Eeseekiyeel 20

Isirayeel kaa yúl̀ nì Unimbɔti deedee

1 Bi nín cúú Isirayeel yab ki cūnnì kuyuŋu abin aluli boon, uŋmaŋmooŋmooti iwiin saalaa dalee, ní Isirayeel tindaŋkpilib biba dɔ́miń ki kāl̀ m-nimbiin kí bàlifì kí béé Unimbɔti lammi. 2 Niinee ní ti-Dindaan bí-mi yii: 3 «Nisaaleen, tùkù Isirayeel tindaŋkpilib yii man bi-Dindaan Unimbɔti nín sòon̄ puee sɔ̀. Kéè ni dɔ́miń kí bàlifì kí béé m-lammi naa! Too, m nín bí dimaŋfalin nee, maa làá yàntī ní bàlifì-mi tiba, man ni-Dindaan Unimbɔti di sòon̄ míǹ.

4 «Sii un sá nisaaleenee, a bɔ́ntì kí sòoǹ bi-bɔtaaa? Māafì-bi bi-baabi nín túń ntimbiil tuuŋŋi ŋiŋyee. 5 Á tùkù-bi yii man ni-Dindaan Unimbɔti nín sòon̄ puee sɔ̀. M nín lēē Isirayeelee, m nìn yōoǹ m-ŋal yilpu ki pūtì ki pōoǹ Jaakɔb naantiibi. M nìn yāntì bi béè-mi Eejipiti tiŋkin. M nìn yōoǹ m-ŋal yilpu ki pūtì ki lī yii: <Man di sá ni-Dindaan ni-Nimbɔtiu.> 6 Ŋwiin gbantee, m nìn yōoǹ m-ŋal yilpu ki pūtì kí nyāntí-bi Eejipiti tiŋkin kí cáá-bi kí kɔ́ǹ kitiŋ kin poon m nyàab̄ kí tīī-bee. Kitiŋ kin di ŋān̄ ki jítiǹ ntimu kɔkɔ nnaabiim nì tisiil còol̀ee^a. 7 M nìn tīī-bi mara nee yii: <Ni-kɔkɔ ń dū ntimbiil waaŋi ŋin dátí-ni nee kí fá. Ní taa ti tòotī Eejipiti yab waaŋi nee kí kɔ́ǹ ni-ba tijɔkɔndi. Man di sá ni-Dindaan ni-Nimbɔtiu>

8 «Ama ní bi yíkìi jáń nì mi, ní kaa kíí kí pīlifiǹ-mi. Báà ubɔ kaa dū ntimbiil waaŋi ŋin nìn dátí-bee ki fá. Baa nìn dū Eejipiti waaŋee ki fá. M nìn ká nlandɔkɔ yii m làá kpáatí m-ŋuul kí sìtī bi-pu, kí ŋá kii m nín bí yii m làá ŋá puee kí cáá kátí Eejipiti tiŋkin niin. 9 Ama man m-ba yindi puee ní maa nìn ŋá míǹ. Maa nìn là yii atimbun ŋin kansikin bi nìn kóòyee nib ń kpèè-mi fám. Di sá yii m nìn lēē m-ba ki dàkā-bi atimbun gbanti nimbiin ní ki pōoǹ yii m làá nyāntí-bi Eejipiti tiŋkin. 10 Niinee ní m nyántìń-bi Eejipiti tiŋkin ki cáá-bi ki cūnnì kuteeun. 11 M nìn dàkā-bi m-bɔkpaaŋi nì m-marab bin ní un yaa dūu túń ditundee kāntí dimaŋfalee. 12 M nìn tīī-bi ŋwiŋŋuŋfikaa án nīn sá kudaaŋŋu kí nīn bí man nì bi kansikin, án nín làá ŋá pu bí béé yii man di sá bi-Dindaan un di ŋáań-bi circiree. 13 Ama Isirayeel yab nìn yíkìi jáń nì mi kuteeun. Baa nìn ŋúb́ m-bɔkpaaŋi ní ki dū m-marab bin tìì un ŋúb́-bee dimaŋfalee ki fá. Baa nìn tɔ́ ŋwiŋŋuŋfikaa dal. M nìn tí ká nlandɔkɔ yii m làá kpáatí m-ŋuul kí sìtī bi-pu kuteeun niin kí céetí-bi. 14 Ama ní m tí kpēē m-yindi pu, án nín làá ŋá pu atimbun ŋin nib nìn ká m nín nyántìń-bi Eejipiti tiŋkinee ń taa kpèè m-yindi fámee. 15 Ama, kuteeun niinee ní m pūtì yii maa làá cáá-bi kí kɔ́ǹ kitiŋ kin poon m bàà bí yii m làá tīī-bee, kitiŋ kin poon ní nnaabiim nì tisiil còol̀ee. 16 M nìn pūtì kun puee bi nìn dū m-marab nì m-bɔkpaaŋi ki fá ní kaa nìn tɔ́ ŋwiŋŋuŋfikaa dal. Di sá yii bi nìn baasii dū bi-ba ki yá ki nákáǹ bi-waaŋee ní. 17 Ama m nìn súń bi-saai ní kaa kūū ki céetì-bi kuteeun^b.

