Eeseekiyeel 11

Bi làá sòoǹ Jeerusaleem bɔti ki-kpitii pu

1 Ti-Dindaan Fam yōoǹ-mi kitiŋ ní ki cáá-mi ki cūnnì kunimbɔtidii punyɔkɔki kin bí ŋwìiń nyalaŋki púee. Kipunyɔkɔ gbanti caŋinee, m nìn ká bininjab mmuŋku nì biŋmoo ní ki béè bi-kansikin bitindaŋkpilib bili, Asuur jipɔɔn Yasaniya nì Beenaya jipɔɔn Peelatiya. 2 Ŋfamee nìn tùkū-mi yii: «Nisaaleen, kpèè binib bin di bɔ́ntí atuŋkpiti ki tìì isaŋkikpiti kitiŋ nee poonee sɔ̀. 3 Bi bí ki lì yii: <Kí cáá sāā ŋyunti ŋubɔ poonee, baa ti làá mā adiin doo! Kitiŋ nee sá kii daanseeyee ní, ní timbi sá kii tinan tin bi làá dūú tɔ́kɔń u-poonee.> 4 An puee nisaaleen, nàatī Unimbɔti bɔti kí tɔ̄ bi-pu, sòoǹ kí tɔ̄ bi-pu!»

5 Niinee ní ti-Dindaan Fam kpákatìń m-pu ní ki kpáafì-mi ḿ sòoǹ yii: «Lì yii ti-Dindaan nín bí puee sɔ̀. Ni nín sòoǹ puee dee, Isirayeel yab! M nyí ni-landɔkɔi kɔkɔ. 6 Ni kūū binib tikpil kitiŋ nee poon. Ni yāntì anikpil dɔ̄ ki-saŋkakpiliŋ fìlfil. 7 An pu ní ti-Dindaan Unimbɔti sòon̄ yii: Kitiŋ nee sá kii daanseeyee ní, ama bin ni kūū kitiŋ nee poonee di sá tinan. Ama nimbee, m làá jà-ni kí nyāntí kitiŋ nee poon. 8 Ni fàŋkí kujaauaa! Too m làá cáań kujaau kí tɔ̄ ni-pu, man ni-Dindaan Unimbɔti di sòon̄ míǹ. 9 M làá jà-ni kí nyāntí kitiŋ nee poon, m làá dū-ni kí ŋá binicambi ŋaan. Bíǹ pu ní m làá dī kí sòoǹ ni-bɔti. 10 M làá yàntī ní kpú kujaaun ní kí sòoǹ ni-bɔti Isirayeel tiŋkin táb. Niinee ní ni làá béé yii m sá ni-Dindaan. 11 Kitiŋ nee kaa ti làá nīn sá kii daanseeyee ní nimbi mun kaa ti làá nīn sá tinan kin kā u-poon. Isirayeel tiŋki poon ní m làá sòoǹ ni-bɔti. 12 Niinee ni làá béé yii m sá ni-Dindaan. Naa nóó m-marab kaa tí ŋúb́ m-koobiliŋ mun. Ama ni nóó atimbun ŋin māntìi tú-nee koobiliŋ ní.»

13 Ŋyunti ŋun m bíi nàatī Unimbɔti bɔtee ní Peelatiya jipɔɔn Beenaya kpíì. Niinee ní m tātìi gbāaǹ m-yigbeel tūū kitiŋ ní ki téeń mpɔn yii: «Áù, ti-Dindaan Unimbɔti, a làá kpɔ̀ kí céetí Isirayeel yab bin kíǹee níii?»

Unimbɔti làá kóoǹ u-nibul din yàl̄ee kí kpāfì

14 Ti-Dindaan sòon̄ nì mi tibɔti nee yii: 15 «Nisaaleen, a-nabiyaamu dee, a-nabiyaamu mun a nì bi pēē mmaalee, Isirayeel yab kɔkɔ, bin ní bin kóò Jeerusaleemee lì yii: <Ní taa sútí kí pìl̄ ti-Dindaan, di sá yii timbi ní u dū kitiŋ nee ki tīī tí nīn yì.> 16 An puee á tùkù-bi ti-Dindaan Unimbɔti nín sòon̄ puee yii: <M dū-ni ki tɔ́ atimbun ŋin dátèe poon, ní ki yāntì ni yàl̄ ki bí nnicantimun, ama niin muee, m bí ni-kansikin kii m nín bí circir kɔŋkooŋŋun puee>. 17 An puee, á tùkù-bi yii tin man ni-Dindaan Unimbɔti bíi sòoǹ nì bee sèé: <M làá nyāntí-ni anibul kansikin kí kóoǹ-ni kí kpāfì. M làá cáań-ni ntimu mun poon ni yàl̄ee kí kpāfì ní kí dū Isirayeel tiŋki kí tīī-ni. 18 Niin ní ni làá nyānní ní kí kúntí ntimbiil tuuŋŋi kɔkɔ nì ajɔkɔntuun kɔkɔ. 19 M làá tīī ni-kɔkɔ dipɔbil diba ní kí tīī-ni ŋfampɔm. M làá lēē ni-wuntin dipɔbil din pɔ̄ɔ̄ kii ditaŋkpalee ní kí tīī-ni dipɔbil din pɔ̀fèe. 20 Án nín làá ŋá pu ní nóó m-bɔkpaaŋi kí nīn ŋúb́ m-koobiliŋ kí ŋá kii ŋi nín bí yii ní ŋá puee. Ni làá nīn sá m-nibul ní man ń nīn sá ni-Nimbɔtiu. 21 Ama bin pɔbiliŋ fáatiǹ bi-timbiilituuŋŋi nì bi-jɔkɔntuuŋŋee, m làá yàntī bi-tuuŋŋi ń gítí bíǹ bi-ba pu.> Man ni-Dindaan Unimbɔti di lī míǹ.»

Unimbɔti nyooti yíkì Jeerusaleem

22 Niinee keerubimbee kpátì bi-feeŋyi ki kpáaǹ ataayee ní Isirayeel Nimbɔtiu nyooti nìn bí bi-pu ki ŋmíntí. 23 Ti-Dindaan nyooti nìn yíkì kitiŋ kansikin ní ki cūtìi yúl̀ dijool din bí kitiŋ ŋgan púee. 24 Ŋfam nìn yōoǹ-mi ki cáa cūnnì Babiloon, bin bi cúú kuyuŋuee cee. Unimbɔti Fam di nìn lēē ki dàkā-mì. Dileedakal din m nìn ká gbantee nìn wáŋkì. 25 M nìn tùkū bin bi cúú kuyuŋuee tin ti-Dindaan lēē ki dàkā-mee.