Atuun 14

Pɔɔl nì Baarnaabaasi bí Ikooniyum

1 Ikooniyum tiŋkinee, Pɔɔl nì Baarnaabaasi tí kɔ́ Juuda yab kpafidiikun mbaantiim, ki sòon̄ tiŋan, áli binib tikpil, Juuda yab nì Greeki yab, fōō ki kíí. 2 Ama Juuda yab bin kaa fōō ki kííyee téé bin kaa sá Juuda yabee bí cùú ŋá Pɔɔl nì Baarnaabaasi tin kaa ŋān̄ee. 3 Nì míǹ kɔkɔee, Pɔɔl nì Baarnaabaasi kāl̀ ki yúntì Ikooniyum ki sòon̄ ti-Dindaan bɔti, kaa fàŋkí, ní ti-Dindaan yāntì bi ŋáań tidaandi nì maamaacib kí dàkà yii bi nín sòoǹ u-ŋanti puee, an sá ibaamɔn. 4 Ní kitiŋin yab cúu yākatì mili: biba bí Juuda yab jandi pú, ní bin kíǹee mun bí Yeesu kpambaliŋ jandi pú. 5 Ní Juuda yab nì bin kaa sá Juuda yabee, ki kpáaǹ bi-bɔtiibi, kpáfì ki bíi bɔ́ntí ki là kí sàaǹ-bi, kí yāŋkì-bi ataŋkpee kí kpɔ̀. 6 Pɔɔl nì Baarnaabaasi béè mimmee, ní ki sáǹ ki búntì ki tin bàn̄ Liista nì Deebi, ntimu mun bí Liikayoonii tiŋkinee, nì mu-kpaanceetii. 7 Bi nìn bí niin ní ki sòoǹ Yeesu bɔmɔntiiti.

Pɔɔl nì Baarnaabaasi bí Liista

8 Ufaliŋfaan ubɔ nìn bí Liista. Bi pée màl̄-uee, u-taaŋi fáká ní waa cōom̀ ki ká. 9 Dalba uninjee bíi pílifí Pɔɔl nyɔɔbundee, ní Pɔɔl dū u-nimbikpeeŋu ki báaǹ u-pu, ki béè yii u cáá fookii Unimbɔti pu ki ŋūǹ kí ká dicáaǹdee, 10 ní u téeń mpɔn yii: «Yīkìí yūĺ mɔ́lmɔl a-taaŋi pu!» Ní u nyīī ki yíkì kùrub ki bíi còom̄. 11 Samaa nìn ká min Pɔɔl ŋée, ní bi bíi tátí nì Liikayoonii sooŋyin yii: «Awaa aba kpántì binib ki kpákatìń ti-cee!» 12 Ní bi pú Baarnaabaasi diyindi yii Seeyusi, ní ki pú Pɔɔl mun yii Eermeesi^a, kun puee úǹ di nìn sòoǹ nì samaa. 13 Ní utandaan un nìn tòotī diwaal din bi yíì Seeyusi, di-diiku yú kitiŋ kpaanceetiŋuee, dūń nsupumpukum ^b ki léeǹ inajaa ki cáań kitiŋ punyɔkɔpu, u nì samaa là kí dūú tòotī-bi. 14 Yeesu kpambaliŋ Pɔɔl nì Baarnaabaasi gbìl̄ mimmee, an wùn̄-bi, ní bi cátì tiwan tin bi pēēyee ki sáǹ ki nín cá samaayee kansikin ki tátí yii: 15 «Ti-yab, ba ŋá ní ni ŋáań míǹ? Ti mun pée sá binib kii nimbee ní, tiwumbaantiil. Ti bíi tùkù-ni Tibɔmɔntiil yii ní fá ni-waaŋi gbanti ŋin sá fámee kí nóó Unimbɔti un bée. Úǹ di náań yilpu nì taapu nì tiŋku, nì tin kɔkɔwoooo pée bée^c. 16 Ŋyunti ŋun jítèe, u nìn yāntì ditimbundi kamaa nóó di-saŋŋu. 17 Nì míǹ kɔkɔee, u dàkā-ŋi u-laŋŋaŋfitiiku. Di sá yii u yàntī utaa nì^d, tiwan lòoǹ, tijikaal gbóotí ki tìì-ni dipɔɔpindi.» 18 Mpɔn nì mpɔn ní Yeesu kpambaliŋ dū tibɔti gbanti ki dūu pīiǹ samaa nsan bí taa ŋmā kí tòotī-bi.

19 Boonee, Juuda yab biba nyánní Antiyɔɔsi nì Ikooniyum ki ŋúń ki ŋmātiǹ samaa. Bi nìn yáŋkì Pɔɔl ataŋkpee ki fùn̄-u ki cáa bíl̀ kitiŋ boon ŋkpaanceeti, ki dàkafī yii u kpíì. 20 Ama Kriisitoo yab dāa dɔ́miń ki māntìi tú-u, ní Pɔɔl yíkì ki nín cá kitiŋin. Kutaa wúntèe, ní u nì Baarnaabaasi búntì Deerbi.

Pɔɔl nì Baarnaabaasi nín gítí Antiyɔɔsi Siirii tiŋkin

21 Bi sòon̄ Tibɔmɔntiil kitiŋ gbantin ki yāntì binib tikpil kpántì Kriisitoo yab. Boonee ní bi nín gítiń Liista, Ikooniyum nì Antiyɔɔsi. 22 Bi nìn tìì Kriisitoo yab kunyannyaau, ki sáŋkí-bi yii bí nīn pɔ̄ɔntí bi-ba fookii poon, ní ki bí-bi yii: «An sá nì falaakpaan ní tí nín ŋmā kí kɔ́ Unimbɔti Beelin.» 23 Bi nìn lēekì bikpilib Kriisitoo nikitil sá kamaa poon. Bi bóob́ kinyɔkɔ ki mēē ki dóòyee, ní ki dū-bi ki ŋá ti-Dindaan un bi fōō ki kííyee ŋaan.

24 Bi dīń Piisidii puee, ki bāań Paŋfilii. 25 Bi sòon̄ Unimbɔti bɔti Peeji ki dóòyee, ní ki nín sìntī Atalii. 26 Niin ní bi kɔ́ meela ki búntì Antiyɔɔsi, laakin Kriisitoo yab nìn mēē Unimbɔti ń tūtuǹ-bi atuun ŋin bi túńee puee. 27 Bi bàn̄ee ní ki kpáfì Kriisitoo nikitil ki máafì tin kɔkɔwoooo Unimbɔti ŋá ki tīī-bee, nì min ní u pīitì nsan bin kaa sá Juuda yabee kɔkɔ ń fōō kí kííyee. 28 Bi nìn kāl̀ ki yúntì fiii Kriisitoo yab cee.