Maarki 7

Juuda yab yaajakoobiliŋ

(Kpèè Maat 15.1-9)

1 Fariisab nì bimaradakaliibi biba nìn nyánní Jeerusaleem ki dɔ́miń ki kpáfì Yeesu cee. 2 Bi bí niinee, ní ki ká Yeesu boonnooliibi biba jīǹ, kaa fíntì bi-ŋalii kii bi-yaajakoobiliŋ nín sá puee. 3 Di sá yii Fariisab nì Juuda yab bin kíǹee kɔkɔ yaa kaa fíntì bi-ŋalii tiŋan, kii bi-naanjab nín nìn ŋáań puee, baa jīǹ^a. 4 Bi yaa tí nyánní kitiŋin ki bāańee, baa tí jīǹ asee bí fíntí bi-ba nì nnyim kí wàatī, ní kí nín jī. Bi cáá akoobil tikpil ki kútì ŋin bí nee pu: ŋiba sá bí fíntí kɔŋkɔmbi, kí fíntí aboon nì asambil.

5 Tíǹ pu ní Fariisab nì bimaradakaliibee nìn bālifì Yeesu yii: «Ba pu ní a-boonnooliibi kaa ŋúb̀ ti-yaajakoobiliŋ, kaa fíntí ki jīǹ?» 6 Ní Yeesu kíí-bi yii: «Mpoonnyoondambi, an pu ní Unimbɔti bɔnaatiliu Yeesaya ŋmàn̄ u-gbɔŋkun ki sòon̄ ni-pu yii Unimbɔti bí yii:

<Binib nee nyɔ́ŋkí-mi nì bi-nyɔmmun fám ní.

Ama bi-pɔbiliŋ dátiǹ-mi.

7 Bi jáaḿ-mi fám ní,

kun puee tin binib náańee ní bi dàkà, ní ki cáa yíì man marab.^b>»

8 Ní Yeesu nìkī ki lī-bi yii: «Ni féeń Unimbɔti marab ki fòol̄ nnibiyaamu koobiliŋ.»

9 Ní u gíti kútì yii: «Ni féeń Unimbɔti marab tiŋan pu kí ŋmā kí ŋúb́ nimbi ni-ba koobiliŋ. 10 Mooyiisi nìn lī u-marabin yii: <Á nīn tɔ́ a-baa nì a-na,> ní ki gíti lī yii: <Un yaa sòon̄ ki bíil̀ u-baa kii u-nee, see bí kpɔ̀-u^c.> 11 Ama nimbi lì yii, unil yaa cáá tiba ki bàà ŋūǹ kí tīī u-na kii u-baayee, u ŋūǹ kí lì yii: <An wanti sá Kɔɔban>, (an dàkà yii saraa ki tīī Unimbɔti). 12 U yaa lī mimmee, naa ti yàntī ú ŋá tiba kí tīī u-baa kii u-na. 13 Míǹ ní ni cáá nimbi ni-ba koobiliŋ ŋin ni-baabi dàkā-nee ki cáa kpìtī Unimbɔti bɔti. Tiwan tikpil bí ni ŋáań míǹ mbaantiim.»

Tin kɔ̄ntí unil tijɔkɔndee

(Kpèè Maat 15.10-20)

14 Míǹ boonee, Yeesu gíti yíiń kunipaau u-cee, ní ki tùkū-bi yii: «Ni-kɔkɔ ń pīlifìmaan kí gbìl̄ m nín làá lì puee taapu! 15 Tiba kaa nyēeń dipaal pu kí kɔ́ unilin kí kɔ́ǹ-u tijɔkɔndi Unimbɔti nimbiin. An sá tin nyēeń unilinee di kɔ̄ntí-u tijɔkɔndi Unimbɔti nimbiin. [ 16 Un yaa cáá ditafalee ń gbìl̄ taapu^d!»]

