Ilan 99

Ti-Dindaan sá ubɔti, úǹ baba di sá Unimbɔtibaamɔn

1 Ti-Dindaan di sá ubɔti,

anibul ń nīn jìkì nì tifaandi!

U kā u-beejal din tɔ́kɔ́ keerubimbi puee,

kitiŋ ń cìŋkì!

2 Ti-Dindaan sá ukpaan Siiyɔn tiŋkin,

- ní ki tɔ́kɔ́ anibul kɔkɔ pu.

3 Bí nyɔ̄ŋkì a-yiŋkpaandi din cáá tifaandee!

- Dì sá circir yindi ní!

4 Kun tìì ubɔti mpɔnee di sá ú nīn néeń ibaamɔn.

Sii di yóoǹ marab bin tèen̄ee.

Sii di ŋá tin bí deedee nì tin tèen̄ee Isirayeel tiŋkin.

5 Ní nyɔ̄ŋkìmaan ti-Dindaan ti-Nimbɔtiu,

ní gbàam̄maan u-beejal taapu!

- U sá circirdaan ní.

6 Mooyiisi nì Aarɔn bin nìn sá u-saraaŋaliibi kansikin bibee,

nì Samiyeel un nìn sá bin yíì u-yindee kansikin ubɔee,

nìn yíì ti-Dindaan ní u nìn kíikí-bi.

7 Unimbɔti nìn sòoǹ nì bi ditagbancancaal poon^a.

Bi nìn ŋúb́ u-bɔkpaaŋi,

nì marab bin u nìn tīī-bee.

8 Ti-Dindaan Unimbɔti, sii a-ba di nìn kíikí-bi.

A nìn sá Unimbɔti un jīǹ bi-pu kimɔtiiyee,

ama a nìn dátí bi-tafal bi-yìntitam pu.

9 Nyɔ̄ŋkìmaan ti-Dindaan ti-Nimbɔtiu.

Gbàam̄maan kí túĺ u-circir jool.

- Di sá yii ti-Dindaan ti-Nimbɔtiu sá circirdaan ní.