Abakuuki 1

Kugbɔŋu kun sòoǹ

Abakuuki

puee

1 Unimbɔti bɔti tin ní u lēē ki dàkā u-bɔnaatiliu Abakuukee.

Abakuuki bíi yíì Unimbɔti ú jòoń-u

2 M-Dindaan, kí cáá sāā ŋyunti ŋulɔŋu

ní m làá nīn yíì-si á jòoń-mi

ní á nín pīlifì-mi ní?

M bíi kūuntí yii tipɔmbɔti gbóotì,

ama ní aa bíi fìil̄-ti.

3 Ba pu ní a yàntī m kāntí atuŋkpiti ní?

Ba pu ní unil wɔ́b̀ u-juti ní a kpèé ki ŋmí ní?

Diwɔ́bil nì tipɔmbɔti di māntìi tú-mi.

Kunikpɔŋkpɔkɔu nì kujaau di kíǹ ki bí an kɔkɔ.

4 Mara wɔ̀b̄ kaa ti cáá mpɔn,

ní an kaa ti sá un bɔti ŋān̄ee ní bi pɔ̀.

Unikpiti nyīī deedeedaan ki múĺ,

an pu ní ibɔsoon poonee, ibaamɔn kaa ti bí.

Ti-Dindaan kíí Abakuuki: Babiloon yab cīiń

5 Ti-Dindaan bí yii:

«Kpèèmaan tin bíi jītí

atimbun ŋin kíǹee kansikin tiŋan.

Yàntīmaan án bàkatīǹ-ni sèeee!

Di sá yii m làá ŋá maamaaci tundi diba

ni-yuntii nee poon.

Ubɔ di yaa bàà máafì-ni tibɔti gbanti,

naa bàà làá fōō-tì kí kíí^a.

6 Kpèèmaan, m làá yàntī Babiloon yab ń dāan̄,

dinibul gbanti kaa sūǹ isaa

ní ki néeń tipɔmbɔti.

Bi yìiǹ duulinya kɔkɔn

ki fòol̄ binib timmu ki cáa gà bi-biŋŋi.

7 Bi sá tinibilindi ní ki cáá tifaandi.

Bíǹ bi-ba di sīintí bi-marab nì bi-pɔŋŋu.

8 Bi-taamui yáb̀ ki jítiǹ iguloobu,

ki cáá ntoom ki jítiǹ digbiŋgbil

din cá kukpɔŋu kujoouee.

Bi-tanjakaliibi nyánní ndan ki dòoń

bi-taamui yùkufìń.

Bi ŋàaǹ kii ukaalun nín tòó pu

kí cúú tiba kí jēe ní.

9 Bi-kɔkɔ dòoń kí fūkul̀,

ní bi-nimbikpeeŋu pée cɔ́ bi-nyɔkɔpu.

Bi kóoǹ iyumbu ki kpáfì i wīikí kii dibulee.

10 Dinibul gbanti bèel̄ bibɔtiibi ní.

Abɔtibil sá kii tigbiŋgbiiliwanee ní bi-cee.

Baa fàŋkí ntimu mun

bi máń digundi ki túee.

Bi fà ntam ní kí kpúkuń digundi gbanti caŋin,

ní kí tāā kí dàb̄ kí já kí fōō-mu.

11 Bi jītí kii kubuŋkpaaŋŋuee

ní ki nìkì bi-saŋŋu.

Kun pée páb́-bee di sá bi-pɔŋŋu,

ŋúǹ di sá bi-nimbɔtiu.»

Ubɔnaatil tí bíi kūuntí ki yíì Unimbɔti

12 Doooo ŋkilkaaminee, sii di sá ti-Dindaan,

sii di sá m-Nimbɔtiu, ki sá circirdaan

ní kaa kúù.

M-Dindaan, sii di lēē dinibul nee dí sòoǹ ti-bɔti.

M-taŋkpanaakooku, a tīī-dì mpɔn dí dáaĺ ti-tafal.

13 A-nimbiliŋ bí circir tikpil,

ŋaa ŋūǹ kí kpèè ikpiti.

Aa tí ŋūǹ kí kíí kí nīn kpèé

ubɔ ń nīn bíi wɔ́b̀ u-juti.

Kin ba pu ní a kíí ki kpèé binikpitib

bin nyēē bi-jutiibi boon nee kaa lì tiba ní?

Ba pu ní a ŋmí ki kpèé unikpiti ń bīil̀

un sá deedeedaan ki jítiǹ-uee ní?

14 Di sá yii a yāntì binib bí kii tiŋkun jɔmiiyee,

a lì kii tin fù ti-pool pu kaa cáá ukpootilee.

15 Babiloon yab cútí binib kii

ujɔm un bi tɔ́ njɔmpiin ki cúúyee ní.

Kulaaŋŋu ní bi dù kí cúú-bi,

ní kí dū bi-naanyaaŋŋu kí kóoǹ-bi.

Niinee ní an kíǹ ki mɔ̄ǹ-bi ní bi fàal̀.

16 Bi ŋáań saraabi ki tìì bi-laanti,

ní ki tùutī talaalub ki tìì bi-naanyaaŋyi.

Di sá yii bi-laanti nì bi-naanyaaŋyi pu

ní bi-jinti mèeǹ ki mɔ̄.

17 Mimmee bi làá nīn gbíntìi fúutí

bi-tàataajimmu kujitooun

ki kù atimbun ŋin kíǹee nib nì inimbinaakulimaaa?