Alaŋkpan Gbɔŋku 4

A yaa ká iciinee, á nīn ŋúb́-i

1 M-biyaamu, pīlifìmaan ubaati dàkatam. Ní pīlifì tiŋan ní kí kpántí binyiliibi. 2 Di sá yii dinyil din sá dimɔntiilee ní m bíi tìì-ni, ní taa dū tin m bíi dàkà-ni nee kí fá. 3 Ma mun nìn sá m-baa jipɔmmɔntiu ní, ní m-na nìn néeń-mi tikpil kii dijipɔmbaabilee. 4 M-baa nìn dàkà-mi ki lì yii: «Cúú m-nyɔɔbuŋŋi kí ŋá a-pɔbilin, kí nīn nóó m-bɔkpaaŋi tiŋan, mimmee a làá kàl̄ kitiŋ pu kí yúntí. 5 Ká iciin nì dinyil, kí taa súntí m-nyɔɔbuŋŋi puɔɔɔ, kí taa fàtī a-boon kí tīī-ŋi mun. 6 Taa dū iciin kí fá, i làá nīn cí-si, nín̄ néeń-i, i làá nīn wúń a-pu. 7 Iciin kílilaŋki di sá á pɔ́ɔǹ kí bīfì kí béé-i, dū tin kɔkɔ a cááyee kí sú kí ŋmā kí ká dinyil. 8 Dū iciin kí nákáǹ a-ba kpátí kpati, i làá yòon̄ a-yindi yilpu. Bìb̄ iciin, i làá tīī-si tinyool. 9 I làá nīn sá kii ŋŋaamɔntee ki yíĺ a-yil, ní kí nīn sá kii kibeefuulii kimɔmmɔntiiyee ki cíkí a-yil pu.»

Taa nín̄ cáá binikpitib bimbim

10 M-biki, pīlifiǹ-mi, fōō m-nyɔɔbuŋŋi ní kí kàl̄ kitiŋ pu kí yúntí. 11 M bíi dàkà-si iciin saŋŋu, m kpòotī-si á nīn còom̄ deedee sàmbiyaamu pu ní. 12 Mimmee a yaa bíi còom̄ee, tiba kaa làá lìkin̄-si, a yaa tí bíi sáńaaa, aa làá gbéetí. 13 Nín̄ ŋúb́ tin bi dàkā-see, taa dū-tì kí fá. Nín̄ ŋúb́-tì, kun puee tíǹ di sá a-maŋfal. 14 Taa fōō binikpitib bimbim, kí taa nóó bikpitiŋaliibi saŋŋu. 15 Yàntī-ŋu, taa nóó-ŋu. Gɔ́ntí-ŋu ní kí cùú dī laaba. 16 Di sá yii an nibee yaa kaa ŋá tin kaa ŋān̄ee, baa ŋūǹ kí gèeǹ, bi yaa kaa yāntì ubɔ lítì, ŋgeem kaa cútí-bi. 17 Di sá yii bi ŋáań ikpiti ní ki kāntí ki jīǹ, tipɔmbɔti ní bi ŋáań ki kāntí ki nyù. 18 Nsan ŋun deedeedambi nóóyee sá kii ntaafaabɔmbɔm walifiŋuee ní, ŋu pée nyàatī ní ki pɔ́ɔkí ki cá áli kutaa ń dāá wúntí kɔkɔ. 19 Ama binikpitib bíǹ saŋŋu sá dibɔmbɔndi ní. Baa wāĺ tin dɔ̄ nsanni bi làá cùú gbéetée.

Nín̄ cáá mbimbimɔntiim

20 M-biki, pīlifì m-nyɔɔbuŋŋi tiŋan, kpòon̄ a-tafal kí pīlifì m-saŋkii. 21 A-nimbiliŋ ń nīn pée cɔ́ i-pu, dū-i kí ŋá a-pɔbil poon poon. 22 I sá dimaŋfal ní ki tīī bin ká-iee, ní ki sá ŋgbampɔn ki tīī bi-wunti kɔkɔ. 23 Kpèè a-pɔbil tiŋan, di sá yii díǹ di sá a-maŋfal nyeeŋu. 24 Cúú a-nyɔkɔ kí taa pée sòoǹ tinyimɔmbɔti, kí taa pée sòoǹ kí bīil̀ a-juti. 25 Á nīn pée kpèé a-nimbiin, yàntī a-nimbikpeeŋu ń nīn pée bá nyɔkɔpu. 26 Á kpèè nsan ŋun a làá dēe tiŋan, a-sàmbiyaamu ń nīn sá mun tèen̄ee^a. 27 Taa kpèetī kí cù ŋgiil puɔɔɔ, kí taa kpèetī kí cù ŋgan pú. Sāǹ kí wàatī tin kaa ŋān̄ee.