Yeereemii 7

Dimákakulindi

(Kpèè Yeer 26.1-19)

1 Tibɔti tin Unimbɔti nìn sòon̄ ki tùkū Yeereemiiyee sèé: 2 Cùú yūĺ kunimbɔtidii punyɔkɔpu kí bāakì tibɔti nee: «Ní pīlifìmaan ti-Dindaan bɔti nee, nimbi Juuda yab bin dì kipunyɔkɔ nee ki kóò ki jáaḿ ti-Dindaanee. 3 Ti-Dindaan Mpɔŋkɔdaan, Isirayeel yab Nimbɔtiu nín sòon̄ puee sɔ̀. Kpántímaan ni-bimbim nì ni-ŋáaǹtam, án nín làá ŋá pu ḿ nīn kóò ni-cee kitiŋ nee poonee. 4 Ní taa nín̄ kùbitī ki lì yii: <Doo di sá ti-Dindaan Diiku, doo di sá ti-Dindaan Diiku, doo di sá ti-Dindaan Diiku.> Ní taa dū ni-mákal kí páań anyɔɔbuŋkiilkaa gbanti pu. 5 Ní kpántí ni-bimbim nì ni-ŋáaǹtam. Ni nì ni-jutiibi kansikinee, ubɔ ń taa mùul̀ u-juti. 6 Ní taa mùul̀ unicaan nì ditaŋkpiibil nì ukpiipu. Ní taa kpɔ̀ maanyiiba kitiŋ nee pu. Ní taa nín̄ jòó ki pá awaa ŋin làá cáá-ni kí kɔ́ǹ mbusunee boon. 7 Niinee ní ḿ yàntī ní kàl̄ kitiŋ kin m nìn tīī ni-naanjab kí nīn cá abin abinee pu.

8 «Ama ní ni dū ni-mákal ki ŋá tinyimɔmbɔti tin kaa bí tiba nee ni. 9 Baaa! Ni yù, ki kù binib, ki ŋáań tilaakpaal, ki pùtī fám, ki tùutī talaalu ki tìì diwaal Baal, ki sáń ki pá awaa ŋin ni nì ŋi kaa cáá mpèé ŋubɔee boon. 10 Míǹ boonee ní ní dāan̄ kí gbàan̄ m-nimbiin, kudii kun bi dūu sú-mee poon ki lì yii: <Ti ká difiil!> ní boonee ki gbíntìi nìkì ki tūǹ ntimbiil tuuŋŋi. 11 Kunimbɔtidii kun bi dūu sú-mee ní ni dūu kpántì kunaayudii naaa^a? Too man nín wāĺ-ku puee dee.» Ti-Dindaan di lī míǹ.

12 «Cùmaan Siiloo^b circir paaŋŋu pu kí kpèè. Dooooyee, niin ní m nìn kóò. Ní kpèè, Isirayeel m-nibul toom puee, m nín ŋá mpaan gbanti puee. 13 Too, man ni-Dindaan nín sòon̄ puee sɔ̀. Ni mun yīntì kii bimbee. M yōoǹ ŋyunti ki kpáafì-ni, ama ní naa pílifì, m yíiń-ni ní naa kíí-mi. 14 Kpèè ni dū ni-mákal ki páaǹ kunimbɔtidii nee pu. Bi dū-ku ki sú-mi, ní man dū-ku ki tīī ni nì ni-naanjab. Too, m làá ŋá-ku kii m nín nìn ŋá Siiloo circir paaŋŋu puee ní. 15 M làá dū-ni kí fá ndan kii m nín fá ni-nabiyaamu Eefiraayiim naantiibi puee ní.»

Ŋwimmeem min Unimbɔti kaa pílifée

16 «An puee sii Yeereemii, á taa gbàam̀-mi dinibul nee pu. Á taa ti mèè-mi bi-pu, kí taa ti tīminsì bi-pu. Á taa nīn kā m-pu, maa làá pīlifiǹ-si. 17 Saa wāĺ tin kɔkɔ bi bí ki ŋáań Juuda timmun nì Jeerusaleem daŋŋi pueeee? 18 Mbiyaamu là idɔ ní bibaatiibi kpà ŋŋmi, ní binaatiibi nùkù ŋyim kí ŋá kalaabi kí tīī yilpu Nimpubɔtiu. Ni féeń awaa nnyim ki gbítí m-ŋuul. 19 Ti-Dindaan bālifì yii: <Mimmee man ní bi dàkafī yii bi ŋáań ikpitaaa? Bi ŋáań bi-ba ní, ní an sá bi-cooi!>»

20 «Too, m làá kpáatí m-ŋuukpaandi kí sìtī mpaan nee nì binib nì ipeel nì tisatin sufii nì tikpaajin pu. Di làá nīn bí kii ŋŋmi ŋun kaa kúùyee ní.»