17 Ŋyunti ŋun u yíkì kunipaau cee ki kɔ́ kudiinee, ní u-boonnooliibi bālifì-u dilaŋkpandi din u bàà gāāyee taapu. 18 Ní u kíí-bi yii: «Ni mun kaa cáá iciin níii? Naa gbìl̀ yii tin kɔkɔ nyēeń dipaal pu ki kóò unilinee kaa ŋūǹ kí kɔ́ǹ-u tijɔkɔndi Unimbɔti nimbiinaaa? 19 Di sá yii tijikaal kaa kóò unil pɔbilin, an kóò u-poon ní, ní ú cù ataa pu.» Yeesu lī míǹ ki dàkā yii tijikaal kɔkɔ ŋān̄ ki tīī unil ń jī^e. 20 U gíti lī yii: «Tin nyēeń unilinee di sá tin kɔ̄ntí-u tijɔkɔndi Unimbɔti nimbiinee. 21 Di sá yii binib pɔbiliŋin ní ilandɔkɔkpiti kɔkɔ nyēeń: binaacimpɔmbi nì bisapɔmbi jɔkɔnti, bunaayubu, nnikpaakoon, 22 binimpoobi nì bininjab laakpaati, ikummunti, digaŋgam, diŋmatindi, bimaramɔntiibi fátam, nnimbidiki, tibɔfan, timɔn nì ŋyipɔn. 23 Tibɔkpitil gbanti kɔkɔwoooo nyēeń binib pɔbiliŋin ní ki kɔ̄ntí-bi tijɔkɔndi.»

Ukaanaannimpu ubɔ fookiiu

(Kpèè Maat 15.21-28)

24 Yeesu yíkì niinee, ki póotì Tiir nì Siidɔn jaaŋŋu pú. U bàn̄ ki kɔ́ kudii kubɔn, kaa bàà là yii báà ubɔ ń béé u-pu. Nì míǹ kɔkɔee, waa ŋúń ki bál̀. 25 Unimpu ubɔ nìn bí, ki cáá kisapɔmbiki arasinii kā ki-pu. U nín gbìl̄ bi sòon̄ Yeesu puee, waa ti kāl̀. U yíkìń ní malaa, ki dɔ́miń ki tātìi gbāaǹ u-taaŋi taapu. 26 Unimpu gbanti kaa nìn sá Ujuudanimpu, u sá Feenisii, Siirii tiŋkin ní. U mēē Yeesu ń jà arasiniiyee u-bisal pu. 27 Ní Yeesu kíí-u yii: «Yàntī mbiyaamu ń díkí kí wàatī. Kun puee an kaa máaǹ bí dū mbiyaamu jinti kí tīī mbɔbiyaamu!» 28 Ní unimpuee fātì ki kíí-u yii: «Tiŋman, an sá míǹ ní, m-Dindaan. Ama mbiyaamu yaa bíi jīǹ an gbátée, mbɔbiyaamu mun tòó igbasigbasi ní.» 29 Niinee, ní Yeesu bí-u yii: «A kíí tiŋan! Míǹ puee, nín̄ kùǹ. Arasiniiyee nyáń a-bisalin.» 30 Unimpuee fātìi gítìń u-dumpuee, arasiniiyee nyáń u-bisalin u pɔ́ɔkì ki dɔ̄ u-dooŋu pu.

Yeesu cáaǹ umɔɔmiin ubɔ

31 Yeesu yíkì Tiir tiŋkin ki fātìi dīń Siidɔn, ki jítìń ntimu saalaa pu ki nín dòoń Galiilee mɔɔl watil pú. 32 U bàn̄ niinee, bi cáań-u umɔɔmiin ubɔ ní ki mēē-u yii ú dū u-ŋalii kí páań u-pu. 33 Ní Yeesu cáá-u ki kākatì ŋkpaanceeti u nì u liitil, ki dū u-ŋambiyaamu ki bɔ́ umɔɔmiinee tafaliŋin, ní ki tíil̀ timɔtan ki dūu gbēē umɔɔmiinee limbil, 34 ki wáaǹ ki kpēē kutaa ki fáá diniindi, ní ki lī yii: «Eefata!» An taapu sá yii: «Cúú ŋátí!» 35 Niin niin ní umɔɔmiinee tafaliŋ cúu ŋátì, ní u-limbil mun bútì, ní u kíǹ ki sòoǹ tiŋan. 36 Ní Yeesu kpáafì-bi bí taa pée māafì báà ubɔ tin jítèe. Ama Yeesu yaa nìn mɔ́tì yii bí taa lèe, míǹ ní bíǹ làá nín mɔ̀tīí lì. 37 Bi nìn bākatì tikpil, ní ki lì yii: «Tin kɔkɔ u ŋáańee ŋān̄ ki lákatì, áli ki yàntī bitafakpaafub gbìl̀, bimɔɔmiimbi sòoǹ!»