Amoosi 7

Dileedakal dipeepeekaal: inaakitoon

1 Ti-Dindaan Unimbɔti nín nìn lēē tin ki dàkā-mee sɔ̀. U nìn bíi nāantí inaakitoon. An nìn sá ŋyunti ŋun bi gāā ubɔti taamui mooti ki dóò ní timool fātìi kíĺ ki bíi túkùee. 2 Inaakitoonee nín dāa ŋmɔ́ kitiŋee pu mɔsɔnti kɔkɔee ní m bí yii: «Ti-Dindaan Unimbɔti, m gbāam̀-si ní, dū a-nibul kpitii kí pɔ̄-bi. An yaa kaa sá míǹ, mana ní bi làá ŋmátí, bíǹ bin kaa pée náaǹ nee?» 3 Ní ti-Dindaan kpántì nlandɔkɔ ní ki bí yii: «Án kaa làá bàń míǹ!»

Dileedakal dililiitiil: ŋŋmi

4 Ti-Dindaan Unimbɔti gíti lēē tibɔti tiba ki dàkā-mi. U nìn cáá ŋŋmi ki sòoǹ u-nibul bɔti. Ŋŋmifaam nìn yāntì nnyim min dɔ̄ kitiŋ taapuee fóotì ní ki wùn̄ Isirayeel tiŋki búkú buku. 5 Niinee ní m bí yii: «Ti-Dindaan Unimbɔti, m gbāam̀-si, yàntēe! Yaa sá fám, mana ní a-nibul Isirayeel yab bin kaa náaǹ nee làá ŋmátí?» 6 Ní ti-Dindaan kpántì nlandɔkɔ ní ki bí yii: «Tin bí nee mun kaa làá bàń míǹ!»

Dileedakal ditataatiil: ŋŋmiiŋmantikaa

7 Tin ti-Dindaan nìn gíti lēē ki dàkā-mee sɔ̀. U nìn yú digundi diba caŋin ki ŋúb́ ŋŋmii ŋun bi cáa ŋmàntī kí kpèè yii digundi tèen̄aaa, dàa tèen̄ee. 8 Ti-Dindaan bālifì-mi yii: «Amoosi, ba ní a wāĺ?» Ní m kíí yii: «M wāĺ ŋŋmii ŋun bi cáa ŋmàntī kí kpèè yii digundi tèen̄aaa, dàa tèen̄ee ní.» Ní ti-Dindaan nìkī ki bí yii: «Kpèè, m làá dū ŋŋmii nee kí ŋmàntī kí kpèè yii m-nibul Isirayeel yab tèen̄aaa, baa tèen̄, di sá yii maa làá ti dū bi-kpitii kí pɔ̄-bi.

9 M làá kúntí ipaan in pu ní

Isaaki naantiibi ŋáań saraabee,

kí nàan̄ Isirayeel yab circir paaŋyi,

ní kí já nì ubɔti Jeerooboowaam dicaŋkun yab.»

Bi jìn̄ Amoosi Beeteel tiŋkin

10 Amasiya un nìn sá Beeteel tiŋkin usaraaŋakpilee nìn tú bí tùkù Isirayeel bɔtiu Jeerooboowaam yii: «Amoosi bí Isirayeel yab kansikin ki bíi gbì a-taapu. Binib gīī nì tibɔti tin u bí ki sòoǹee. 11 Tibɔti tin Amoosi sòon̄ee sèé:

<Bi làá kpɔ̀ Jeerooboowaam kujaaun,

ní bí dāá cáá Isirayeel yab kí cùnnì kuyuŋu

bí nīn dátiǹ bi-tiŋki.>»

12 Niinee ní Amasiya bí Amoosi yii: «Sii un wāĺee, yīkì doo kí nīn gítí Juuda tiŋkin. Niinee, a ŋūǹ kí nīn nàatī tibɔti kí nīn kāntí ki jīǹ. 13 Ama á taa ti nàatī tibɔti Beeteel tiŋkin doo! Di sá yii doo sá ubɔti circir paaŋŋu laŋki, dibeel nimbɔtidiiku ní.» 14 Ní Amoosi kíí Amasiya yii: «Maa sá ubɔnaatil, kaa tí nyánní bibɔnaatiliibi kitil diban. M sá upikpaal ní ki kpèé siikoomɔɔr sufii. 15 Ama ní ti-Dindaan cúú-mi ki páatì m-piii boon ní ki bí yii: <Cáá m-bɔti kí nàatī m-nibul Isirayeel yab.> 16 Ama sii Amasiya bí-mi yii ḿ taa dū Unimbɔti bɔti kí nàatī Isirayeel yab, kí taa sòoǹ kí tɔ̄ Isaaki naantiibi pu. Míǹ puee kɔŋkɔnnee, pīlifì tibɔti tin ti-Dindaan sòon̄ a-puee. 17 A-nimpuu làá kpántí kilaakpaai kitiŋin.

Bi làá kpɔ̀ a-jipɔmbi nì a-bisalib.

Bi làá ŋmàntī a-kpaatanti kí dūú yàkatī kí tīī biba.

Sisi a-ba làá kpúnní kitiŋ kin yab kaa nyí Unimbɔtee ni,

ní bí cùnnì Isirayeel yab kuyuŋu

bí nīn dátiǹ bi-tiŋki.»