Amoosi 6

Bin dàkafī yii tiba kaa ŋūǹ kí bàń-bee

1 Mbusu dɔ̄ ki cí nimbi bin kóò

Siiyɔn jool pu ni-pɔbiliŋ sɔ̀m̀ee,

nimbi bin kóò Samaarii jool pu

kaa fàŋkí yii tiba ŋūǹ kí ŋá-nee.

Binib lì yii atimbun kɔkɔ kansikinee, nimbi di līī,

ní ni-nabiyaamu Isirayeel yab kpèé ni-pú!

2 Ní cùmaan Kalnee tiŋkin kí kpèè!

Niinee ní cù Amaati kitiŋkpaaŋŋin kí kpèè.

Míǹ boonee, ní sìntī Gaati tiŋkin Fiiliistii yab cee.

Ni sɔ́ǹ ntimu gbantaaa?

Ni-tiŋki wāā ki jítiǹ bi-tiŋkaaa?

3 Ni nín bíi téekí mbusu wiiŋŋu

ń taa bàń kɔŋkɔnnee,

ni bíi yíì tipɔmbɔti wiiŋŋu

ń bàń malaa dee.

4 Ni dɔ̄ idoomɔnti in pɔ̄ɔ̄ kudaauee pu

ki dɔ̄ ni-lambammu pu

ki ŋmóò ni-picaŋkpunti pibiliŋ

nì ni-nacaŋkpunti nabiliŋ nanti.

5 Ni bɔ̀ɔ́ kubeeu ki gà ilan.

Ni mɔ́ɔ́ tiwambɔɔkaal tipɔn kii Daafiidee.

6 Ni nyù ndamam asambikpaan poon,

ki ŋmìtī ikpafi in sɔ́fèe,

ama naa bí ki sūǹ

mbusu un dòoń Jooseefi yab puee pu.

7 An pu ní kɔŋkɔnnee,

nimbi di làá nīn sá bipeepeekaabi

bin bi làá cúú kí cùnnì kuyuŋuee.

Ní nimbi biwutijoodambi kitil nee ń kúntí.

Samaarii tiŋki làá wīī

8 Ti-Dindaan Unimbɔti,

Unimbɔti Mpɔŋkɔdaan pūtì ki lī yii:

«Isirayeel yab lambil kóò ki dóotí-mi,

m ná bi-dimɔntiŋ.

An puee m làá dū Samaarii tiŋki

kí ŋá ki-nannanliibi ŋaan.»

9 Binib saalaa di yaa kíǹ kudicaŋu poon, bi làá kpú. 10 Bi-nabiki làá nyāntí bi-wuntee kí wà ŋŋmi. Ubɔ yaa kíǹ ki bí poon diikunee, kinabikee làá dāá bàlifì udaan yii: «Ubɔ gíti bí ki kútì a-pu niinaaa?» Ní úǹ ń dāá kíí yii: «Aayee, ubɔ gíti kpá.» Ní kinabikee ń dāá lì yii: «Ŋmīĺ fɔ́ŋfɔŋ! Ubɔ ń taa ti pútí ti-Dindaan yindi!»

11 Di sá yii ti-Dindaan yaa pée tīī maree,

adikpaan wùtī ní kí lítí,

ní ndiwaamu ń fáá iwèeń.

Dijajil mili pu fám

12 Itaamu sáń ataŋkpajal puɔɔɔ?

Inaa kù ataŋkpajal puɔɔɔ?

Kin ba ŋá ní ni dū ibaamɔn ki kpántì tilool,

ki dū tin bí deedeeyee ki kpántì ntuntun?

13 Ni bí ki fàal̀ ni nín jáń ki fōō Loo-Deebaar tiŋki, an dàkà yii kitiŋ kin kaa bí tibanee pu. Ni bí ki lì yii: «Timbi ti-ba pɔŋŋu pu ní ti jáń ki fōō Kaarnayiim tiŋki, an dàkà yii Iyin ili tiŋki.» 14 Ama man ni-Dindaan Unimbɔti Mpɔŋkɔdaan nín lī puee sèé: «Isirayeel yab, m làá yàntī ditimbundi diba ń jáǹ-ni ní kí nà-ni, kí yòon̄ Leeboo-Amaati tiŋki ŋgan pú kí tin cáá bà Arabaa buŋŋu ŋgiil pú.»