Neeyeemiya 13

Neeyeemiya fātìi bɔ́ntì tikɔkɔ

1 Ŋyunti gbantee, bi nìn bí ki kàaǹ Mooyiisi gbɔŋkun Isirayeel yab nimbiin, ní ki ká an ŋmàn̄ yii Amɔn yab nì Moowaab yab kaa máaǹ kí cèeǹ Unimbɔti nibul poon^a. 2 Di sá yii baa nìn túŋkì Isirayeel yab ki tīī-bi tijin nì nnyim. Kí kūtèe, Moowaab yab nìn tīī Balaam animbil ú tɔ̄ Isirayeel yab mbusu, ama ní ti-Nimbɔtiu nìn dū mbusuee ki kpántì dibiindi^b. 3 Isirayeel yab nín gbìl̄ bi kàan̄ mara gbantee, ní bi nyántì binicambi kɔkɔ Isirayeel nibul kansikin.

4 Kí wàatī bí nìn lēē nlandɔkɔ neeyee, usaraaŋal Eeliyasiib ní bi nìn lēē ú nīn kpèé ndibiyaamu mun nákáǹ ti-Nimbɔtiu diiku bi yōontí saraabi wantee. U nì Toobiya nín nìn pēē kunabitiiuee puee, 5 u nìn tīī-u kudii kun poon wāā tiŋan bi nìn cāabìń saraabi nì talaalutuukaa nì asambil nì bilee nì ndapɔm nì ŋkpam saalaatiiti ki yōontée. An dàkà yii tin kɔkɔ mara nìn lī yii bí nīn cāabìń ki tìì Leefii yab nì bilaŋgaaliibi nì bipunyɔɔciitiliibee, ki kpáaǹ tin bi nìn lèekī ki tìì bisaraaŋaliibee.

6 Ŋyunti ŋun tibɔti nee jítèe, maa nìn bí Jeerusaleem, di sá m nìn fātìi gítì Babiloon bɔtiu Aritaseerseesi cee u nín jíń dibeel abin mmuŋku nì saalaa nì ali poonee. Boonee ní m mēē ubɔti nsan, 7 ní ki gítìń Jeerusaleem. Niin ní m ká ikpiti in Eeliyasiib ŋá ki dū kudii kun bí kunimbɔtidii cindinee ki tīī Toobiya kóòyee. 8 M nìn fōō diŋuul tikpil ní ki kɔ́ kudiin ki kóoǹ Toobiya wanti kɔkɔ ki tɔ́ ki fá kudii boon. 9 M nìn yāntì bi fíntì kudii gbanti ki ŋá-ku circir, ní m fātìi dū kunimbɔtidiin sambiliŋ nì saraabi nì talaalutuukaa ki síiǹ ti-laŋki.

10 M nìn gbìl̄ mun yii baa nìn tìì dijandi din sá bí nīn tìì Leefii yabee, an puee Leefii yab nì bilaŋgaaliibi bin nìn bí kunimbɔtidiin ki tūǹ atuunee nìn dū bi-tuuŋŋi ki fá ki gítì ki bíi kù tikpaal^c. 11 M nìn wòon̄ bibɔsoonliibi ki bí-bi yii: «Ba pu ní ni dū Unimbɔti diiku ki fá míǹ?» Niinee ní m fātìi kpáfì Leefii yab nì bilaŋgaaliibi ní ki dū bi-tuuŋŋi ki gíiǹ ki ŋúbiǹ-bi. 12 Míǹ boonee Juuda yab kɔkɔ nìn cáań bilee nì ndapɔm nì ŋkpam saalaatiiti ki dūu yóoǹ kudii kun poon bi nìn yōontí saraabi jintee^d. 13 M nìn lēē usaraaŋal Seeleemiya nì umaradakal Saadooki nì uleefiija Peedaya, ní ki dū Saakuur jipɔɔn, Mataniya naantiiu Anan ki ŋàl̄-bi bí nīn kpèé tijin tin bi cāabìń ki yōontée bɔti. Di sá yii báà ŋma nìn máká binib gbanti pu ní. Bíǹ ní bi nìn lēē bí nīn yàkatī bi-nabiyaamu tijin.

14 «Óò m-Nimbɔtiu, taa súntí tin kɔkɔ m ŋée pu! Taa súntí m nín túń kunimbɔtidii tuuŋŋi nì deedee ki bɔ́ntì dinimbɔtinool puee pu.»

