Yoowaneesi 16

1 «M sòon̄ nì ni tin bí nee án nín làá ŋá pu ní taa láa fá ni-fookiiu m-puee. 2 Bi làá dāá jà-ni kí nyāntí akpafidiinni, áli gba, ŋyunti ŋubɔ bí ki dòoń bi làá kpɔ̀-ni ki dàkafī yii bi ŋá Unimbɔti lammi. 3 Kun pu bi làá ŋá mimmee di sá yii baa nyí m-Baayaaa, kaa nyí ma mun. 4 Ama m tùkū-ni tin bí nee, ní ti-yuntiŋu yaa láa bāańee ní dāá téetí yii m nìn pée tùkū-ni-tì.

Circir Fam tundi

«Maa tùkū-ni tin bí nee doooo ŋkilkaamin kun puee m dáá bí ni-ceeyee pu. 5 «Kɔŋkɔnnee, m làá nīn cá un túnní-mee cee, ní ni-kansikin ubɔ kaa bālifì-mi yii: <A cá la?> 6 M nín sòon̄-ni puee ní kunimbaau kɔ́-ni. 7 Ama, ibaamɔn ní m sòoǹ nì ni, m nín cá m-Baa ceeyee, an sá ni-paatii, kun puee m yaa búntèe, m làá tɔ̄ń Ututunli ni-cee. M yaa kaa yíkì, waa làá dāan̄ ni-cee. 8 U yaa láa bāańee, u làá yàntī duulinya nib ń béé yii bi bí ikpitin, kí yàntī bí béé kun di sá deedeeyee, kí yàntī bí béé Unimbɔti bɔsooŋyi in dɔ̄ ki cí-bee^a. 9 U làá yàntī bí béé yii bi bí ikpitin, kun puee baa fōō-mi ki kíí, 10 ki làá yàntī bí béé kun sá deedeeyee, kun puee m nín cá m-Baa cee ní naa làá ti wāl̀-mi, 11 ní ki làá yàntī bí béé yii ibɔsoon dɔ̄ ki cí-bi, kun puee Unimbɔti sòon̄ duulinya bɔtiu bɔti.

12 «Tibɔti tikpil bàà bí ḿ sòoǹ nì ni, ama tì jítiǹ-ni kɔŋkɔnnee. 13 Ama Unimbɔti Fam ibaamɔndaanee yaa láa bāańee, úǹ di làá dàkà-ni ibaamɔn kɔkɔ. Waa làá sòoǹ u-ba pɔŋŋu pu, u làá dāá tùkù-ni tin tin u gbìl̄ee, kí dàkà-ni tin bí ki dòońee. 14 U làá dāá tīī-mi tinyool, kun puee u làá dāá fōō tin tin m cááyee kí tùkù-ni. 15 Tin kɔkɔ m-Baa Unimbɔti cááyee sá ma mun wanti ní. An pu ní m tùkū-ni yii Unimbɔti Famee làá dāá fōō tin m cááyee kí tùkù-ni.»

