Eeseekiyeel 29

Ti-Dindaan sòon̄ ki bíikì Eejipiti tiŋki pu

1 Bi nín cúú Isirayeel yab kuyuŋu abin saalaa boon, uŋmal usaalaati wiiŋyi saalaa nì ili dalee ní ti-Dindaan sòon̄ nì mi yii: 2 «Nisaaleen, fàtī a-nimbiin kí túĺ Eejipiti bɔtiu Faaroo watil pú kí sòoǹ kí tɔ̄ u nì Eejipiti tiŋki kɔkɔ pu. 3 Nàatī-u tibɔti tin ní man ni-Dindaan Unimbɔti bíi sòoǹ nì uee yii: <M làá jáǹ sii Faaroo, Eejipiti bɔtiu. A bí kii kunyiibiliŋŋuee ní ki dɔ̄ Niil mɔɔlin. A lì yii sii di yì Niil mɔɔl, sii di náań-dì ki tīī a-ba. 4 Too, m làá dū tikúti kí kpàl̄ a-nyɔɔkpaweeŋyi ní kí dū a-mɔɔl poon jɔmii kí nákań a-pɔkɔi pu. M làá nyāntí-si Niil mɔɔlin kí kpáaǹ ijɔm in kɔkɔ náká a-jɔmpɔkɔi puee. 5 M làá dū-ni kí lúkú kuteeun, sii nì ijɔm gbanti kɔkɔ. A làá lítí kitiŋ ní kí kpú ní ubɔ mun kpá kí yòon̄-si àá kí síb́-si. M làá yàntī á kpántí inoon nì ipeel jinti. 6 Niinee Eejipiti yab kɔkɔ làá béé yii man di sá bi-Dindaan.

«A nín tútúǹ Isirayeel yab puee kaa bàn̄ kukaluu nín ŋūǹ kí tūtuǹ-bi puee. 7 Bi nín dīntì a-puee, a kɔ́fì ki gbíntì bi-ŋalin ní ki gíí bi-gbigbipeeu ní ki yɔ̄tì bi-wunti. 8 Too, man a-Dindaan Unimbɔti nín sòon̄ puee sɔ̀. M làá dū ajanjakiti kí tɔ̄ń a-pu ní kí kpɔ̀ kí céetí a-tiŋkin nib nì ki-waŋkuti. 9 Bi làá nàan̄ Eejipiti tiŋki ní kitiŋee ń kpántí kii kuteeuee. Niinee binib làá béé yii man di sá ni-Dindaan.

«A lī yii sii di yì Niil mɔɔl, sii di náań-dì. 10 An puee m làá jáǹ sii nì a-mɔɔl. M làá yàntī Eejipiti ń kpántí adigbuŋkati ŋma. M làá yàntī kí kpántí kuteeu kí yòon̄ Miigidool tiŋki ŋgan pú kí cáá sāā Asuwan tiŋki nì Eetiiyoopii tiŋkpaanyɔkɔ ŋgiil pú. 11 Báà unil àá kuwaŋkuluu kaa ti làá kíí kí cù niin. Baa làá ti ká tin cáá kufoouee abin imuŋku ili Eejipiti tiŋkin. 12 M làá yàntī Eejipiti tiŋki ń kpántí kuteeu kun pée kūń ki jítiǹ kuteeu kamaayee. Bi làá nàan̄ Eejipiti timmu min ní baa láa pée ká kitiŋ pu dooyee. Abin imuŋku ilee, m làá yàntī Eejipiti yab ń yàl̄ kí tin nín̄ bí atimbuncaan poon, kí nīn bí ntincamun.

13 «Man ni-Dindaan Unimbɔti di sòon̄ yii: Abin imuŋku ili boonee, m làá kóoǹní Eejipiti yab kí nyāntí atimbun ŋin poon bi yàl̄ ki bíńee kí kpāfì. 14 M làá fàtīí gíiǹní iyumbu, m làá fàtīí gíiǹní-bi Eejipiti tiŋkin, ŋgiil pú, kitiŋ kin poon bi màl̄-bee. Bi làá fàtīí náań kibeewaai, 15 dibeel din di làá nīn sá abee kɔkɔ poon kiwaayee, ní baa làá ti yīkì kí tɔ́kɔń atimbun ŋin kíǹee pu. M làá bàtī bi-wíiŋŋu pu án nín làá ŋá pu bí taa ti jī abee ŋin kíǹee pu dinyandee. 16 Isirayeel yab kaa làá ti nín̄ báká bi-pu bí jòoń-bi. Isirayeel yab kaa làá ti yíiń Eejipiti yab ń dāá jòoń-bi kí gíti ŋá ikpiti. Niinee báà ŋma làá béé yii man di sá ni-Dindaan.>»

Ubɔti Neebukadineesaar làá já kí fōō Eejipiti tiŋki

17 Bi nín cúú Isirayeel yab ki cūnnì kuyuŋu abin mmuŋku nì aluli boon, uŋmapeekaa wimpeekaaŋuee, ní ti-Dindaan sòon̄ nì mi yii: 18 «Nisaaleen, Babiloon bɔtiu Neebukadineesaar yāntì u-janjakitil ŋá ditumpɔɔl ki jáń nì Tiir yab. Bijanjaliibi gbanti kɔkɔ yiliŋ nìn ŋātì ní bi-gbigbipati fōō tiweendi, ama nì míǹ kɔkɔee, ubɔtaaa, u-janjaliibaaa, ubɔ kaa páatì ditundi din bi túń ki jáń nì Tiir tiŋkee pu. 19 Too, man ni-Dindaan Unimbɔti nín sòon̄ puee sɔ̀. M làá dū Eejipiti tiŋki kí ŋá Babiloon bɔtiu Neebukadineesaar ŋaan. U làá fūkul̀-kì, kí yòon̄ ki-gaajawanti ní kí nàan̄-kì. Eejipiti gaajawanti di làá nīn sá u-janjaliibi paati. 20 M làá dū Eejipiti ní ki tīī-u kí pà u-tundi paati, di sá yii man ní u-janjakitil túń ditundi ki tīī. Man ni-Dindaan Unimbɔti di sòon̄ míǹ.

21 «Ŋwiin gbantee, m làá dāá kūtì Isirayeel yab mpɔn. Sii Eeseekiyeelee, m làá tīī-si ŋŋmam á sòoǹ nì bi. Niinee bi làá béé yii man di sá bi-Dindaan.»