Isirayeel gbíntìi nìkì ki yìntīǹ Unimbɔti

18 «M nìn tīī bi-biyaamu abɔkpaa nee kuteeun yii: <Ní taa nín̄ nóó abɔkpaa nì marab bin ni-baabi bi-ba mɔ́ɔ́yee. Ní taa tòotī awaa kí kɔ́ǹ ni-ba tijɔkɔndi. 19 Man di sá ni-Dindaan ni-Nimbɔtiu! Ní nīn nóó m-bɔkpaaŋi kí nīn tɔ́ m-marab kí dū-bi kí tɔ̄ ditundi. 20 Ní dūmaan ŋwiŋŋuŋfikaa dal kí sú-mi kí dàkà mpèé ŋun di bí man nì ni kansikinee, ní kí téetí yii man di sá ni-Dindaan ni-Nimbɔtiu.> 21 Ama bíǹ mun yíkì ki jáń nì mi. Baa nìn nóó m-bɔkpaaŋi ní kaa ŋúb́ m-marab bin ní unil máaǹ kí nīn ŋúb́ kí ŋmátée. Baa nìn tɔ́ ŋwiŋŋuŋfikaa. Niinee ní m ká nlandɔkɔ yii m làá kpáatí m-bum kí sìtī bi-pu kuteeun, kí yàntī m-ŋuul ń tɔ̄ di-tundi kí tin cáá kátí. 22 Ama m nìn tí cúú m-ba m-yindi pu, án nín làá ŋá pu atimbun ŋin nib ká-mi m nín nyántìń-bi Eejipiti tiŋkinee ń taa kpèè-mi fámee. 23 Kuteeun niinee ní m yōoǹ m-ŋal ki pūtì yii m làá jà-bi kí yàl̄ atimbun aban nì ntincamun. 24 Di sá yii baa nìn ŋúb́ m-bɔkpaaŋi nì m-marab, ní kaa tɔ́ ŋwiŋŋuŋfikaa, ama ní ki nìn yāntì bi-baabi waaŋi dáaĺ-bi. 25 Áli gba m nìn tīī-bi abɔkpaa ŋin kaa nìn ŋān̄ee nì marab bin kaa nìn ŋūǹ kí yàntī bí nīn bí dimaŋfalinee. 26 M nìn yāntì bi kɔ́ǹ bi-ba tijɔkɔndi. Di sá yii bi nìn cáá bi-jipɔŋkpilib ki wù ŋŋmi ki ŋáań saraabi. M nìn là kí kɔ́ǹ-bi agìń poon bí béé yii man di sá bi-Dindaan ní.