Dinimbinaamandi làá kpántí dipɔɔpindi

16 «An kíǹ fiii, naa làá ti ká-mi, ní an yaa láa tí kútì fiii boonee, ní ni làá fàtīí tí ká-mi.» 17 Niinee ní u-boonnooliibi biba bíi lì tɔb cee yii: «Taapu nín sá yii ba dee, yii: <An kíǹ fiii naa làá ti ká-mi, ní an yaa fātìi kútì fiii boonee, ní ni làá fàtīí tí ká-mee?> U gíti lī mun yii: <M cá m-Baa cee>. Mimmee, u là kí tùkù-ti yii ba dee? 18 <An kíǹ fiii> gbanti taapu baasii nín sá yii ba dee? Taa gbìl̀ tin u là kí sòoǹ nì ti nee taapu!» 19 Yeesu béè yii bi là kí bàlifì-uee, ní u bí-bi yii: «M nín bí yii: <An kíǹ fiii naa làá ti ká-mi, ní an yaa fātìi tí kútì fiii boonee, ní ni làá fàtīí tí ká-mee> pu ní ni bíi bàlifī tɔb naaa? 20 Ibaamɔn, ibaamɔn ní m sòoǹ nì ni, ni làá dāá nīn sūǹ ki tíminsí ní duulinya yab fàal̀. Ni làá dāá nīn bí dinimbinaamandin, ama ni-nimbinaamandi làá dāá kpántí-ni dipɔɔpindi. 21 Imatiŋween yaa bāań unimpuee, u kíǹ ki bí dinimbinaamandin ní, kun puee u-falaau yuntiŋu bāań-u. Ama u yaa màl̄ ki dóòyee ní án mɔ̄ɔkiǹ-u, ní ú súntí u-falaau pu, kun puee u màl̄ unil. 22 «Míǹ mbaantiim ní ni mun bí dinimbinaamandin kɔŋkɔnnee. Ama m làá dāá fàtīí gíti ká-ni ní ni-pɔbiliŋ ń pīil̀. Báà ubɔ kaa dāa ŋūǹ kí lēē ni-pɔɔpindi gbanti.

23 «An wiiŋŋu gbantee, naa dāa gíti bàlifī-mi tiba nì tiba pu. Ibaamɔn, ibaamɔn ní m sòoǹ nì ni, tin kɔkɔ ni yaa mēē m-Baa m-yindi puee, u làá tīī-ni kudɔŋu. 24 Áli nìn díǹee, naa láá mēē m-yindi pu tiba, mèèmaan tiba, ni làá fōō kudɔŋu, ni-pɔbiliŋ ń mɔ̀tīí pīil̀.»

Yeesu jáń ki pɔ́ɔkiǹ duulinya

25 «Tibɔŋmantikaal ní m cáa bíi sòoǹ nì ni tin bí nee kɔkɔ. Ŋyunti ŋubɔ dòoń ŋun ni maa làá gíti dū tibɔŋmantikaal kí sòoǹ nì nee. M làá dāá sòoǹ m-Baa Unimbɔti pu kí cántí. 26 Ŋwiin gbanti yaa láa bāańee, ni làá dāá nīn mèé m-Baa Unimbɔti man yindi pu. Maa bí yii man di làá dāá nīn mèé m-Baa ni-pu, 27 kun puee m-Baa Unimbɔti u-ba néeń-ni. U néeń-ni kun puee ni néeń man ki fōō ki kíí yii m nyánní Unimbɔti cee. 28 M nyánní m-Baa cee ní ki dɔ́miń duulinyan. Kɔŋkɔnnee m làá fàtīí yīkì duulinyan kí nīn gítí m-Baa cee.»

29 Niinee ní u-boonnooliibi bí yii: «An kaa sá nì tibɔŋmantikaal ní a cáa bíi sòoǹ nì ti nee, min bí nee a baasii bíi sòoǹ ki cántí-ti ní nee. 30 Kɔŋkɔnnee ti nyí yii a nyí tikɔkɔ, an kaa ti páb́ yii ubɔ ń bàlifì-si tiba. An pu ní ti fōō ki kíí yii a nyánní Unimbɔti cee.» 31 Ní Yeesu kíí-bi yii: «Ni fōō ki kíí kɔŋkɔnneeyaa! 32 Too, ŋyunti ŋubɔ dòoń, ŋu bāań gba, ŋun ni ni-kɔkɔ làá sāǹ kí yàl̄ ni-ba ni-ba kí kíń man babee, ama maa bí m-baba nì m-baba, m-Baa bí m-cee. 33 M tùkū-ni tin bí nee án nín làá ŋá pu man puee, ní nīn cáá ŋgbansɔŋfee. Falaa dɔ̄ ki cí-ni duulinyan doo ní jī, ama ni-wunti ń taa yɔ̀tī! Di sá yii m jáń ki pɔ́ɔkiǹ duulinya.»