Ilan 44

Ti-Dindaan, taa dū-ti kí fá talku

1 Koora dicaŋkun yab di ŋmàn̄ nlan nee ki tīī bilaŋgaaliibi kpiliu.

2 Unimbɔti, ti-tafal gbìl̄ ní ti-baabi mun máafì-ti

atuŋkpaan ŋin ní a nìn ŋá bi-yuntiŋu,

iyunti in jítèe poonee.

3 A nìn dū a-pɔŋkpaaŋŋu ki jìn̄ atimbun

ní ki dū ti-baabi ki kāaǹ.

A nìn dáaĺ anibul tafal

ní ki yāntì an bútì ti-baabi.

4 An kaa sá bi-janjawanti ní bi nìn dūu jáń ki fōō kitiŋ,

kaa tí sá bi-pɔŋŋu pu ní bi nìn ká dijajil.

Ama an nìn sá a-pɔŋŋu nì a-kpabil pu,

nì a-bítam bi-cee, di sá yii bi-bɔti nìn mɔ̄ǹ-si.

5 Sii di sá m-Bɔtiu nì m-Nimbɔtiu,

tīī mara ní a-nibul ń ká dijajil.

6 Sii pu ní ti jáà ki pɔ́ɔkíǹ ti-nannanliibi,

a-yindi pu ní ti tà ki mátí bin dòoń ki jáà nì tee.

7 Maa máká m-tɔbu pu,

an kaa tí sá m-tàataajiki di tìì-mi dijajil.

8 Sii di fìil̄-ti ti-nannanliibi ŋaan,

ní ki kɔ̄ntí bin ná-tee icoo.

9 Ti làá nīn gà ilan ki nyɔ́ŋkí sii Unimbɔti baabadal,

ní kí nīn jáaḿ-si kí taa gbèen̄.

10 Kɔŋkɔnnee, a dū-ti ki fá ki kɔ́ǹ-ti icoo.

Aa ti lìntī ti-janjakitiŋ nyɔkɔpu.

11 A yāntì taa ŋúń ki síl̀ ti-nannanliibi nimbiin,

ní bi dɔ́miń ki fúkúl̀-ti pílpil.

12 A dū-ti ki tīī kii ipii in bi cáǹ kí kpɔ̀ee,

a yāntì ti yàl̄ ki tin kóòń nnicantimun.

13 A dū a-nib ki nyáfì tilèel,

kaa kpáàa nyàab̄ kí ká ipaati poon.

14 A yāntì ti-kɔŋkɔnaatɔb sìí-ti,

ní bin māntìi tú-tee bèel̄-ti ki lāā.

15 A yāntì atimbun ŋin kíǹee cáá ti-bɔti ki gà ilan,

ní bi bèel̄-ti ki gbákafí bi-yiliŋ.

16 Baabadalee, m-naabuŋu di dɔ̄ m-nimbiin m wāĺ,

ní maa ti ŋūǹ kí yáatí m-yil icoo pu.

17 M gbìl̀ bi bèel̄-ti ki sìí-ti.

M wāĺ unannanli nín bí ki tɔ̀ ipɔntoon puee.

18 Tin bí nee kɔkɔ bāań-ti, ama taa súntì a-pu,

kaa tí fātì ti-boon ki tīī a-poondi.

19 Taa fātì ti-kpaŋkpamboon ki tīī-saaa,

kaa yīntiǹ a-marab mun.

20 Ama a jìn̄-ti ki tɔ́ laakin jiiŋkpaaibi kóòyee,

ki dū dibɔmbɔŋkpaandi ki bīiǹ ti-pu.

21 Ti yaa nìn súntì ti-Nimbɔtiu pu

ní ki mēē awaa abee,

22 sii Unimbɔti kaa bàà béetí-tàaa,

sii un di nyí ti-pɔbiliŋ bɔɔŋŋee?

23 Sii ti-Dindaan pu ní ti tūŋkí ŋkúm baabadal,

ní bi ŋáań-ti kii ipii in bi cáǹ kí kpɔ̀ee^a.

24 Ti-Dindaan, fìntī! Ba pu ní a dɔ̄ ki gèeǹ ní?

Yīkìm̄, taa dū-ti kí fá kí nīn cá jaanjaan!

25 Ba pu ní a dū a-nimbiin ki bál̀-ti

ki súntì ti-falaau nì bi nín wɔ́b́-ti puee míǹ?

26 Di sá yii ti dɔ̄ ntamin ki fìlim̀,

ki cìb̄ kitiŋ.

27 Yīkìm̄, dāá jòoń-ti!

A-neeŋkpaandi puee, dāá fīī-ti kí líí.