Abakuuki 3

Abakuuki wimmeem

1 Ŋwimmeem min Unimbɔti bɔnaatiliu Abakuuki nìn mēē nì itiminsi poonee sɔ̀.

2 Ti-Dindaan, m gbìl̄ atuŋkpaan ŋin a ŋée pu.

An cúú-mi tifaandi gba.

Ti-Dindaan, fàtīí ŋá a-tuuŋŋi gbanti

ti-wiiŋyi nee poon,

yàntī báà ŋma ń béé-ŋi

ti-yuntii nee poon.

Báà a yaa fōō ti-pu diŋuulaaa,

téetí a-poommɔŋŋu pu.

3 Unimbɔti nyánní Teeman tiŋkin ki dòoń,

circir Nimbɔtiu páaǹní Paaran jooŋŋi pu.

U nín sá ukpaan puee bīī kutagbɔŋu pu,

ní u-nyɔŋkii gbí kitiŋ kɔkɔ pu.

4 U wāĺ bɔ́iii kii ŋwalifee,

ní itaaŋmɔŋmɔ nyēeń u-ŋaan ki jìl̀ pàlpal.

Niin ní u-pɔŋŋu mun kā.

5 Bìlbil kúm līī u-nyɔkɔpu

ní nnaanyeem tēentí u-tabɔbiliŋ.

6 U yaa sāā ki yúl̀ee, kitiŋ cìŋkī ní.

U yaa fātìi kpēē atimbun nibee,

bi-wunti gbáà ní kpàkpakpa.

Jaanjaan jooŋŋi fáá iwèeń,

ní cannaaku gbantammu lábitì ki cìb̄,

ŋíǹ mun di nìn sá njaminee u-saŋŋu.

7 M ká Kusan yab tantib kaa ti bí tiban.

Madiyan yab kɔŋkooŋyi cīŋkì nì tifaandi.

8 Mimmee ti-Dindaan, ibun pu ní a fōō diŋuulaaa?

Ibun pu ní a fōō mbum naaa?

Tiŋku pu ní a-ŋuul gà lìblib yéèee?

A jɔ́m̀ ki kāl̀ atagban pu

kii dijajil tɔrɔkubee.

9 A bɔ́ntì a-tɔbu,

ní dinyɔɔbundi din a sòon̄ee sá kii ipiinee.

A dū ibun ki búkutì kitiŋ.

10 Ajoon wál̀-si ní ki fāŋkì ki fōō dijinjikil.

Utaakpaan nìn̄ nì mpɔn,

ní tiŋku yāntì bi gbìl̄ u-bintindi pu.

U tòó u-nyiŋgbanti yilpu.

11 Ŋwìiń nì uŋmal nín wál̀

a-piiŋyi in a tɔ́ee nín ŋàaǹ ki wāĺ puee,

nì a-kpaŋki nín ŋmóò pu làka lakee,

ní bi sāā ki yúl̀ laakin bi bée.

12 A-ŋuul poonee, a yìiǹ kitiŋ kɔkɔ pu,

a-bum poonee, a tà ki mátí atimbun.

13 A nyáń kí fīī a-nibul

kí fīī ubɔti un a lēēyee.

A líì un sá uyidaan binikpitib dicaŋkunee,

ki nāaǹ u-yab kɔkɔ múb.

14 A dū úǹ u-ba piiŋyi ní

ki sāatìi cífì u-janjaliibi yiliŋ.

Bi bàà sáń ki dòoń kii kubuŋkpaaŋŋuee

kí dāá yàaǹ-ti.

Bi nìn kūuntí nì dipɔɔpindi,

a lì kii bi kpáàa cúú uwɔfi ki bíi tɔ̀ntī dibalinee.

15 A cátì nsan tiŋkun laakin tinyiŋgban pɔ̄ɔ̄yee

a-taamui cōom̀ ki jítì.

16 M gbìl̄ kuwoou nee kɔkɔ pu

ní m-poon kaam cɔ́tì.

M-nyunculiŋ bíi jìkì

ní m-kpabiŋ bíi bùkù.

M-taaŋi yɔ̄tì maa ti ŋūǹ kí yūĺ.

M ŋmíl̀ fɔ́ŋfɔŋ

ki cí dinimbinaamandi wiiŋŋu

kí cùú já nì anibul ŋin bíi jáà nì tee.

17 Fiigi subu kaa ti púkuḿ,

fiinyi subu kaa ti lòoǹ,

ɔliifi subu kaa ti lòoǹ,

ní tisati mun kaa ti lòoǹ tikpaajin.

Ipii kaa ti bí kupikpuŋkpuŋun,

ní inaa mun kaa ti bí kunaabakaun.

18 Ama mamee, m làá nīn fàal̀ ti-Dindaan pu,

m làá nīn bí mmɔnni Unimbɔti un di fīī-mee pu.

19 Ti-Dindaan Unimbɔti di sá m-pɔŋŋu.

U yàntī m tóotí kii upeemanee,

ní ki yàntī m tɔ́kɔ́ yilpu ki còom̄.

Bilaŋgaaliibi kpiliu di ŋmàn̄ nlan nee.

Bi bɔ̀ɔ́ kubeeu ní ki gà-ŋu.