Eeseekiyeel 18

Unimbɔti sòoǹ binib bɔti ki nóó nì bi-bimbim ní

1 Ti-Dindaan sòon̄ nì mi yii: 2 «Isirayeel tiŋkinee, ba pu ní bi gà nlan nee yii:

<Bibaatiibi ŋmɔ́ ayeeŋgaan,

ama ní mbiyaamu nyiŋŋi nyāŋfì ní?>

3 Man ni-Dindaan Unimbɔti un bí dimaŋfalin nee di bíi sòoǹ yii, naa ti làá gāā nlan gbanti Isirayeel tiŋkin. 4 Tiŋman, unil kamaa maŋfal kā man ŋaan ní. Bibaatiibi nì mbiyaamu kɔkɔ maŋfal kā man ŋaan ní. Un yaa ŋá ikpitee, udaan di kúù^a.

5 «Tí dūú ŋmàntī kii deedeedaan di bí ní ki ŋáań tin kítèe nì tin bí deedeeyee. 6 Waa jīǹ tiwaajin awaajoon pu, kaa tòotī Isirayeel yab waaŋi. Waa mɔ̀nnì u-juti nimpuu, ní kaa dɔ̀ nì unimpu un bíi fùul̀ ŋkpinee. 7 Waa mùul̄ u-juti kaa yù u-juti wanti mun. U gīintí u-pɔ̀nliu nín dū tin ki síiǹ u-cee toolimee ki tìì-u. U tìì un ŋkùm cááyee tijin, ki tìì un kaa cáá tiba kí pèen̄ee tiwampeeŋkaal. 8 Waa pìntí u-nimbiliŋ bí dāá téeǹ-u kí páań àá ki nyàab̀ ipaati^b. U fàtī u-boon ki tìì tin kaa bí deedeeyee ní ki sòoǹ binib bɔti nì ibaamɔn. 9 U tɔ́ m-bɔkpaaŋi nì m-marab ní ki nóó ibaamɔn saŋŋu. Too, man ni-Dindaan Unimbɔti di bíi sòoǹ yii an niliuee sá deedeedaan ní ki làá nīn bí dimaŋfalin.

10 «Tí tí dūú ŋmàntī kii an niliuee cáá jipɔɔn ní u-jipɔɔnee fìkì binib wanti ki kù binib ní ki ŋáań atuŋkpiti kɔkɔ nì ŋi-bulifi. 11 U-baa kaa pée ŋá míǹ ki ká. U jīǹ tiwaajin awaajoon pu, ki mɔ̀nnì u-juti nimpuu. 12 U mùul̄ usoodaan nì unandaan, ki yù u-juti wanti, kaa gīintí u-pɔnliibi nín dù tin ki sīintí u-cee toolimee ki tìì-bi. U tòotī awaa ní ki ŋáań ntimbiil tuuŋŋi. 13 U pìntí u-nimbiliŋ bí dāá téeǹ-u kí páań àá ki nyàab̀ ipaati. An niliu gbanti làá nīn bí dimaŋfalinaaa? Aayee, kpataaa! U ŋá ntimbiil tuuŋŋi nee kɔkɔ, see ú kpú, ní u-kúm kpuulool làá gítí úǹ u-ba pu ní.

14 «Tí tí dūú ŋmàntī kii u cáá jipɔɔn. U-jipɔɔn gbanti ká u-baa tuŋkpitiŋ, ama ní kaa nóó u-tabɔbiliŋ. 15 Waa jīǹ tiwaajin awaajoon pu, kaa tòotī Isirayeel yab waaŋi. Waa mɔ̀nnì u-juti nimpuu kí kɔ́ǹ u-ba tijɔkɔndi. 16 Waa mùul̄ u-juti kaa yù u-juti wanti. U gīintí u-pɔ̀nliu nín dū tin ki síiǹ u-cee toolimee ki tìì-u. U tìì un ŋkùm cááyee tijin nì un kaa cáá tiba kí pèen̄ee tiwampeeŋkaal. 17 U fàtī u-boon ki tìì tin kaa bí deedeeyee ní kaa pìntí u-nimbiliŋ bí dāá téeǹ-u kí páań àá ki nyàab̀ ipaati. U tɔ́ m-bɔkpaaŋi nì m-marab ní ki nóó ibaamɔn saŋŋu. An niliuee kaa làá kpú u-baa kpitii pu. U làá nīn pée bí dimaŋfalin ní. 18 U-baa nín mūul̀ binib, ki yùn̄ u-nabiki wanti ki sāaǹ bin māntìi tú-uee, úǹ di máaǹ kí kpú u-kpitii pu.

