Yeereemii 36

Yooyakiim wùn̄ kugbɔŋu kun Baruuki ŋmàn̄ee ŋŋmi

1 Yooyakiim jipɔɔn Joosiyaasi nín kpántì Juuda bɔtiu dibinnanaatiil poonee ní ti-Dindaan sòon̄ nì Yeereemii yii: 2 «Yòon̄ kugbɔŋu kun bi ŋūǹ kí kpáb́ee. Á ŋmà ku-pu tibɔti tin kɔkɔ m yāntì a sòon̄ Isirayeel yab nì Juuda yab nì atimbun kɔkɔ puee, kí yòon̄ ubɔti Joosiyaasi yuntiŋu tin m sòon̄ nì see kí dāá sāā díǹ nee. 3 An yaa yíì Juuda yab yaa gbìl̄ inaabu in m bíi bɔ́ntí kí cáań kí tɔ̄ bi-puee, báà ŋma làá fá u-bimbikpitim. Niinee ní ḿ dū bi-yìntitam nì bi-kpitii kí pɔ̄-bi.»

4 Niinee ní Yeereemii yíiń Neeriya jipɔɔn Baruuki, ní ki kàan̄-u tibɔti tin kɔkɔ ti-Dindaan sòon̄ nì uee, ní Baruuki dūu ŋmàn̄ ki ŋá kugbɔŋun.

5 Ní Yeereemii tùkū Baruuki yii: «Tiba cúú-mi, an puee man m-ba kaa làá ŋmā kí cù kunimbɔtidiin. 6 Ama, sii làá cù dinyɔɔboobil wiiŋŋu dal, ní kí kàaǹ mpɔn ti-Dindaan bɔti tin m kàan̄-si a ŋmàn̄ ki ŋá kugbɔŋunee. Á kàaǹ bin kɔkɔ bí kunimbɔtidiinee ń gbìl̄, ki kpáaǹ bin kɔkɔ nyánní Juuda timmun ki dɔ́mińee. 7 An yaa yíì bi làá kíĺ kí nīn bíi gbàam̄ ti-Dindaan, ní báà ŋma ń fá u-bimbikpitim. Di sá yii ti-Dindaan bí yii u-ŋuukpaandi di dàn̄ dinibul nee pu.»

8 Niinee ní Neeriya jipɔɔn Baruuki ŋá tin kɔkɔ Yeereemii bí-u yii ú ŋée. U nìn cūtì ki kɔ́ kunimbɔtidiin ki kàan̄ ti-Dindaan bɔti tin ŋmàn̄ ki kā kugbɔŋu poonee. 9 Joosiyaasi jipɔɔn Yooyakiim nín kpántì Juuda beel bɔtiu abin aŋmoo uŋmawawati poonee, ní bi yóoǹ yii bí bóob́ kinyɔkɔ ti-Dindaan nimbiin. Jeerusaleem yab kɔkɔ nì Juuda timmun yab kɔkɔ nìn dɔ́miń. 10 Kunimbɔtidiin niinee ní Baruuki kàan̄ mpɔn Yeereemii nyɔɔbuŋŋi ŋin ŋmàn̄ ki kā kugbɔŋu poonee. U nìn yú Safan jipɔɔn Geemariya, ubɔti gbaŋŋmaliu dibikin ní. Kidibiki gbanti nìn bí kunimbɔtidii ciŋkpaandin yilpu pu ki nákáǹ kipunyɔkɔ Kipɔŋ ní.

11 Geemariya jipɔɔn Miikayeewu, Safan naantiiu gbìl̄ ti-Dindaan bɔti tin kā kugbɔŋu poon Baruuki kàan̄ee. 12 Míǹ boonee ní u nín sìntī ubɔti beecindin ki bàn̄ ki kɔ́ ugbaŋŋmal tɔntɔndiikun. Bikàliŋkpilib kɔkɔ nìn kpáfì ki bí niin. Bin nìn bí niinee di sá ubɔti gbaŋŋmaliu Eelsama nì Seemayawuu jipɔɔn Deelaya nì Akibɔɔr jipɔɔn Eelnatan nì Safan jipɔɔn Geemariyawuu nì Ananiyawuu jipɔɔn Seedeesiyasi nì bikàliŋkpilib bin kɔkɔ kíǹee. 13 Ní Miikayeewu dū tibɔti tin kɔkɔ Baruuki kàan̄ kugbɔŋu poon samaa kɔkɔ nimbiinee ki máafì-bi.

14 Niinee ní bikàliŋkpilibee dū Neetaniyawuu jipɔɔn Yeewuudi, Seeleemiyawuu naantiiu nì Kuusii naantitɔntɔkɔl ki tú Baruuki cee ú tùkù-u yii: «Dāan̄ kí kpáaǹ kugbɔŋu kun a kàan̄ samaa nimbiinee.» Niinee ní Neeriya jipɔɔn Baruuki yōoǹ kugbɔŋuee ki cūnnì bi-cee. 15 U bàn̄ee ní bi bí-u yii: «Kàl̄ kí kàaǹ-ti tin kā kugbɔŋu nee poonee.»

