Sakari 5

Dileedakal diluluutiil: mbusu gbɔŋku

1 M tí wáaǹ kutaayee ní ki ká kugbɔŋu kubɔ ŋàaǹ kutaa pu.

2 Ní ntuun bālifì-mi yii: «Ba ní a wāĺ ní?» Ní m kíí yii: «M wāĺ kugbɔŋu kubɔ ŋàaǹ kutaa pu, ku-púuŋŋu sá meetab saalaa, ní ku-waaŋŋu sá meetab biŋmoo.» 3 Niinee ní ŋu bí-mi yii: «An sá mbusu bɔti tin bi làá dūú tɔ̄ kitiŋ nee kɔkɔ puee ní. Bi ŋmàn̄ kugbɔŋu gbanti jandi diba pu yii bí jà binaayub kɔkɔ kitiŋ nee pu, ní ki ŋmàn̄ dijandi din kíǹee pu yii bí jà bin kɔkɔ pùtī fám fámee mun.» 4 Ti-Dindaan Mpɔŋkɔdaan lī yii: «Mama m-ba di tɔ́ń mbusu gbanti. U làá kɔ́ unaayuu kamaa diikun, unil un kamaa pùtī m-yindi fám fámee diikun. Mbusu gbanti làá gbíntí bi-diiŋŋin ní kí wà tikɔkɔ, kí kpáaǹ ŋi-dɔi nì ŋi-taŋkpeeŋi.»

Dileedakal diluluútiil: unimpu un sá ikpiti daaŋkuee

5 Ntuun ŋun bíi sòoǹ nì mee sútìń ní ki bí-mi yii: «Yáatí kí kpèè kun còom̄ ki dòoń nee.» 6 Ní m bālifì-ŋu yii: «Ba ní an sá ní?» Ní ŋu kíí yii: «An sá kukabiku kun poon ní kitiŋ nee kɔkɔ kpitii kēe.»

7 Ŋyunti gbantee, dibìil din sá tikúmanee cúu gántì yilpu ní m ká unimpu ubɔ kā kukabikuee poon. 8 Ní ntuun bí-mi yii: «Unimpu nee sá tikpitil daaŋku ní.»

Ní u téé-u ki gíiǹ ki tɔ́ kukabikun, ní ki dū ku-bìil kun sá tikúmanee ki púkuǹ. 9 Míǹ boon m wáaǹ kutaayee ní ki ká binimpoobi bili páaǹní. Bi nìn cáá ifeen an náań nì naakpaapiin feeŋyi, ní kubuŋu téekí-bi bi ŋàaǹ ki cá. Ní bi yōoǹ kukabikuee ki cáa jɔ́ntì kutaa. 10 Ní m bālifì ntuun ŋun bí ki sòoǹ nì mee yii: «Bi cáǹ kukabikuee la?» 11 Ní ŋu kíí-mi yii: «Bi cáǹ-kù Sineeyaar tiŋkin kí tin mā-kù kuwaadii ní. Bi làá mā dikɔl ní kí dū-ku kí báań dikɔlee pu.»