Eeseekiyeel 8

Iwaatooti in bí kunimbɔtidiinee

1 Bi nín cúú Isirayeel yab kuyuŋu ki cùnnì Babiloon abin aluu poon, iŋmal iluu wiŋŋmooŋmootiŋuee, m nìn kā m-dumpu ní Juuda yab tindaŋkpilib kā m-nimbiin. Dicilpu niinee ní ti-Dindaan Unimbɔti pɔŋŋu kpákatìń m-pu. 2 M bí yii ḿ kpèèyee, tiwan tiba nìn bí ki náań nì unil. Kí yòon̄ tin bí ki náań nì u-caŋ yamee taapuee, an sá ŋŋmi ní. Kí yòon̄ u-caŋ gbanti kí nīn jɔ́ḿee, an bí kii ŋwalifee ní ki jìl̀ kii sindaariya un bi dūu ŋá ŋŋmin an mántèe. 3 U nìn tāntì tiba bí kii ŋŋalee ní ki cúú m-yikpiti. Niinee, dileedakal din nìn nyánní Unimbɔti cee gbanti poonee, Ŋfam nìn yōoǹ-mi m kíǹ ki bí yilpu nì taapu kansikin ní ki cáá-mi ki cūnnì Jeerusaleem tiŋkin. M ká yii m bí kitiŋ punyɔkɔki kin bí ŋgan púee poon pú, laakin bi nìn dū diwaal din bí ki kùtī Unimbɔti poonee ki síiǹee. 4 Isirayeel Nimbɔtiu nìn tí nyántì u-nyooti ki dàkā-mi niin, kii m nín nìn ká dileedakal poon pu ditantakalinee. 5 Unimbɔti bí-mi yii: «Nisaaleen, kpèè ŋgan pú.» Ní m wáaǹ ki kpēē. Kipunyɔkɔ kin bí ŋgan púee, nsaraafan ŋubɔ nìn bí niin. Diwaal din nìn bí ki kùtī Unimbɔti poonee nìn bí nsan ŋun cá nsaraafan gbanti ceeyee. 6 Ní Unimbɔti bí-mi yii: «Nisaaleen, a wāĺ tin bi bíi ŋáańeeee? Isirayeel yab baasii dū bi-ba ki líiǹ ntimbiil tuuŋŋi kí jà-mi kí wàatī m-circir Kɔŋkooŋŋu ní. Ama a làá gíti ká ntimbiil tuuŋŋi aba mun.»

7 Ŋfamee nìn yōoǹ-mi ki cūnnì dicindi punyɔkɔpu. M bí yii ḿ kpèèyee, dibundi diba bí digundin. 8 Unimbɔti bí-mi yii: «Nisaaleen, lùkù kí cíĺ digundi.» Niinee ní m lùkū ki cíl̀ ní dibundi dōoǹ. 9 Ní u bí-mi yii: «Kɔ́ kí kpèè ntimbiil nì titantan tuuŋŋi ŋin binib bí doo ki tūǹeee.» 10 M nín kɔ́ee, kun m kée sɔ̀: m nín kpēē ki māntìi túee, m ká bi lēē ikoobu nì tiwaŋkuti tin cáá titantanee digundi kɔkɔ pu. Bi nìn lēē awaa ŋin kɔkɔ Isirayeel yab tòotēe di-pu. 11 Isirayeel yab tindaŋkpilib imuŋku ita nì saalaa nìn yú awaayee nimbiin. Bi-kansikinee, Safan jipɔɔn Yasaniya nìn bí. Bi-kɔkɔ nìn ŋúb́ kisambiki kin poon bi tùutī talaalubee ní talaalu un bi tūūyee nyiim nìn jɔ́ḿ kutaa. 12 Unimbɔti bālifì-mi yii: «Nisaaleen, a wāĺ kun dinibul nee tindaŋkpilib bíi ŋáań dibalineeee? Báà ŋma yú mpaan ŋun pu u-waal bée ní. Bi bí ki pɔ̀ bi-ba ki lì yii: <Ti-Dindaan kaa wāĺ-ti, u dū u-tiŋki ki fá.>» 13 Ní Unimbɔti gíti bí-mi yii: «A làá gíti ká bi bíi ŋáań ntimbiil tuuŋŋi aba mun.»

14 Niinee ní u yōoǹ-mi u-diiku punyɔkɔki kin bí ŋgan púee. Binimpoobi biba nìn kā niin ki sūǹ diwaal Tamuusi kpool. 15 U bālifì-mi yii: «Nisaaleen, kéè a káa! A làá gíti ká ntimbiil tuuŋŋi aba mun.»

16 Niinee ní u yōoǹ-mi ki cáa cūnnì kunimbɔtidii cindi poon yal. Kí kɔ́ kudiin, kasarka nì nsaraafan kansikinee, bininjab mmuŋku nì biŋmoo nìn bí. Bi nìn fātì bi-boon ki tīī kunimbɔtidii ní bi-nimbiiŋyi túĺ ŋwìiń nyalaŋki. Bi nìn bí ki gbàantí ki jáaḿ ŋwìiń. 17 Niinee ní Unimbɔti bālifì-mi yii: «Nisaaleen, kéè a káa! An kaa sá ntimbiil tuuŋŋi ŋin Juuda yab bí doo ki ŋáań nee ŋmaniŋma ní bi ŋáań, ama bi gíti bí ní ki ŋáań tipɔmbɔti ki gbítí m-ŋuul. Kɔŋkɔnnee, bíǹ di bátì kisupaŋŋi ki cáa cáǹ bi-maŋfal watil púee. 18 An puee, ma mun làá tɔ̄ m-tundi nì m-ŋuul poon. M làá dàkà-bi nnimbinaakulim kaa làá fīī-bi. Bi làá dāá kúuǹ mpɔn kí yíiń-mi, ama maa làá pīlifiǹ-bi.»