Ní Baruuki kàan̄ ki tīī-bi. 16 Bi nín gbìl̄ tibɔti gbanti kɔkɔee, ní tifaandi kɔ́-bi. Bi nìn kíǹ ki kā ki fàtī ki kpèé tɔb, ní ki bí Baruuki yii: «See tí cáá tibɔti nee kɔkɔ kí māafì ubɔti.»

17 Boonee ní bi bālifì Baruuki yii: «Māafì-ti a nín ŋá pu ki ŋúń ki ŋmàn̄ tibɔti nee kɔkɔee?» 18 Ní Baruuki kíí-bi yii: «Yeereemii u-ba nyɔkɔn ní u kàan̄ tibɔti nee kɔkɔ, ní man dū ŋŋmamɔɔn ki ŋmàn̄ kugbɔŋu nee pu.»

19 Niinee ní bikàliŋkpilib bí Baruuki yii: «Si nì Yeereemii ń sāǹ kí báĺ. Ubɔ kaa máaǹ kí béé laakin ni bée!»

20 Bi nìn dū kugbɔŋuee ki yóoǹ ubɔti gbaŋŋmaliu Eelsana tɔntɔndiikun. Míǹ boonee ní bi nín cá dibeecindin ubɔti cee ki máafì-u tin kɔkɔ jítèe.

21 Niinee ní ubɔti dū Jeewuudi ki tú ú cùú cáań kugbɔŋuee. Úǹ nìn cūtì Eelsama tɔntɔndiikun ki yōoǹní kugbɔŋuee, ní ki kíĺ ki bíi kàaǹ-ku mpɔn ubɔti nì bikàliŋkpilib bin kɔkɔ nìn yú ki māntìi tú-uee nimbiin. 22 Ubɔti nìn kā tiwool yuŋtiŋu diikun. An nìn sá dibindi poon uŋmawawati, tiwool yuntiŋu ní. Bi nìn kpāā ŋŋmi niin ní ubɔti yú ki wùl̀. 23 Jeewuudi yaa nìn pée kàan̄ ikuul ita àá inaayee ní ubɔti ń dū bɔlfi kí gíí dijandi gbanti kí tɔ̄ ŋŋmin. U nìn pée ŋá míǹ ní ki dāa wùn̄ kugbɔŋuee kɔkɔ ŋŋmi. 24 Ubɔti nì u-kàliŋkpilib nìn pílifì an bɔtee kɔkɔ. Ama an kaa nìn kɔ́ǹ-bi tifaandi, ní baa nìn tí dáaĺ tiwan tin bi nìn pēēyee ki cátì kí dàkà bi-nimbaaku. 25 Áli gba Eelnatan nì Deelaya nì Geemariya nìn gbāam̀ ubɔti ú taa wà kugbɔŋuee ŋŋmi, ama waa nìn pílifiǹ-bi. 26 Ubɔti nìn tīī u-jipɔɔn Yeerameeyeel nì Asiriyeel jipɔɔn Seeraya nì Abideeyeel jipɔɔn Seeleemiyawuu mara yii bí cúú ugbaŋŋmal Baruuki nì Unimbɔti bɔnaatiliu Yeereemii. Ama ní Unimbɔti dū-bi ki bál̀.

27 Ubɔti nìn dū kugbɔŋu kun poon Baruuki nìn ŋmàn̄ tibɔti tin Yeereemii nìn kàan̄-uee ki wùn̄ ŋŋmi. Míǹ boonee ní ti-Dindaan sòon̄ nì Yeereemii yii: 28 «Cùú nyàab̀ kugbɔŋu kubɔ kí fàtīí ŋmà tibɔti tin kɔkɔ nìn ŋmàn̄ ki kā kugbɔmpeepeekaau poon, Juuda yab bɔtiu Yooyakiim dūu wùn̄ ŋŋmee. 29 Míǹ boonee á sòoǹ Juuda bɔtiu Yooyakiim pu yii:

«Ti-Dindaan nín sòon̄ puee sèé: Yeereemii nìn ŋmàn̄ yii Babiloon bɔtiu làá dāan̄ kí nàan̄ kitiŋ nee kí kpɔ̀ binib nì tiwaŋkuti. Ama ní Yooyakiim wòon̄-u ní ki wùn̄ kugbɔŋuee ŋŋmi. 30 Too, ti-Dindaan nín sòon̄ puee sèé: <Yooyakiim kpátam boonee, u-maaliŋu poon báà ubɔ kaa làá kàl̄ Daafiidi beejal pu. U yaa láa kpíìyee, bi làá dū-u kí fá mmɔŋki ní ŋwìiń ń gbá-u ŋwiimpu, ní nsɔnsɔm ń tɔ̄-u kunyeeu. 31 M làá dáaĺ u nì u-maaliŋun yab nì u-kàliŋkpilib tafal ikpiti in bi ŋée pu. M làá cáań inaabu in bɔti m nìn sòon̄ baa pílifiǹ-mee kí tɔ̄ Jeerusaleem yab nì Juuda yab pu.>»

32 Niinee ní Yeereemii nyàab̄ kugbɔmpɔŋ ki tīī ugbaŋŋmal Baruuki, Neeriya jipɔɔn, ní Yeereemii fātìi kàan̄-u tibɔti tin nìn kā kugbɔŋu kun Juuda bɔtiu Yooyakiim dūu wùn̄ ŋŋmee poonee. U nìn gíti kútì tibɔti tin náań nì tíǹ gbantee.