Ditimbundi din kaa pílifí di-Nimbɔtiuee

21 Ti-Dindaan Mpɔŋkɔdaan, Isirayeel Nimbɔtiu nín lī puee sèé: «Dūmaan ni-saraawɔkaabi nanti kí kūtì saraafantantiibi nanti pu kí ŋmɔ́maan ni-ba. 22 M nín nìn nyántì ni-naanjab kuyuŋun Eejipiti tiŋkinee, maa nìn tùkū-bi yii bí ŋá tiba. Maa nìn bí-bi yii bí ŋá bisaraawɔkaabi àá saraabi biba kí tīī-mi. 23 Ama m nìn kpáafì-bi yii: <Ní pīlifìmaan m-nyɔkɔ. Ni yaa ŋá míǹ, m làá nīn sá ni-Nimbɔtiu, ní nimbi ń nīn sá man nibul. Nóómaan nsan ŋun m cátì ki bíl̀-nee ní án nīn ŋān̄ ki tīī-ni. 24 Ama baa nìn pílifiǹ-mi, kaa kpōoǹ bi-tafal ki pílifì. Bi lēē kí nóó bi-landɔkɔkpitii. An nìn bàà sá bí fàtī bi-nimbiin kí túĺ-mee, ní bi fātì bi-boon ki tīī-mi. 25 Kí yòon̄ ŋwiin ŋun m nyántì ni-naanjab Eejipiti tiŋkin kí dāá sāā díǹee, m pée tūǹ baabadal m-tɔntɔnliibi bibɔnaatiliibi ni-cee ní kaa gbèentí. 26 Ama ní naa pílifiǹ-mi. Naa kpōoǹ ni-tafal kí pīlifì. Ni ŋá ŋyipɔn, ki ŋá tin jítiǹ ni-naanjabee.>

27 «Sii Yeereemii, a làá tùkù-bi tibɔti gbanti, ama baa làá pīlifiǹ-si. A làá dāá téeń kí yíiń-bi, ama baa làá kíí-si. 28 Tùkù-bi yii: <Kpèèmaan, ni sá ditimbundi din kaa pílifí di-Dindaan di-Nimbɔtiu nyɔkɔ, ní kaa fòol̄ u-saŋkiiyee ní. Tin bí deedeeyee kpíì ni-cee, ní ubɔ kaa ti sòoǹ ti-pu.>»

Laakin bi pɔ̄fì binibee tantakal

29 Ti-Dindaan bí yii:

«Juuda nibul,

Cā a-yikpiti tin dàkà yii a dū a-ba ki sú-mee kí fá,

kí tóoń ŋkpiisilan ajoon ŋin yilpu kaa cáá timoolee pu.

Di sá yii a sá dinibul din kɔ́ǹ man ni-Dindaan diŋuulee ní.

An pu ní maa ti là kí wāl̀-si

ki dū-si ki fá.»

30 Ti-Dindaan bí yii: «Juuda yab ŋá tin kaa ŋān̄ee m-nimbiin. Bi cáá bi-waaŋi ŋin sá ntimbiilee ki kɔ́ǹ Kudii kun bi dūu sú-mee poon ki kɔ́ǹ-ku tijɔkɔndi. 31 Been-Inɔɔm tantakalinee, bi bɔ́ntì ŋwaapaan ŋun bi yíì Toofeetee. Niin ní bi cáá bi-jipɔmbi nì bi-bisalib ki tòotī ki wù ŋŋmi ki ŋáań saraabi^c. Maa pée tīī-bi mara yii bí ŋá míǹ dalba dalba, kaa kpáàa dākafì an pu ŋwindal.»

32 Ti-Dindaan bí yii: «Iwiin bí ki dòoń, baa dāa gíti yíì mpaan gbanti yii: <Toofeeti> àá <Been-Inɔɔm tantakal>, ama <dipɔ̀fil tantakal>. Niin ní bi làá dāá síb́ anikpil, di sá yii mpaan kaa dāa gíti bí laaba bí síb́-ŋi. 33 Inoon nì ipeel làá dāá gbáb́ kí bìin̄ anikpil gbanti pu ki jīǹ, ní ubɔ dāa kpá kí jà-i. 34 M làá dāá yàntī Juuda timmun nì Jeerusaleem daŋŋi pu ifaal nì dipɔɔpindi laŋyi ń ŋmīĺ. Ubɔ kaa dāa gíti gbìl̀ animpucaŋgbiil pu. Di sá yii kitiŋ làá dāá kpántí adigbuŋkati ŋma ní^d.