Eeseekiyeel 22

Jeerusaleem yab timbiilituuŋŋi

1 Ti-Dindaan bí-mi yii: 2 «Nisaaleen, bɔ́ntí a-ba kí sòoǹ Jeerusaleem, nnikpaakoon tiŋki nee bɔti, á taa gùgufì! Yàntī kí béé ki-tuŋkpitiŋ. 3 Dū tin man ni-Dindaan Unimbɔti tùkū-see kí nàatī-kì yii: <A sá kitiŋ kin nib kù binibee. Bi nín bíi ŋáań mimmee, bi bíi bɔ́ntí a-nàantam yuntiŋu dee. Bi bí ki māā awaa ki kɔ̄ntí-si tijɔkɔndi. 4 Binib bin bi kūūyee puee, a jíń dibɔkpil. Binib bin kóò a-nee nín máń awaa ŋiŋyee puee, a kɔ́ tijɔkɔndi. Bi nín ŋá mimmee puee, a sútìń a-bɔsooŋyi wiiŋŋu dee, bi làá nàan̄-si án kaa ti làá yúntí! An pu ní m làá kɔ́ǹ-si icoo anibul ŋin kíǹee nimbiin, ntimu kɔkɔ nib làá bèel̀-si. 5 A sá tijɔkɔndi nì fikil fikil tiŋki ní. An puee bin pìlīǹ-see nì bin dátiǹ-see làá bèel̀-si.>

6 «Sii cee ní Isirayeel bɔtibiliŋ cáá mpɔn ŋun bi cááyee ki kù binib. 7 Sii cee ní unil kpèé u-baa nì u-na fám, ki mùul̄ unicaan ní ki wɔ́b̀ ataŋkpiibil nì bikpiipoobi. 8 Baa dū tin bi dūu sú-mee ki yíiń tiba, ní kaa tɔ́ ŋwiŋŋuŋfikaa. 9 Sii cee ní binib tūntí bi-jutiibi abɔgabil kí ŋmā kí kpɔ̀-bi. A-nib jīǹ tiwaajin ajoon pu ní ki ŋáań ajɔkɔntuun. 10 Biba dɔ̀ nì bi-baa nimpoobi, ní biba mun dɔ̀ nì binimpoobi ŋyunti ŋun bi bíi fùul̀ ŋkpinee. 11 Biba ŋáań ntimbiil tuuŋŋi ki dɔ̀ nì bi-jutiibi nimpoobi, biba mun ŋáań mpɔn ki dɔ̀ nì bi-jipɔmbi nimpoobi, àá bi-niisalib pēē baa. 12 Sii cee ní unil kíikí bí tīī-u animbil ú kpɔ̀ u-juti. Unil yaa pīnnì u-juti animbilee, u nyàab̀ udaan ń dāá téeǹ-u kí páań ní. Binib bí ki fìkì bi-jutiibi wanti kí ŋmā kí kpántí bigaajab ní kí súntí man pu kpataaa. Man ni-Dindaan Unimbɔti di sòon̄ míǹ.

13 «Ma mun làá kpāafì abaal kí jáǹ-ni ni-paatii in kaa sá tibulcin paatiiyee, nì nnikpaakoon tuuŋŋi ŋin ni ŋáaǹee pu. 14 Ŋwiin ŋun m làá dāá jáǹ-nee, ni làá dāá ká mpɔn nì dipɔbil kí yūĺ m-nimbiinaaa? Man ni-Dindaan di sòon̄, ní m yaa sòon̄ puee, míǹ ní m ŋáań. 15 M làá jà-ni kí yàl̄ atimbun ŋin kíǹee poon ntincamun, ní kí kúntí ni-jɔkɔntuuŋŋi kɔkɔ. 16 Ni làá fá ni-jilmau atimbun ŋin kíǹee cee, ama ni làá béé yii man di sá ni-Dindaan.»