Unimbɔti làá kúntí Isirayeel yab waatootii

27 «An puee, nisaaleen, sòoǹ nì Isirayeel yab kí tùkù-bi tin man ni-Dindaan Unimbɔti sòon̄ee. Ni-baabi nìn sīī-mi kaa nìn yúl̀ nì mi deedee. 28 M nìn cáań-bi kitiŋ kin ní m nìn pōoǹ kí tīī-bee poon. Bi bāań ki kpēē ŋgbantamu puee ki ká isufi cáá tifaasɔn ní bi kíĺ ki bíi ŋáań saraabi niin. Bi nìn ŋá saraabi ki tūutì talaalub ní ki fá idafi ki gbítì m-ŋuul. 29 Niinee ní m bālifì-bi yii: <Ba di sá iwaatootipaan in pu ni cá nee ní?> Kí yòon̄ ŋyunti gbanti ní bi kíǹ ki yíì ipaan gbanti yii iwaatootipaan. 30 An puee á tùkù Isirayeel yab yii man ni-Dindaan Unimbɔti nín sòon̄ yii: <Ní taa kɔ́ǹ ni-ba tijɔkɔndi kii ni-baabi nín nìn ŋá puee, kí taa nyā m-boon kí cùú nīn tòotī bi-timbiiliwaaŋi. 31 Too kɔŋkɔnnee, ni yaa bíi ŋáań ni-saraabi ki yaa bíi wù ni-biyaamu ŋŋmi ki ŋáań saraabi ki tìì awaayee, ni bíi kɔ̄ntí ni-ba tijɔkɔndi dee. Ní ni dàkafī yii m làá kíí ní bàlifì-maaa, Isirayeel yab? Man ni-Dindaan Unimbɔti nín bí dimaŋfalin nee, maa làá kíí ní bàlifì-mi. 32 Ni lì yii: <Ti là kí nīn bí kii atimbun ŋin kíǹee nín bí puee, a lì kii ntimu mun kíǹee nib nín bí puee. Ti là kí nīn tòotī isufi nì ataŋkpee. Ama an kaa làá ŋá kii ni nín dàkafī puee. 33 Man ni-Dindaan Unimbɔti nín bí dimaŋfalin nee, m nín lī puee sɔ̀. M làá dàkà-ni m-pɔŋŋu nì m-kpabil ní kí kpáatí m-ŋuul kí sìtī ni-pu ní kí nín ŋmā kí jī ni-pu dibeel. 34 M làá dàkà-ni m-pɔŋŋu nì m-kpabil nì m-ŋuul ní kí ŋmā kí nyāntí-ni atimbun nì ntimu mun poon ni yàl̄ee, ní kí kóoǹ-ni kí kpāfì. 35 M làá cùnnì-ni kuteeun kí kàkatī-ni kí wàatī atimbun ŋin kíǹee, ní kí sòoǹ ni-bɔti niin. 36 Kii m nín nìn sòon̄ ni-bɔti Eejipiti teekun puee, míǹ ní m làá sòoǹ ni-bɔti. Man ni-Dindaan Unimbɔti di sòon̄ míǹ. 37 M làá dū m-kpandɔŋu ní kí kpàà-ni, ní kí yàntī ní nīn tɔ́ m-poondi. 38 M làá nyāntí bin jáń nì mi kaa tɔ́-mee ni-kansikin. M làá nyāntiń-bi ntimu mun poon bi kóòyee, ama bi-taal kaa làá tāā Isirayeel tiŋkin. Niinee ni làá béé yii man di sá ni-Dindaan.> 39 Man ni-Dindaan Unimbɔti nín sòon̄ puee sèé: <Isirayeel yab, báà ŋma ŋūǹ kí tòotī u-waaŋi, ama míǹ boonee, ni là kaa là, ní làá dāá nīn tɔ́-mi ní. Ní taa kpèè m-circir yindi fám kí nīn ŋáań saraabi ki tìì ni-waaŋi. 40 Di sá yii Isirayeel yab, ni-kɔkɔ làá dāá jāam̀-mi m-circir jool pu, Isirayeel joofɔkɔl pu. Man ni-Dindaan Unimbɔti di sòon̄ míǹ. Niin ní m làá dāá fōō-ni nì iŋal ili ní kí dāá fōō tin ni dūu sú-mee, ni-wampɔkaati nì ni-saraamɔntiibi. 41 M yaa láa nyántìń-ni atimbun kansikin nì ntimu mun poon ni yàl̄ee ki kóoǹ-ni ki kpáfì ki dóòyee ní ḿ dāá fōō ni-saraabi bí nīn sɔ́fì ki sɔ̀ŋkī m-pɔbil. M yaa ŋá-ni mimmee, m dàkā atimbun ŋin kíǹee yii m sá circir Nimbɔtiu dee. 42 M làá dāá gíiǹní-ni Isirayeel tiŋkin, kitiŋ kin ní m yōoǹ m-ŋal yilpu ki pūtì kí tīī ni-baabee. Ŋyunti gbantee, ni làá béé yii man di sá ni-Dindaan. 43 Niinee, ni làá dāá téetí ni-bimbim nì atuun ŋin kɔkɔ ni ŋá ki kɔ́ǹ ni-ba tijɔkɔndee pu. Atuŋkpiti ŋin kɔkɔ ni ŋée puee, ni-naŋki làá dāá nyā nì ni-ba. 44 Isirayeel yab, an kaa sá ni-bimbikpitim nì ni-jɔkɔntuuŋŋi ní m làá kpèè, ama m-yindi pu ní m làá ŋá míǹ kí tīī-ni. Niinee ni làá béé yii man di sá ni-Dindaan, man ni-Dindaan Unimbɔti di sòon̄ míǹ.>»