Eeseekiyeel 35

Ti-Dindaan sòon̄ ki bíikì Eedoom yab pu

1 Ti-Dindaan sòon̄ nì mi yii: 2 «Nisaaleen, fàtī a-ba kí túĺ Eedoom jooŋŋi watil pú kí sòoǹ m-bɔti kí tɔ̄ ki-pu. 3 Dū tin man a-Dindaan Unimbɔti sòon̄ee kí nàatī-bi yii: <M làá jáǹ-ni! M làá dàkà sii Eedoom tiŋki m-pɔŋŋu ní kí nàan̄-si ní kí yàntī á kpántí kuteeu. 4 M làá yàntī a-timmu ń kpántí adigbuŋkati ŋma. M làá yàntī á kpántí kii kuteeuee. Niinee a làá béé yii man di sá ni-Dindaan. 5 Sii pée ná Isirayeel yab ní. Bi nín kɔ́ dinimbinaamandinee, ŋyunti ŋun ní bi kúntì bi-kpitiiyee, a nìn jáń nì bi kujaau. 6 Too, man ni-Dindaan Unimbɔti un bí dimaŋfalin nee nín sòon̄ puee di sá yii m làá yàntī a-fatikuu ń nyā, di sá yii fatiku un a yāntì an nyáńee bíi bàlifī bí tɔ̀-u ipɔntoon. A nín kaa gūgufì ki yāntì fatiku nyáńee, si mun fatikuu làá nyā. 7 Eedoom, m làá nàan̄ a-tiŋki. M làá yàntī kí kpántí kii kuteeuee ní kí kpɔ̀ un kamaa làá dī niinee. 8 M làá dū anikpil kí gbéeǹ a-jooŋŋi pu. Bin bi làá kpɔ̀ kujaaunee làá lítí a-gbantammu pu nì a-tantakaŋin nì a-buŋyin. 9 M làá yàntī a-tiŋki ń kpántí kuteeu kí nīn cáa cá jaanjaan. Báà unil kaa làá ti kɔ́ a-timmun. Niinee a làá béé yii man di sá ni-Dindaan>.

10 «A lī yii: <Man di làá nīn yì atimbun ali nee, Isirayeel nì Juuda beeŋi. Min kamaa ti-Dindaan kóò niinee, man làá fōō-mu kí nīn kíǹ ki yì.> 11 Too, man ni-Dindaan Unimbɔti nín bí dimaŋfalin nee, a nín ŋá tipɔmbɔti nì ipoompoon nì kináŋ ki dàkā Isirayeel yab puee, míǹ ní m làá dàkà-si. M làá dàkà Isirayeel yab un ní m sée ŋyunti ŋun ní m yaa láa bíi sòoǹ a-bɔtee. 12 Niinee a làá dāá béé yii man ni-Dindaan, m gbìl̄ a-siibiliŋ pu ŋyunti ŋun ní a lī yii: <Timbi di yì Isirayeel jooŋŋi! Ŋi kpántì kii kuteeuee. Ti ŋūǹ kí cùú fōō-ŋi!> 13 A sòon̄ nì mi dilambil poon ki sòon̄-mi tikpan. Man gbìl̄ tin kɔkɔ ní a sòon̄ee.

14 «Man ni-Dindaan Unimbɔti nín sòon̄ puee sèé: <Kitiŋ nee kɔkɔ yaa láa bíi fàal̀ee ní ḿ nàan̄-si á kpántí kii kuteeuee. 15 Bi nín nāaǹ Isirayeel m-nibul, bi-tiŋki kpántì kii kuteeuee, a nìn fàal̄. Too, m làá yàntī míǹ mbaantiim nín bàń-si. A-jooŋŋi, a-tiŋki kɔkɔ làá kpántí kii kuteeuee ní. Niinee báà ŋma làá béé yii m sá ni-Dindaan.>»