Yeereemii 13

Yeereemii dambalau bɔti

1 Ti-Dindaan nín tùkū-mi puee sèé: «Cùú dā ŋŋaabu ŋun bí fálfalee dambalau kí gbìn̄ a-caŋ, ama á taa dū-u kí tɔ̄ nnyimin.» 2 Ní m cūtìi dá dambala kii ti-Dindaan nín bí yii ḿ ŋá puee, ki dūu gbìn̄ m-caŋ. 3 Ti-Dindaan nìn gíti sòon̄ nì mi nliliitiim yii: 4 «Yòon̄ dambala un ní a dá ki gbìn̄ a-caŋee kí nīn cá Eefiraati mɔɔl caŋin kí dū-u kí báĺ ntaŋkpaween ŋubɔn.» 5 Ní m cáá dambalee ki bál̀ Eefiraati mɔɔl caŋin, kii ti-Dindaan nín nìn tīī-mi mara puee. 6 Iwiin iba boonee ní ti-Dindaan bí-mi yii: «Yīkì kí gítí dimɔɔlee caŋin kí yòon̄ní dambala un m nìn tīī-si mara yii á cáá báĺ niinee.» 7 Niinee ní m nín cá Eefiraati mɔɔl caŋin. M bàn̄ee ní ki nyàab̄ dambalee ki lēeń-u laakin m nìn dū-u ki bál̀ee. Ama m nìn ká yii dambalee nìn bíil̀ kaa ti pée bí tiban.

8 Niinee ní ti-Dindaan sòon̄ nì mi yii: 9 «Man ni-Dindaan nín lī puee sɔ̀. Míǹ ní m làá bīil̀ Juuda yab lambil nì Jeerusaleem yab lambikpaandi. 10 Di sá yii an sá dinibul din nib kaa ŋān̄ee ní. Bi yíì kaa pílifì m-nyɔkɔ, ki nóó bíǹ bi-ba nín là puee saŋŋu. Bi jòó ki pá awaa boon ki tòotī-ŋi. Too, dinibul nee ń kpántí kii dambala un bíil̀ kaa ti bí tiban nee.» 11 Ti-Dindaan nín lī puee sèé: «Kii unil nín dù dambala kí gbìn̄ u-caŋ puee, míǹ ní m nìn dū Isirayeel yab nì Juuda yab ki bóob́ ki nákáǹ m-ba. M nín nìn là puee di sá bí nīn sá man nibul, kí nyā diyindi, kí nīn sá m-jilmau nì m-nyooti. Ama ní baa gbìl̄ ki tīiǹ-mi.»

Ndamam nì ti-Dindaan ŋuul

12 «Á tùkù-bi yii: <Ti-Dindaan Isirayeel yab Nimbɔtiu nín lī puee sɔ̀. Tilɔn bí bí nīn fūuntí ndaam ní>. Bi yaa kíí-si yii: <Mimmee timbi kaa nyí tilɔn nín bí bí nīn fūuntí ndaameeee?> 13 Niinee ní á tùkù-bi yii: <Ti-Dindaan nín sòon̄ puee sɔ̀. M làá yàntī kitiŋ nee pu nib nì bibɔtiibi bin kā Daafiidi beejal puee, nì bisaraaŋaliibi nì m-bɔnaatiliibi nì Jeerusaleem yab kɔkɔ ń gbí. 14 Man ni-Dindaan di bí yii m làá dū-bi kí yāŋkì tɔb kí kɔ̄fì, bibaatiibi nì mbiyaamu dicilpu. Maa làá tàan̄ báà ubɔ. Maa làá dàkà kulaŋŋaŋfitiiuaaa, kaa làá sɔ̄ isaa mun. Tiba nì tiba kaa làá cúú-mi ḿ taa nàan̄-bi.>»

Ti-Dindaan bíi kpáafí u-nibul

15 Pīlifìmaan, kpòom̄maan ni-tafal,

taa nín̄ sámaan bilambidambi.

Ti-Dindaan di bíi sòoǹ.

16 Tīīmaan ti-Dindaan ni-Nimbɔtiu tinyool

kí wàatī ní dibɔmbɔndi wiiŋŋu ń nín bàń,

án nín làá ŋá pu ní taa láa gbéetí

ajoon ŋin pu kunyeeu mɔ́ee.

Ni bàà kā ki cí ŋwalifi dee,

ama ní u dūu kpántì ŋkúm bɔmbɔndi,

ki dūu kpántì ditagbambɔndi.

17 Ni yaa kaa pílifì tibɔkpaafikaal nee,

m làá nīn sūǹ dibalin ni-lambil pu.

Nnyinnyim làá gbí m-nimbiliŋ kí nīn bàtifī,

kun puee bi cúú ti-Dindaan picaŋkpuŋku

ki cūnnì kuyuŋu.

18 Tùkù ubɔti nì u-na yii:

«Kàl̄maan kitiŋ,

di sá ni-beefuunyaaŋki nyáń ni-yil pu

ki lítì kitiŋ.

19 Bi pīiǹ Neegeeb timmu punyɔmmu,

ubɔ kaa ti pìitī-mu.

Bi cúú Juuda yab ki cūnnì kuyuŋu,

bi-kɔkɔ búntì ubɔ kaa kíǹ.

Jeerusaleem tiŋki fá ki-nyooti

20 Wáaǹ kí kpèè bin nyánní ŋgan pú ki dòońee.

Kupicaŋkpuŋu kun m nìn kpāaǹ-see bí la?

Apibil ŋin nìn tìì-si tinyoolee bí la?

21 A yāntì biba kpántì a-bɔɔbi.

An nib gbanti yaa láa yíkì ki bíi jáà nì si

kí jī a-pu dinyandee,

a làá dāá lì yii ba dee?

A làá dāá jī falaa

kii unimpu di kāl̀ imatiŋween puee.

22 Niinee, a làá dāá bàlifì yii:

Too, bi yaa láa kóoǹ a-wɔndoou,

ki bíi ŋáań-si tipɔmbɔtee,

an sá a-kpitii nín wīikée pu.

23 «Unibɔn ŋūǹ kí kpántí u-wuŋgbaŋŋuɔɔɔ?

Ugbii ŋūǹ kí pítí u-tàmaaa?

Míǹ mbaantiim ní nimbi bin mántiǹ ikpiti diŋálee,

naa ŋūǹ kí ŋá tiŋan.

24 M làá jà-ni kí yàl̄ an kɔkɔ pu

kii kuteeun buŋku nín yòontí timool puee ní.»

25 Ti-Dindaan bí yii:

«Jeerusaleem, tin dɔ̄ ki cí-see dee.

Dijandi din m kpáafì ki yóoǹ-see dee.

Di sá yii a súntì man pu,

ní ki dū a-mákal ki páaǹ awaa pu.

26 An puee ma mun làá kóoǹ a-wɔndoou

kí cáá sāā a-nimbiin pu,

ní bí wāl̀ a-cooi.

27 Yéēee! A-laakpaati nì a-mɔŋŋu biilii

nì a-laakpaatuuŋŋi ŋin kɔ̄ntí-si icoo na!

M ká a-gbantammu pu nì a-satin

a-waaŋi ŋin sá ntimbiil wantee.

Ba naabuŋu ŋúǹ bulifi dee, Jeerusaleem,

aa là kí ŋá a-ba circir.

Án làá nīn bí míǹ kí tin sāā ŋyunti ŋulɔŋu ní?»