiki nee kí cùnnì usoojakpikpaan cee, kun puee kì cáá tiba ki là kí tùkù-u.» 18 Ukpilee yōoǹ-kì ki cáá-kì ki bàn̄ usoojakpikpaanee cee, ní ki bí yii: «Usarkadaan Pɔɔl di yíiń-mi ki gbāam̀ yii ḿ cáań-si kinaacimpɔmbiki nee, kì cáá tiba ki làá tùkù-si.» 19 Niinee ní usoojakpikpaanee cúú kinaacimpɔmbikee ŋal ki kpáàa kākatì ŋkpaanceeti, ní ki bí-kì yii: «Tilati ní a cáań ní?» 20 Ní kì kíí-u yii: «Juuda yab kpáfì kí mèè-si yii á cáań-bi Pɔɔl bibɔsoonliibi kitil nimbiin, bi là kí ŋá kii bi làá gíti mɔ̀tīí bàlifì-u tibɔti tiba yamee. 21 Á taa pīlifiǹ-bi! Di sá yii bi-kansikin binib imuŋku ili nì ipaa pūtì yii, bi yaa kaa kūū Pɔɔl, bíǹ kaa làá jāaa, kaa làá nyɔ̀ mun. Bi bɔ́ntì kí báĺ kí cīití-u. Míǹ puee, bi kíǹ ki cí tin sii cááyee ní nee.» 22 Niinee, usoojakpikpaanee bí kinaacimpɔmbikee yii: «Nín̄ kùǹ. Á taa sòoǹ ubɔ cee yii a tùkū-mi tibɔti gbanti!»

Bi dū Pɔɔl ki tīī gɔmina Feeliikisi

23 Boonee ní usoojakpikpaanee yíiń bisoojakpilib bili, ní ki bí yii bí kpāfì soojab kulaafaau nì soojab bin cáá itaamuee imuŋku ita nì saalaa, nì soojab bin tòó ŋkpamuee mun kulaafaau, bí bɔ́ntí kí nīn cá Seesaaree tikúti tiwa kunyeeu nee. 24 Bí nyàab̀ itaamu kí kàan̄ Pɔɔl, kí cáá-u kí bànnì gɔmina Feeliikisi cee nì alaafiya. 25 Ní usoojakpikpaanee ŋmàn̄ kugbɔŋu ki tīī gɔmina yii: 26 «Man Kloodi Liisiyasi di jáaḿ m-kpiliu gɔmina Feeliikisi. 27 Di sá yii Juuda yab di cúú uninja nee ki là kí kpɔ̀-u. M nín gbìl̄ yii u sá Room tindambikee, ní man nì m-soojab cūtìi fōoń-u. 28 M nìn là kí béé kun pu ní Juuda yab ŋúb́-u mimmee, ní m cáá-u ki cūnnì bi-bɔsoonliibi kitil cee. 29 Niinee ní m ká yii bi bí yii u yīntì bi-marab, ama an kaa sá tibɔti tin pu u máaǹ ŋkúmeeyaaa, kaa tí máaǹ sarka mun. 30 M nín dāa béè yii Juuda yab kpáfì ki nyàab̀ isan kí kpɔ̀-uee puee, ní m dū-u ki tīiń-si malaa, ní ki bí u-nannanliibi yii bí dāan̄ kí yíiń-u a-cee ibeeyiin.»

31 Soojabee lafun ŋá u nín lī puee, ki yōoǹ Pɔɔl ki cáá-u ki bānnì áli Antiipatriisi kunyeeu gbanti. 32 Ku wúntèe ní soojab bin nìn còom̄ ataa puee nín gítiń, ní itaamu dambee kpáaǹ Pɔɔl ki cáa nín cá. 33 Bi bàn̄ Seesaareeyee, ní ki dū kugbɔŋu ki tīī gɔmina, ní ki dū Pɔɔl ki dàkā-u. 34 Gɔmina kàan̄ kugbɔŋuee ki dóòyee, ní ki bālifì Pɔɔl yii u sá kitiŋ kilaka ní. Ní Pɔɔl bí-u yii u sá Siilisii. U béè mimmee, 35 ní ki bí yii: «Si nì bin kpákèe yaa láa bāańee, á dāá sòoǹ tin a cááyee ḿ pīlifì.» U lī mimmee ní ki bí yii bí cáá-u kí cùnnì ubɔti Eeroodi dumpu.