19 «Ama ní ni bàlifī yii ba pu ní ujipɔnti kaa máaǹ kí fōō u-baa yìntitam tafadaaldi? Too, kun di yì-tèe di sá yii ujipɔntee ŋá tin bí deedee ki kítèe ní ki tɔ́ m-bɔkpaaŋi kɔkɔ. An puee u làá nīn bí dimaŋfalin. 20 Un ŋá ikpitee di kúù. Mbiyaamu kaa cáá kí pà mu-baabi kpitii pɔndi, ní bibaatiibi mun kaa cáá kí pà bi-biyaamu kpitii pɔndi. Bi làá pà deedeedaan u-deedeetuuŋŋi paati ní, ní kí pà unikpiti u-kpitii tuuŋŋi paati.

Nín̄ ŋáaḿmaan tiŋan

21 «Unikpiti yaa gbēeǹ kaa tí bíi ŋáań u-tuŋkpitiŋ ní ki kíǹ ki tɔ́ m-bɔkpaaŋi ki ŋáań tin bí deedee ki kítèe, waa làá kpú, u làá pée ŋmátí ní. 22 Bi làá súntí u-yìntitam kɔkɔ pu, ní ú nīn kíǹ ki bí dimaŋfalin u-deedee tuuŋŋi ŋin u kíǹ ki bíi ŋáańee pu. 23 Ni dàkafī yii an mɔ̄ǹ-mi ḿ ká unikpiti ń kpú níii? Man ni-Dindaan Unimbɔti di bíi tùkù-ni yii kun m lèe di sá unikpiti ń kpántí u-bimbim kí nīn kíǹ ki bí dimaŋfalin. 24 Ama deedeedaan yaa gbēeǹ kaa tí bíi ŋáań deedee tuuŋŋi, ní ki kíĺ ki kíǹ ki bíi ŋáań ntimbiil tuuŋŋi ŋin binikpitib ŋáańee, ni dàkafī yii an niliuee làá nīn bí dimaŋfalinaaa? Aayee, kpataaa! Bi làá súntí u-deedee tuuŋŋee kɔkɔ pu. U làá kpú, di sá yii waa yúl̀ deedee ní ki bíi ŋáań ikpiti. 25 Ni lì yii: <Ti-Dindaan nín ŋáań puee kaa kítì!> Isirayeel yab, pīlifìmaan-mi tiŋan. Man di ŋáań tin kaa kítèeee? An kaa sá nimbaaa? 26 Deedeedaan yaa gbēeǹ kaa tí bíi ŋáań deedee tuuŋŋi ní ki bíi ŋáań ikpitee, see ú kpú. Ikpiti in u bíi ŋáańee pu ní u làá kpú. 27 Ama unikpiti yaa fātì u-boon ki tīī u-tuŋkpitiŋ ní ki kíĺ ki bíi ŋáań deedee tuuŋŋi nì tin kítèe, u làá fīī u-maŋfal. 28 U yaa dáań ki ká yii u bíi ŋáań atuŋkpiti ní ki fātì u-boon ki tīī-ŋee, u làá nīn bí dimaŋfalin, waa làá kpú. 29 Ama ní nimbi Isirayeel yab bí ki lì yii: <Tin ti-Dindaan ŋáańee kaa kítì!> Mimmee man nín ŋáań puee di kaa kítàaa? Nimbi nín ŋáań puee di kaa kítàa! 30 An pu ní m làá sòoǹ nimbi Isirayeel niliu kamaa bɔti ubɔ ubɔ kí nóó nì u-tundi, man ni-Dindaan Unimbɔti di sòon̄ míǹ. Kpántímaan mbimbim, kí fàtīmaan ni-boon kí tīī ikpiti in kɔkɔ ni bí ki ŋáańee. Ní taa yàntī ikpiti iba ń kpántí ditaŋkpagbéetikaal kí tīī-ni. 31 Fámaan atuŋkpiti ŋin ni ŋáańee, kpántímaan ni-pɔbiliŋ nì ni-landɔkɔi. Isirayeel yab, ba pu ní ni là kí kpú ní? 32 Man ni-Dindaan Unimbɔti, m bíi lì yii maa là ubɔ kúm. Fàtīmaan ni-boon kí tīī ikpiti ní kí nīn bí dimaŋfalin!»