Sakari 3

Dileedakal dinanaatiil: Usaraaŋakpil Joosuwa

1 Boonee ní ti-Dindaan yāntì m wál̀ Joosuwa usaraaŋakpil, u yú ti-Dindaan tuuŋŋu nimbiin. Sitaan nìn yú Joosuwa ŋaŋgiil pú ki kúŋfí u-boon. 2 Ní ti-Dindaan tuuŋŋu bí Sitaan yii: «Ti-Dindaan di làá kpìin̄-si, Sitaan. Tiŋman ti-Dindaan un di lēē Jeerusaleemee di làá kpìin̄-si. Joosuwa kaa sá kii kisanteei kin bi lēeńeeee?»

3 Joosuwa nìn yú ntuun nimbiin ki pēē tiwan tin cáá tijɔkɔndee. 4 Ní ntuun bí bin yú ŋu-nimbiinee yii: «Pèetīmaan-u tiwan tin u pēē tì cáá tijɔkɔndee.» Boonee ní ŋu bí Joosuwa yii: «Kpèè, m cúú a-kpitii ki lēē a-pu, m làá dū jiŋaal bɔkutiŋ ní kí pèen̄-si.» 5 Ní ŋu bí yii: «Bí dū ŋŋaabu ŋun ŋān̄ dándanee kí fìn̄ u-yil. Ní bi dū ŋŋaabu ŋun ŋān̄ dándanee ki fìn̄ u-yil, ní ki pēeǹ-u abɔkutimɔnti ti-Dindaan tuuŋŋuee nimbiin niin.» 6 Boonee ntuunee nín sòon̄ nì Joosuwa puee sɔ̀. 7 Ti-Dindaan Mpɔŋkɔdaan nín sòon̄ puee sèé:

«A yaa nóó m-saŋŋu,

ki ŋúb́ m-marabee,

sii di làá nīn kpòotī m-diiku poon tuuŋŋi,

ní kí nīn cí m-cindi.

M làá dū-si kí kūtì bin bí

m-cee doo m-tundinee pu.»

Unimbɔti làá fàtīí gíiǹ u-tɔntɔnliu

8 «Pīlifì Joosuwa,

sii un sá usaraaŋakpilee.

Ni mun pīlifìmaan, nimbi bin sá u-tɔntɔnjutiibee.

Di sá yii ni sá difiil din dòońee daaŋku ní.

M làá yàntī m-tɔntɔnliu

un bi yíì <Nnaantee^a> ń dāan̄.

9 Di sá yii m dū ditaŋkpal diba ki bíl̀ Joosuwa nimbiin,

ditaŋkpabaabil gbanti cáá animbil aluli ní.

Man m-ba làá ŋmà di-pu tiŋmaŋmabiti.

M làá dāá lēē kitiŋ gbanti kpitii ŋwimbaanti ní.

Man ni-Dindaan Mpɔŋkɔdaan di lī míǹ.

10 Ŋwiin gbanti yaa láa bāańee,

ni dāa yíì tɔb fiinyi nì fiigi

subooŋyi taapu ní ki fàal̀ dibatɔl pu.»