15 Ŋyunti gbanti mbaanti ní m nìn ká Juuda yab tiŋkinee, binib nìn bí ki tà ki fɔ́bití asubil ndaam còol̀ ŋwiŋŋuŋfikaa dal. Biba mun nìn bíi tūntí bi-mammu bilee nì ndamam nì fiinyi subiliŋ nì fiigi subiliŋ nì awaŋgul aba mun ki cáa cáǹ Jeerusaleem ŋwiŋŋuŋfikaa dal. M nìn wòon̄-bi ŋwiin ŋun bi nìn bíi nyáfí bi-wantee^e. 16 Tiir yab bin nìn kóò Jeerusaleemee nìn cāabìń ijɔm nì tinyampuwan ki nyáfíǹ Juuda yab Jeerusaleem tiŋkin ŋwiŋŋuŋfikaa dal. 17 M nìn wòon̄ Juuda yab bɔtibiliŋ ki bí-bi yii: «Ba kpitii bulifi ní ni ŋá míǹ, ki kpēē ŋwiŋŋuŋfikaa ŋun bí circiree fám mimmee? 18 Míǹ ní ti-naanjab nìn ŋá. An pu ní Unimbɔti nìn yāntì mbusub nín bí puee nì bi-nyɔkɔm dɔ́miń ki jéetì ti nì ti-tiŋki pu. Ni nín bí ki kpèé ŋwiŋŋuŋfikaa ŋun fám nee, ni bíi kùtī Unimbɔti ŋuul Isirayeel yab pu dee!»

19 M nìn pú kinyɔkɔ yii bí pìin̄ Jeerusaleem punyɔmmu kujoou kun ŋwiŋŋuŋfikaa kífée, kí taa pìitī kí nīn cí ŋwiŋŋuŋfikaa ń jītí. Ní m lēē m-tɔntɔnliibi biba bí cīití mpunyɔmu báà ubɔ ń taa túnní tinyampuwan kí kɔ́ǹní ŋwiŋŋuŋfikaa dal. 20 An puee binyampoobi nì biwannyafiliibi bin nyáfí tiwan nín bí ti-ba ti-ba puee nìn gbíntì Jeerusaleem guŋŋi boon ki dōoǹ diba kii mili pu. 21 Ní m kpáafì-bi ki bí-bi yii: «Ba pu ní ni dɔ̀ digundi nyɔkɔpu kunyeeu ní? Ni yaa gbíntìi dɔ̀ míǹ, m làá yàntī bí cúú-ni.» Kí yòon̄ ŋyunti gbantee ní bi gbēeǹ kaa ti dòoń ŋwiŋŋuŋfikaa dal. 22 Ní m bí Leefii yab yii bí ŋá bi-ba circir kí cùú cīití mpunyɔmu bí ŋmā kí nīn tɔ́ ŋwiŋŋuŋfikaa.

«Kii míǹ mun puee, taa súntí m-pu m-Nimbɔtiu. A-laŋŋaŋfitiiku nín wīikí miŋyee puee, sɔ̄ m-saai!»

23 Ŋyunti gbanti mbaanti ní m dáań ki ká yii Juuda yab nìn cáá Asidoodi nì Amɔn nì Moowaab yab bisalib. 24 Bi-biyaamu dijandi nìn sòoǹ Asidoodi yab sooŋyi ní biba mun sòoǹ ntimu mubɔ yab sooŋyi. Bi-kansikin báà ubɔ kaa nìn gbìl̀ Juuda yab sooŋyi. 25 M nìn wòon̄-bi, ki mēē mbusu ki tɔ́-bi. M nìn gbáń bi-kansikin biba ki dátì ki fùkū bi-yikpiti, ní ki yāntì bi pūtì Unimbɔti yindi pu. M nìn bí-bi yii: «Ní taa ti dū ni-bisalib kí tīī-bi ticati, ní ni nì ni-jipɔmbi ń taa cáá bi-bisalib^f. 26 An kaa sá tibɔti gbanti juti di nìn dáaĺ Isirayeel yab bɔtiu Saloomɔn ki kɔ́ǹ ikpitinaaa? Waa nìn cáá juti atimbuŋkpaan bɔtiibi kansikin. Unimbɔti nìn néeń-u, ki nìn dū-u ki kāaǹ dibeel Isirayeel kɔkɔ pu. Nì míǹ kɔkɔee, úǹ ní binicannimpoobi nìn dáaĺ ki tɔ́ ikpitin^g. 27 Bí dāá gíti gbìl̄ ni mun cee yii ni ŋá ikpitikpaan gbanti kaa yúliǹ Unimbɔti deedee, ki cáá binicannimpoobaaa?»

28 Yooyadaa jipɔɔn ubɔ, usaraaŋakpil Eeliyasiib naantiu coo di nìn sá Sambalati un sá Oorɔn tiŋkinee. An pu ní m nìn jìn̄-u ki nyántì Jeerusaleem.

29 «Óò m-Nimbɔtiu, taa súntí binib bin di bíil̀ disaraaŋal tundee nì mpèé ŋun a ŋá si nì bisaraaŋaliibi nì Leefii yabee pu.»

30 M nìn yāntì bi ŋá Isirayeel nibul kɔkɔ circir bi nì binicambi nín kpáfèe pu, ki nìn fātìi síiǹ marab bin ní bisaraaŋaliibi nì Leefii yab làá nīn nóó báà ŋma ń nīn tūǹ u-tundi tiŋanee. 31 M nìn fātìi síiǹ idɔkpaakaa saraabi bin sá bí nīn cāabìń ŋwiin ŋun bi yóoǹ bí cáańee nì tijincɔ̀fikaal tin bi péetí kí lēē kitiŋ puee saraabi.

«Óò m-Nimbɔtiu, nì a-laŋŋaŋfitiiku puee, taa súntí m-pu.»