17 Ti-Dindaan bí-mi yii: 18 «Nisaaleen, pīlifì. Isirayeel kpántì m-cee kii agɔŋgɔŋkpilee ní. Bi bí kii animbil nì tasa kúti nì tikúnyuntikaal nì tikúti nì tikúbɔn tin nyìm̀ ki kā ucaa ŋmiŋunee ní. 19 An pu ní man ni-Dindaan Unimbɔti sòon̄ yii: <Ni kpántì kii agɔŋgɔŋkpil ŋin kaa bí tibanee ní. An puee m làá kóoǹ-ni kí kpúkuń Jeerusaleem tiŋki kansikin. 20 Bi kōontí animbil kúti nì tasa kúti nì tikúti nì tikúbɔn nì tikúman kí ŋá ucaa ŋmiŋun ní kí fùkum̀ ŋŋmi ní an kɔkɔ ń dùntī. Too, m-ŋuukpaandi poonee, m làá kóoǹ ni-mun kí kpúkuń ní kí yàntī ŋŋmi ń dùntī-ni. 21 M làá kóoǹ-ni kí kpāfì Jeerusaleem tiŋkin táb ní kí yàntī m-ŋuul ŋmiŋu ń wà-ni ní dùntī kii tikútee. 22 Ni làá nīn bí kii animbil kúti tin bi dūntì kipaai poonee ní. Niinee ni làá dāá béé yii man ni-Dindaan di kpáatì m-ŋuul ki sītì ni-pu.>»

23 Ti-Dindaan bí-mi yii: 24 «Nisaaleen, tùkù Jeerusaleem tiŋki yii kì sá kitiŋ kin kaa ŋá ki-ba circiree ní, kitiŋ kin pu utaa kaa nìn̄ m-ŋuul dalee. 25 A-bɔnaatiliibi bí kii gbikinti un nimbiliŋ máǹ ú cúú kuwaŋkuluu kí tɔ̀ntēe ní. Míǹ ní bi tɔ̀ntī binib, ki fòol̄ bi-gaajati nì bi-wammɔntiiti, ní ki yāntì bi-kpiipoobi wíiǹ kitiŋ nee poon. 26 Bi-saraaŋaliibi nyēē m-marab boon ní kaa tɔ́ m-circir paaŋyi. Baa gàntī tin bí circiree nì tin kaa bí circiree. Baa dàkà binib bí ŋmā kí gàntī tin sá tijɔkɔndee nì tin kaa sá tijɔkɔndee. Baa pée fātìi tɔ́ iwiŋŋuŋfikaa. Bi-puee baa tìì-mi tinyool. 27 Bitindaŋkpilib bí kii agbiŋgbil ŋin di cúú kuwaŋkuluu kí tɔ̀ntēe ní. Bi kù binib kí kpántí bigaajab. 28 Bi-bɔnaatiliibi bìintí tíǹ gbanti kɔkɔ pu kii bi nín pōontí digundi puee ní. Bi kāntí aleedaka ŋin kaa sá ibaamɔn leedakaŋee ní ki sòoǹ ki nàatī tinyimɔmbɔti. Bi lì yii bi fòol̄ man cee tibɔti ní ki cáa nàatī, ama ní man ni-Dindaan kaa sòon̄ nì bi. 29 Kitiŋ nee kɔkɔ poonee, binib dàkà dikpabil ní ki yù. Bi mùul̄ usoodaan nì unandaan ní ki wɔ́b̀ unicaan, kaa nóó ibaamɔn saŋŋu. 30 M nyàab̄ bi-kansikin ubɔ ń bàà mā digundi, kí yūĺ laakin digundi bátìi lítì dibundi dōoǹee kí mɔ̄tì kitiŋ nee pu m-ŋuul ń taa bīil̀-kèe, ama maa ká báà ubɔ. 31 Niinee ní m kpáatì m-ŋuul ki sītì bi-pu. M nāaǹ-bi m-ŋuul ŋmiŋu poon ní ki pàn̄-bi bi-tuŋkpitiŋ paati. Man ni-Dindaan Unimbɔti di sòon̄.»