Uciŋfiti Gbɔŋku 3

Tiwan kamaa nì ti-yuntiŋu ní

1 Kitiŋ nee puee, tiwan kamaa cáá ti-yuntiŋu, ní ŋyunti kamaa cáá ti-wanti.

2 Ŋyunti bí bí màal̀ unil

ní ŋyunti bí ú kpú,

ŋyunti bí bí cóoń busubu,

ní ŋyunti bí bí fùkù-bu.

3 Ŋyunti bí bí kpɔ̀

ní ŋyunti bí bí cáaǹ,

ŋyunti bí bí nàan̄

ní ŋyunti bí bí mā.

4 Ŋyunti bí bí sɔ̄

ní ŋyunti bí bí lā,

ŋyunti bí bí yāliŋkì

ní ŋyunti bí bí ŋɔ̄.

5 Ŋyunti bí bí tɔ̄ ataŋkpee

ní ŋyunti bí bí tòò-ŋi,

ŋyunti bí bí kpàl̄ tɔb,

ní ŋyunti bí bí kpàtī.

6 Ŋyunti bí bí nyàab̀

ní ŋyunti bí bí fá.

7 Ŋyunti bí bí cátí

ní ŋyunti bí bí ŋáĺ,

ŋyunti bí bí nīn ŋmí

ní ŋyunti bí bí nīn sòoǹ.

8 Ŋyunti bí bí nīn néeń

ní ŋyunti bí bí nīn ná.

Kujaau yuntiŋu bí

ní ŋgbansɔŋfi yuntiŋu bí.

9 Ba paatii ní un tūǹ ditundee kāntí u-tundi gìńdi poon? 10 M kpēē atuun ŋin ní Unimbɔti dūu túǹ unil puee. 11 Unimbɔti yàntī tikɔkɔ bàń ti-yuntiŋu ní. U gíti tí tīī binifoobi nlandɔkɔ bí béé tin jítèe nì tin bí ki dòońee. Nì míǹ kɔkɔee, baa ŋūǹ kí béé tin kɔkɔ Unimbɔti ŋée. 12 M nyí mun yii nnaam min pée bí ki tīī-bee di sá bí jī mmɔn bi-maŋfal wiiŋyi poon kí fàal̀. 13 Unil yaa ká kí jī, kí nyɔ̀ ní ki bíi jīǹ u-tundi puee, an sá Unimbɔti pɔl ní. 14 M nyí mun yii tin kɔkɔ ní Unimbɔti ŋáańee làá nīn pée bí kí nīn cá jaanjaan, tiba kaa kútí tin u ŋée puɔɔɔ, tiba kaa bàtī mun. Unimbɔti ŋáań míǹ yii unil ń nīn fàŋkí-u ní^a. 15 Tibɔti tin bíi jītí kɔŋkɔnnee nìn pée jítì dooooyee. Tin bí ki làá jītí fool boonee mun nìn pée jítì dooooyee ní. Unimbɔti yàntī tin kɔkɔ pée jītée fàtīi kífí mpɔm ní.

Tikɔkɔ kúntíǹ ŋkúm ní

16 Kpèè tin m gíti dáań ki ká kitiŋ pu dooyee: laakin marab bàà máaǹ kí tɔ̄ ditundee, tin kaa bí deedeeyee di bí, laakin ibaamɔn bàà máaǹ kí nīn bée, tin kaa bí deedeeyee di bí niin. 17 Niinee ní m lī m-ban yii Unimbɔti làá sòoǹ deedeedaan nì unikpiti bɔti. Di sá yii tiwan kɔkɔ cáá ti-yuntiŋu, ní u làá sòoǹ ti-tuuŋŋi kɔkɔ bɔti. 18 M lī m-pɔbilin binifoobi pu yii: Unimbɔti là kí ká bi nín cáá kudapɔɔu kuŋyee ní kí dàkà-bi yii bi bí kii tiwaŋkutee ní. 19 Di sá yii unil nín kúntíǹ puee, míǹ mbaantiim ní kuwaŋkuluu mun kúntíǹ. Unil kúù ní kuwaŋkuluu mun kúù. Bi-kɔkɔ pée cáá kufoobaantiiuee ní. Unil kaa jítiǹ kuwaŋkuluu, kun puee tikɔkɔ pée sá kii kubuŋuee ní^b. 20 Tin kɔkɔ pée cáá kufoouee nín kúntíǹ puee dee. Kufoou kamaa nyánní ntamin ní ki làá fàtīí gítí ntamin^c. 21 Ubɔ kaa ŋūǹ kí lì yii unil fooku kúǹ jɔ́ḿ yilpu yilpu, ama ní kuwaŋkuluu kúǹ yɔkɔ sìntī kitiŋ taapu taapu. 22 An pu ní man ká yii tin pée ŋān̄ ki tīī unilee di sá ú jī u-tuuŋŋi ŋin u túńee pu, kun puee u paatii dee. Di sá yii ubɔ kaa ti làá gíiǹní-u ú ká u-kpátam nín làá dāá nīn bí puee.